ភ្នំពេញ ៖ លោកជំទាវបណ្ឌិត ជា សិរី ទេសាភិបាល ធនាគារជាតិនៃកម្ពុជា បានអញ្ជើញដឹកនាំកិច្ចប្រជុំពិភាក្សាការងារស្តីពីការអភិវឌ្ឍកម្មវិធីទូរស័ព្ទ បាគងសម្រាប់ទេសចរ (Bakong Tourists App) ជាមួយក្រុមធុរជនក្នុងវិស័យទេសចរណ៍ និងតំណាងមកពីក្រសួង-ស្ថាប័នពាក់ព័ន្ធ នារសៀលថ្ងៃពុធ ទី២៤ ខែកក្កដា ឆ្នាំ២០២៤ នៅធនាគារជាតិនៃកម្ពុជា អគារវត្តភ្នំ។
កិច្ចប្រជុំនេះមានគោលបំណងប្រមូលធាតុចូល និងស្វែងរកកិច្ចសហការដើម្បីអភិវឌ្ឍន៍កម្មវិធីទូរស័ព្ទបាគងសម្រាប់ទេសចរ ឱ្យបានល្អ សំដៅរួមចំណែកជំរុញវិស័យទេសចរណ៍នៅកម្ពុជា តាមរយៈការជួយសម្រួលឱ្យភ្ញៀវអន្តរជាតិអាចធ្វើប្រតិបត្តិការទូទាត់ឌីជីថលបានកាន់តែងាយស្រួល។
លោកជំទាវទេសាភិបាល បានលើកឡើងពីអត្ថប្រយោជន៍នៃ កម្មវិធីទូរស័ព្ទបាគងសម្រាប់ទេសចរ ដោយរំពឹងថានឹងក្លាយជាផលិតផលទេសចរថ្មីមួយទៀតដើម្បីបង្កើនភាពទាក់ទាញដល់ភ្ញៀវអន្តរជាតិមកទស្សនាកម្ពុជា បន្ថែមពីផលិតផលទេសចរវប្បធម៌ ប្រពៃណី ប្រវត្តិសាស្ត្រ និងធម្មជាតិ ដែលមានស្រាប់។ លោកជំទាវបន្ថែមថា កម្មវិធីថ្មីនេះក៏នឹងជួយលើកកម្ពស់កិត្យានុភាពជាតិមួយកម្រិតទៀតផងដែរ តាមរយៈការផ្តល់ឱ្យភ្ញៀវអន្តរជាតិនូវបទពិសោធន៍នៃការទូទាត់តាមឌីជីថលថ្មី ទំនើប និងជឿនលឿន។
លោកជំទាវបណ្ឌិត បានថ្លែងសុំការសហការណ៍ពីវិស័យទេសចរ ដើម្បីសម្រួលការទូទាត់របស់ភ្ញៀវតាមប្រព័ន្ធអេឡិកត្រូនិក។
កម្មវិធីបាគងទេសចរដែលនឹងដាក់ឲ្យប្រើប្រាស់ឆាប់ៗនេះ ក៏អាចក្លាយជា ផលិតផលទេសចរថ្មីមួយទៀតដើម្បីបង្កើនភាពទាក់ទាញដល់ភ្ញៀវអន្តរជាតិមកទស្សនាកម្ពុជា បន្ថែមពីផលិតផលទេសចរវប្បធម៌ ប្រពៃណី ប្រវត្តិសាស្ត្រ និងធម្មជាតិ ដែលមានស្រាប់។ ខ្ញុំសង្ឃឹមថា កម្មវិធីថ្មីនេះក៏នឹងជួយលើកកម្ពស់កិត្យានុភាពជាតិមួយកម្រិតទៀតផងដែរ តាមរយៈការផ្តល់ឱ្យភ្ញៀវអន្តរជាតិនូវបទពិសោធន៍នៃការទូទាត់តាមឌីជីថលថ្មី ទំនើប និងជឿនលឿន។
អង្គប្រជុំបានសាទរ និងកោតសសើរចំពោះគំនិតផ្តួចផ្តើមដ៏ល្អនេះ ព្រមទាំងបញ្ជាក់ពីការត្រៀមខ្លួនរួចជាស្រេចក្នុងការចូលរួមសហការ ដើម្បីពន្លឿនដំណើរការអភិវឌ្ឍន៍កម្មវិធីនេះ សំដៅឈានទៅសម្រេចបានរួចរាល់ និងដាក់ឱ្យដំណើរការនាពេលឆាប់ៗ៕ រក្សាសិទ្ធដោយ ៖ សុទ្ធលី
![](https://cen.com.kh/wp-content/uploads/2024/07/6cc260812401fda5600889d8439976ba-1024x697.jpg)
![](https://cen.com.kh/wp-content/uploads/2024/07/73d21fb50611fb061797d480d6f8aaf0-1024x687.jpg)
![](https://cen.com.kh/wp-content/uploads/2024/07/c9bfc1b2d7aaeae442323a760edb9663-1024x699.jpg)
![](https://cen.com.kh/wp-content/uploads/2024/07/be977db7998c8e82956f02f8a78f5371-1024x683.jpg)
![](https://cen.com.kh/wp-content/uploads/2024/07/8c2698e71eda352baa3346a5cfd39773-1024x698.jpg)
![](https://cen.com.kh/wp-content/uploads/2024/07/bb1e2db17b0da9886866109157a06563-1024x683.jpg)