ភ្នំពេញ៖ នៅថ្ងៃទី២៧ ខែតុលា ឆ្នាំ២០២៤ខាងមុខនេះ ក្រុមហ៊ុនអាកាសចរណ៍ Vietnam Airlines បានប្រកាស ថា ក្រុមហ៊ុននេះ នឹងបើកដំណើរការជើងហោះហើរត្រង់រវាងរដ្ឋធានីហាណូយ និងរាជធានីភ្នំពេញជាផ្លូវការ ដោយជើងហោះហើរនេះ នឹងមានកាលវិភាគហោះហើរចំនួន ៤ ដងក្នុងមួយសប្តាហ៍ នៅថ្ងៃច័ន្ទ ពុធ សុក្រ និងអាទិត្យ។
ជើងហោះហើរនេះ នឹងផ្តល់ជម្រើសថ្មី សម្រាប់អ្នកដំណើរបន្ថែមទៀតលើជើងហោះហើរចំនួន ៤ ដែលមានស្រាប់នាពេលបច្ចុប្បន្នរវាងវៀតណាម និងកម្ពុជា រួមមាន ហូជីមិញ-ភ្នំពេញ និងហាណូយ-សៀមរាប ក៏ដូចជាហូជីមិញ-សៀមរាប ឬហោះហើរឆ្លងកាត់ប្រទេសឡាវជាមុនសិន មុននឹងបន្តឆ្ពោះមកដល់ទីក្រុងភ្នំពេញ។
គេរំពឹងថា ជើងហោះហើរថ្មីនេះ នឹងពង្រឹងទំនាក់ទំនង និងបណ្តាញពាណិជ្ជកម្មរវាងប្រទេសទាំងពីរ ដោយនឹងបង្កើតភាពទាក់ទាញបន្ថែមទៀត សម្រាប់ភ្ញៀវទេសចរដែលមកពីប្រទេសជប៉ុន កូរ៉េខាងត្បូង និងបណ្តាប្រទេសអឺរ៉ុប ដែលចង់ធ្វើដំណើរទៅកាន់ប្រទេសកម្ពុជា និងវៀតណាម រួមទាំងគោលដៅផ្សេងទៀតនៅក្នុងតំបន់ ។ ការបង្កើនជើងហោះហើរនេះ នឹងធ្វើឱ្យចំនួនជើងហោះហើរសរុបរវាងប្រទេសទាំងពីរ នឹងកើនឡើងដល់ ៨៦ ជើងក្នុងមួយសប្តាហ៍ ។
ក្នុងឱកាសជើងហោះហើរថ្មីនេះ ក្រុមហ៊ុនអាកាសចរណ៍ Vietnam Airlines មានការផ្តល់ជូននូវកម្មវិធីប្រូម៉ូសិនពិសេស ជាមួយនឹងសំបុត្រធ្វើដំណើរទៅមក មានតម្លៃចាប់ពី ២៦២ ដុល្លារ សម្រាប់អ្នកដំណើរដែលទិញសំបុត្រចាប់ពីថ្ងៃជូនដំណឹងនេះ រហូតដល់ថ្ងៃទី ៣០ ខែកញ្ញា ជាមួយនឹងចន្លោះពេលធ្វើដំណើរចាប់ពីថ្ងៃទី ២៧ ខែតុលា ដល់ថ្ងៃទី ២ ខែវិច្ឆិកា ឆ្នាំ ២០២៤។
គួរបញ្ជាក់ថា ក្រុមហ៊ុនអាកាសចរណ៍ Vietnam Airlines គឺជាក្រុមហ៊ុនអាកាសចរណ៍តែមួយគត់របស់វៀតណាម ដែលដំណើរការជើងហោះហើរត្រង់ពីទីក្រុងហាណូយ មកកាន់រាជធានីភ្នំពេញ។ ជាមួយនឹងជើងហោះហើរថ្មីនេះ អ្នកដំណើរដែលធ្វើដំណើរពីទីក្រុងហាណូយទៅកាន់រាជធានីភ្នំពេញ នឹងកាត់បន្ថយពេលវេលាធ្វើដំណើរ មកនៅត្រឹមតែជាងពីរម៉ោងប៉ុណ្ណោះ៕
