ធនាគារជាតិបដិសេធ ចំពោះក្រុមឆាណែល ឬគណនីតេលេក្រាម ដែលបានប្រើប្រាស់និម្មិត្តសញ្ញា និងឈ្មោះធនាគារជាតិនៃកម្ពុជា ក្នុងចេតនាទុច្ចរិត នាំឱ្យបាត់បង់ប្រាក់កាស ឬទ្រព្យសម្បត្តិ

រាជធានីភ្នំពេញ ៖ ធនាគារជាតិនៃកម្ពុជា សូមបដិសេធទាំងស្រុងចំពោះក្រុមឆាណែល ឬគណនីតេលេក្រាម (Telegram) ឬបណ្តាញទំនាក់ទំនងសង្គមផ្សេងៗទៀត ដែលបានប្រើប្រាស់និម្មិត្តសញ្ញា និងឈ្មោះ ធនាគារជាតិនៃកម្ពុជា ក្នុងចេតនាទុច្ចរិត ឆបោកប្រាក់កាសតាមរយៈការផ្សព្វផ្សាយពីគម្រោងវិនិយោគ ឬប្រតិបត្តិការជួញដូរផលិតផលហិរញ្ញវត្ថុក្រៅផ្លូវការ ដូចជា ហាងឆេងមាស អត្រាប្តូរប្រាក់ ឬទ្រព្យ ឌីជីថល ជាដើម។

ធនាគារជាតិនៃកម្ពុជា សូមបញ្ជាក់សារជាថ្មីថា ធនាគារជាតិនៃកម្ពុជា មិនមានក្រុមឆាណែល ឬគណនីតេលេក្រាមផ្លូវការទេ ហើយក៏មិនធ្លាប់ប្រើប្រាស់បណ្តាញទំនាក់ទំនងសង្គមផ្សេងៗទៀត សម្រាប់ផ្សព្វផ្សាយឱ្យសាធារណជនចូលរួមវិនិយោគលើទីផ្សារហិរញ្ញវត្ថុឡើយ។

ធនាគារជាតិនៃកម្ពុជា សូមអំពាវនាវ និងក្រើនរំលឹកដល់សាធារណជនឱ្យបង្កើនការប្រុងប្រយ័ត្ន ខ្ពស់ជាប់ជាប្រចាំ ដើម្បីកុំឱ្យចាញ់បោកល្បិចកលជនទុច្ចរិតមួយចំនួន ដែលអាចនាំឱ្យបាត់បង់ប្រាក់កាស ឬទ្រព្យសម្បត្តិផ្សេងៗ តាមរយៈការចូលរួមវិនិយោគ ជាមួយក្រុមទាំងឡាយណាដែលពុំមានអាជ្ញាប័ណ្ណ និងការត្រួតពិនិត្យត្រឹមត្រូវពីអាជ្ញាធរមានសមត្ថកិច្ច។រក្សាសិទ្ធដោយ ៖ សុទ្ធលី