ខេត្តព្រះសីហនុ ៖ នាថ្ងៃទី១៨ ខែកញ្ញា ឆ្នាំ២០២៤នេះ នៅចន្លោះគីឡូម៉ែត្រ K168 – K169 ស្ថិតនៅភូមិមួយ ឃុំទំនប់រលក ស្រុកស្ទឹងហាវ ខេត្តព្រះសីហនុ មានករណីទឹកហូរកាត់ផ្លូវល្បឿនលឿនភ្នំពេញ-ព្រះសីហនុ ខណៈដែលភ្លៀងកំពុងធ្លាក់យ៉ាងខ្លាំង។
កម្លាំងនាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈប្រចាំការលើផ្លូវល្បឿនលឿន បានកំពុងអន្តរាគមន៍នៅកន្លែងកើតហេតុដោយអ្នកបើកបរអាចធ្វើដំណើរបានលើគន្លងវ៉ាជែង ដោយមិនមានការកាត់ផ្តាច់ចរាចរណ៍ឡើយ។
សូមអ្នកបើកបរដោយប្រុងប្រយ័ត្ន និងត្រូវគោរពការបញ្ជាចរាចរណ៍របស់នគរបាលនិងមើលផ្ទាំងLED ដែលក្រុមហ៊ុនផ្លូវល្បឿនលឿនភ្នំពេញ-ព្រះសីហនុ បានជូនដំណឹង សារដាស់តឿន និងព័ត៌មានផ្សេងៗ។
ក្រុមហ៊ុនផ្លូវល្បឿនលឿនភ្នំពេញ-ក្រុងព្រះសីហនុ បានចេញសេចក្តីជូនដំណឹង ស្តីពី ការធ្លាក់ភ្លៀងខ្លាំងបណ្តាលឱ្យមានទឹកជន់មកលើផ្លូវល្បឿនលឿនភ្នំពេញ-ក្រុងព្រះសីហនុ ទិសដៅពីក្រុងព្រះសីហនុទៅភ្នំពេញ ត្រង់ចំណុចគីឡូម៉ែត្រលេខ១៦៩ ។
សូមជម្រាបដល់សាធារណជន និងអតិថិជនផ្លូវល្បឿនលឿនភ្នំពេញ-ក្រុងព្រះសីហនុ ទាំងអស់ជាទីគោរពរាប់អាន នៅទិសដៅពីក្រុងព្រះសីហនុទៅភ្នំពេញ ត្រង់ចំណុចគីឡូលេខ ១៦៩ មានការធ្លាក់ភ្លៀងខ្លាំងដែលបណ្តាលឱ្យមានទឹកជន់មកលើផ្លូវល្បឿនលឿន។
គួរបញ្ជាក់ផងដែរថា ចំណុចទីតាំងដែលបានជម្រាបខាងលើនៅបើកដំណើរការជាធម្មតា សូមអតិថិជនដែលធ្វើដំណើរលើផ្លូវល្បឿនលឿនភ្នំពេញ-ក្រុងព្រះសីហនុទាំងអស់បើកភ្លើងកូត រក្សាចន្លោះសុវត្ថិភាព ហាមវ៉ាជែងនិងត្រូវបន្ថយល្បឿនបើកបរ ត្រង់ចំណុចទីតាំងដែលបានជម្រាបខាងលើដោយការប្រុងប្រយ័ត្នខ្ពស់។
អាស្រ័យដូចបានគោរពជូនដំណឹងខាងលើ សូមសាធារណជន និងអតិថិជនទាំងអស់ មេត្តាជ្រាប និងសូមការអធ្យាស្រ័យ ដោយចូលរួមសហការ បន្ថយល្បឿនបើកបរត្រង់ចំណុចទីតាំងដែលបានជម្រាបខាងលើ៕ រក្សាសិទ្ធដោយ ៖ សុទ្ធលី
