យោងតាម South China Morning Post គណនីមូលនិធិរបស់ប្តីប្រពន្ធមួយ ដែលទទួលបានពីយុទ្ធនាការស្វែងរកការផ្តល់ប្រាក់ឧបត្ថម្ភ សម្រាប់ការព្យាបាលកូនប្រុសអាយុ៤ឆ្នាំរបស់ពួកគេ ដែលត្រូវបានគេរកឃើញថាមានជំងឺមហារីកឈាមធ្ងន់ធ្ងរកាលពីខែកក្កដា ឥឡូវនេះ ត្រូវបានបង្កកហើយ បន្ទាប់ពីពួកគេលេចចេញនៅទីសាធារណៈ អំពាវនាវលក់កូនស្រី ដើម្បីបានលុយយកមកព្យាបាលកូនប្រុសរបស់ពួកគេ ដែលជាបងប្អូនភ្លោះរបស់នាង ។
ឪពុកម្តាយនោះត្រូវបានគេដឹងថាមានឈ្មោះ Liang Yujia និង Chen Lanqin មកពីខេត្ត Sichuan ប្រទេសចិន ទទួលបានមូលនិធិជាង ៩០,០០០ យន់ ត្រូវបានបង្កកនៅទូទាំងក្នុងវេទិកាមូលនិធិចំនួន៣ដែលរួមមាន៖ Aixinchou, Shudi Chou និង Chunyu Chou ។
បុរសជាឪពុក Liang ត្រូវបានគេថតរូប ខណៈឈរពរកូនស្រីរបស់ខ្លួន ជាមួយស្លាកសញ្ញាមួយ នៅលើដងផ្លូវមួយកន្លែងក្នុងទីក្រុង Chengdu ដោយបានបញ្ជាក់ថា គាត់មានបំណងផ្តល់ «កូនស្រីជាទីស្រលាញ់ និងគួរឲ្យស្រលាញ់» ម្នាក់នេះរបស់គាត់ ទៅឲ្យនរណាម្នាក់ ដែលអាចបរិច្ចាគប្រាក់ សម្រាប់ការព្យាបាលកូនប្រុសរបស់គាត់ ។
រូបភាពនេះបានលេចឡើងនៅលើអ៊ីនធើរណែតភ្លាមៗ ដែលធ្វើឲ្យមានការខឹងសម្បារយ៉ាងខ្លាំងក្នុងចំណោមអ្នកប្រើប្រាស់អ៊ិនធើរណែតជនជាតិចិនជាច្រើន ដែលបានចាត់ទុកថា នេះគឺ «អំពើជួញដូរមនុស្ស» យ៉ាងជាក់ស្តែង ។ អ្នកដទៃទៀតបានហៅបុរសជាប្តីនេះថាលំអៀងខាងភេទ សម្រាប់ការពេញចិត្តទៅលើកូនប្រុស ជាងកូនស្រី ។
ទោះយ៉ាងណា ឪពុកម្តាយបានអះអាងថា ពួកគេផ្តល់កូនស្រីរបស់ពួកគេគ្រាន់តែជាល្បិចបញ្ឆោតមួយប៉ុណ្ណោះ ព្រោះតែពួកគេកំពុងប្រឈមមុខនឹងការលំបាកមួយចំនួន ដើម្បីបង្កើនប្រាក់គ្រប់គ្រាន់ សម្រាប់ការព្យាបាលកូនប្រុសរបស់ពួកគេ ។ គោលដៅរបស់ពួកគេគឺចាប់ពី ៥០០,០០០ ទៅ ៦០០,០០០ យន់ ។
Liang បានបញ្ជាក់ថា គាត់មិនមិនរំពឹងថា មានប្រតិកម្មខ្លាំងក្លាបែបនេះនោះទេ ព្រោះពួកគេគ្រាន់តែចង់បានការយកចិត្តទុកដាក់ ពីអ្នកបរិច្ចាគទានឲ្យបានច្រើនប៉ុណ្ណោះ និងនិយាយថា «ខ្ញុំពិតជាមានការសោកស្តាយចំពោះការធ្វើដូច្នេះឥឡូវនេះ ប៉ុន្តែ យើងខ្ញុំអស់ជម្រើសហើយនៅពេលនេះ ។ យើងមានការព្រួយបារម្ភ អំពីការមិនអាចរកប្រាក់បានគ្រប់គ្រាន់ ដូច្នេះ យើងក៏បានបង្កើតឡើងនូវគំនិតនេះតែម្តងទៅ» ។
ទោះយ៉ាងណា មួយក្នុងចំណោមវេបសាយមូលនិធិ Aixinchou អាចមិនបង្កកយុទ្ធនាការឪពុកម្តាយនេះទេ ប៉ុន្តែ មូលនិធិទាំងនោះត្រូវចូលទៅកាន់មន្ទីរពេទ្យកូនប្រុសរបស់ពួកគេផ្ទាល់តែម្តង ដើម្បីធានាថា ការបរិច្ចាគទានទាំងនោះ គឺសម្រាប់ការព្យាបាលក្មេងប្រុសនោះប៉ុណ្ណោះ ។
ឥឡូវនេះ យោងតាម MSN News ដែលបានដកស្រង់ពី Beijing News ឪពុកម្តាយនោះ កំពុងពិចារណាលក់ផ្ទះរបស់ពួកគេ ដើម្បីរៃអង្គាសប្រាក់ ៕ ចន្ទី (Worldofbuzz)
