ម្ចាស់សហគ្រាសខ្មែរមួយរូប មានបំណងពង្រីកការនាំចេញផលិតផលខ្មែរ រួមមានបុកកន្ទុយហេស បុកត្រីឆ្អើរ និងប្រហុកខ្ទិះ ទៅកាន់ទីផ្សារក្រៅប្រទេស

ភ្នំពេញ៖ លោកស្រី ហ៊ុក ស្រីហួរ ដែលជាអគ្គនាយិកា Phnom Penh Food Yummy Manufacturing បានឲ្យដឹងថា សហគ្រាសរបស់លោកស្រី មានគោលបំណងផ្លាស់ប្តូរផលិតផលរបស់ខ្លួនឱ្យកាន់តែមានស្តង់ដារ និងបង្កើនការនាំចេញ។

ជាមួយគ្នានេះ លោកស្រី ហ៊ុក ស្រីហួរ ក៏បាននាំចេញដោយជោគជ័យទៅប្រទេសកូរ៉េខាងត្បូង ដោយសង្ឃឹមថា នឹងនាំចេញទៅកាន់ប្រទេសអូស្ត្រាលីនៅចុងឆ្នាំនេះផងដែរ ជាមួយនឹងគំរូដែលបានបញ្ជូនរួចហើយទៅសហរដ្ឋអាមេរិក នូវែលសេឡង់ និងប្រទេសដទៃទៀត។​

សូមជម្រាបថា លោកស្រី បាននាំចេញផលិតផលចំនួន ៥០០ គីឡូក្រាម ទៅកាន់ប្រទេសកូរ៉េខាងត្បូងរួចហើយ ហើយមានបំណងពង្រីកការនាំចេញរបស់យើងទៅកាន់ប្រទេសចំនួន ៥ ។ បច្ចុប្បន្ននេះ លោកស្រីបាននាំចេញក្រៅផ្លូវការទៅកាន់ប្រទេសចំនួន ១០ ។ សហគ្រាសរបស់លោកស្រី បានផ្តល់នូវផលិតផលជាច្រើនប្រភេទ រួមទាំងបុកកន្ទុយហេស បុកត្រីឆ្អើរ និងប្រហុកខ្ទិះ។

លោកស្រី បានបង្ហាញពីបំណងចង់នាំចេញអាម៉ុកទៅក្រៅប្រទេសផងដែរ សម្រាប់ការទទួលស្គាល់ជាអន្តរជាតិ ក៏ដូចជានាំចេញនំបញ្ចុក និងគុយទាវខ្មែរ ដោយជំរុញឱ្យមានការគាំទ្រក្នុងស្រុកខ្លាំង ខណៈដែលលោកស្រីកំពុងពិចារណាលើអាហារហាឡាល ដែលទំនងជានឹងបង្ហាញនៅឆ្នាំក្រោយ។ លោកស្រីបានបន្ថែមថា ចាប់តាំងពីឆ្នាំ ២០២៣ មក លោកស្រី បានទទួលការគាំទ្រខ្លាំង ហើយផលិតផលរបស់លោកស្រី អាចរកបាននៅតាមផ្សារទំនើបធំៗមួយចំនួននៅក្នុងប្រទេសកម្ពុជា។

គួរបញ្ជាក់ថា នៅក្នុងដំណើរទស្សនកិច្ចទៅកាន់សហគ្រាសម្ហូបអាហារ នៅក្រុមហ៊ុន Phnom Penh Food Yummy Manufacturing ដែលជាសហគ្រាសកែច្នៃកសិកម្ម និងអាហារដ៏លេចធ្លោរបស់កម្ពុជា កាលពីពេលថ្មីៗនេះ ឯកឧត្តម ហែម វណ្ណឌី រដ្ឋមន្រ្តីក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ បានជំរុញឲ្យសហគ្រាសផលិតផលិតផល ត្រូវរក្សាបាននូវស្តង់ដារខ្ពស់នៃគុណភាព សុវត្ថិភាព អនាម័យ និងការច្នៃប្រឌិតនៃផលិតផលម្ហូបអាហារកម្ពុជា ក្នុងគោលបំណងទទួលបានការទទួលស្គាល់ជាអន្តរជាតិ៕