Reuters បានចុះផ្សាយឱ្យដឹងថា ក្រសួងការបរទេសចិននៅថ្ងៃទី២០សីហា បញ្ជាក់ថាប្រទេសនេះនឹងផ្ដល់ជំនួយឱ្យប្រទេសតុងហ្គា និងប្រទេសផ្សេងទៀតនៅតំបន់ប៉ាស៊ីហ្វិក ដើម្បីជួយឱ្យប្រទេសទាំងនេះអភិវឌ្ឍន៍ប្រកបដោយស្ថិរភាព ខណៈពេលស្ថានការណ៍បំណុលកំពុងក្លាយជាបញ្ហាក្ដៅគគុកនៅតំបន់នេះ។
មុននោះ កាលពីថ្ងៃទី១៧សីហា នាយករដ្ឋមន្ដ្រីតុងហ្គា Akalisi Pohiva បានលុបចោលវិញនូវការអំពាវនាវដល់មេដឹកនាំនៃ បណ្ដាប្រជុំកោះក្នុងតំបន់ប៉ាស៊ីហ្វិកសាមគ្គីរួបរួមគ្នាមូលសំឡេងសុំឱ្យចិនលុបចោលនូវខ្ទង់ប្រាក់កម្ចីរបស់ប្រទេស ក្រោយពេលលេចឮថាក្រុងប៉េកាំងមិនពេញចិត្តផែនការនេះ។
តុងហ្គាជាប្រទេសមួយក្នុងចំណោមប្រទេសប្រជុំកោះ៨ នៅភាគខាងត្បូងសមុទ្រប៉ាស៊ីហ្វិក កំពុងជំពាក់បំណុលចិនដ៏ច្រើន និងបានកៀរគររកការគាំទ្រដើម្បីបង្កសម្ពាធបង្ខំឱ្យចិនលុបចោលខ្ទង់បំណុលទាំងនោះ។
នាយករដ្ឋមន្ដ្រី Pohiva ឱ្យដឹងថា បណ្ដាមេដឹកនាំតំបន់ប៉ាស៊ីហ្វិកមានគម្រោងជួបជុំគ្នានៅNauru នាខែក្រោយ ក្នុងក្របខ័ណ្ឌវេទិកាបណ្ដាប្រទេសប្រជុំកោះ(PIF).។
នៅក្នុងសេចក្ដីថ្លែងការណ៍មួយលោកPohiva ថ្លែងថា វេទិកានេះពុំមែនជាកន្លែងសមស្របដើម្បីពិភាក្សាអំពីបញ្ហាបំណុលចិនទេ ហើយបណ្ដាប្រទេសនៅតំបន់ប៉ាស៊ីហ្វិកគួរស្វែងរកដំណោះស្រាយរៀងៗខ្លួន។
ថ្លែងនៅក្នុងសន្និសីទព័ត៌មាននៅក្រុងប៉េកាំង អ្នកនាំពាក្យក្រសួងការបរទេស ចិនឱ្យដឹងថា លោកបានកត់សម្គាល់យោបល់របស់នាយករដ្ឋមន្ដ្រីតុងហ្គាក្នុងការវាយតម្លៃវិជ្ជមានអំពីទំនាក់ទំនងជាមួយចិន។អ្នកនាំពាក្យរូបនេះពោលថា ចិននឹងបន្ដគាំទ្រនិងផ្គត់ផ្គង់ជំនួយចាំបាច់ឱ្យតុងហ្គា ក៏ដូចជាបណ្ដាប្រទេសដែនកោះដទៃទៀតនៅសមុទ្រប៉ាស៊ីហ្វិកក្នុងការអភិវឌ្ឍរឹងមាំតាមដែលអាចធ្វើទៅបាន។ ប៉ុន្ដែពុំបានលើកចំប្រទេសណាមួយនោះទេ៕
សូយន