ទីផ្សារធានារ៉ាប់រងកម្ពុជា មានឱកាសសម្រាប់កំណើន ប៉ុន្តែរីកចម្រើនក្នុងល្បឿនយឺតជាងមុន

ភ្នំពេញ៖ យោងតាមរបាយការណ៍និយតករធានារ៉ាប់រងកម្ពុជា IRC បានឲ្យដឹងថា វិស័យធានារ៉ាប់រងកម្ពុជា បានបន្តរីកចម្រើន ប៉ុន្តែក្នុងល្បឿនយឺតជាងមុន ជាមួយនឹងបុព្វលាភសរុបក្នុងអំឡុងខែមេសា ដល់ ខែមិថុនា ឆ្នាំ២០២៤នេះ បានកើនដល់ ៨៧,៦លានដុល្លារ ។

របាយការណ៍បានបង្ហាញទៀតថា ការធានារ៉ាប់រងអាយុជីវិតបានកត់ត្រាកំណើនខ្ពស់ចំនួន ១២,៦ភាគរយ ក្នុងទំហំ ៥២ លានដុល្លារ ខណៈដែលការធានារ៉ាប់រងទូទៅបានឃើញកំណើនស្ទើរតែស្មើ ១,៩ ភាគរយដល់ ៣៥,៧ លានដុល្លារ។

របាយការណ៍នេះបានឱ្យដឹងថា ទ្រព្យសកម្មសរុបនៃវិស័យធានារ៉ាប់រងមានចំនួន ១,១ ប៊ីលានដុល្លារ ដែលជានិន្នាការដែលមានសុខភាពល្អទោះបីជាការធ្លាក់ចុះនៃបុព្វលាភក្តី។ ចំនួនសរុបនៃការទាមទារសំណងដែលបានបង់ដោយក្រុមហ៊ុនធានារ៉ាប់រងមានចំនួន ២៣,៧ លានដុល្លារ កើនឡើង ២៣,៨ ភាគរយពី ១៩ លានដុល្លារដែលបានកត់ត្រាក្នុងរយៈពេលដូចគ្នាកាលពីឆ្នាំមុន។

ទីផ្សារធានារ៉ាប់រងកម្ពុជា មានចំនួន ៣៤៤ លានដុល្លារ ក្នុងឆ្នាំ២០២៣ ជាមួយនឹងភាគទានបុព្វលាភធានារ៉ាប់រងចំនួន ១,១៦ភាគរយនៃផលិតផលក្នុងស្រុកសរុប និងដង់ស៊ីតេធានារ៉ាប់រងប្រហែល ២១,០២ ដុល្លារក្នុងមនុស្សម្នាក់។ «ភាគទានបុព្វលាភធានារ៉ាប់រង និងចំនួនដង់ស៊ីតេនៃការធានារ៉ាប់រងបង្ហាញថា ទីផ្សារធានារ៉ាប់រងកម្ពុជា មានឱកាសសម្រាប់កំណើនបន្ថែមទៀត។ លោក ប៊ូ ច័ន្ទភីរូ អគ្គនាយក IRC បានលើកឡើងថា វាមានតម្រូវការសម្រាប់ការផ្សព្វផ្សាយ និងការអប់រំជាសាធារណៈអំពីអត្ថប្រយោជន៍ និងគុណសម្បត្តិនៃការធានារ៉ាប់រង។

គួរបញ្ជាក់ថា ​ទីផ្សារធានារ៉ាប់រងកម្ពុជា មានគ្រឹះស្ថានធានារ៉ាប់រងសរុបចំនួន ១០៥ ដែលរួមមានក្រុមហ៊ុនធានារ៉ាប់រងទូទៅចំនួន ១៨ ក្រុមហ៊ុនធានារ៉ាប់រងអាយុជីវិតចំនួន ១៤ ក្រុមហ៊ុនធានារ៉ាប់រងខ្នាតតូចចំនួន ៧ ក្រុមហ៊ុនធានារ៉ាប់រងបន្តចំនួន ១ ក្រុមហ៊ុនជើងសារធានារ៉ាប់រងចំនួន ២០ ភ្នាក់ងារធានារ៉ាប់រងចំនួន ៣៩ ក្រុមហ៊ុនវាយតម្លៃហនិភ័យធានារ៉ាប់រងចំនួនបី ក្រុមហ៊ុនគ្រប់គ្រងការទាមទារសំណងចំនួន ២ និងក្រុមហ៊ុនផ្តល់ប្រឹក្សាធានារ៉ាប់រងមួយផងដែរ៕