នេះចាត់ទុកជាសកម្មភាពប្លន់ដ៏ពុំខ្លាចញញើតមួយ ដែលចោរម្នាក់ប្រដាប់អាវុធខ្លី១ដើម និងពាក់មូកសុវត្ថិភាពបិទបាំងមុខ បានចូលប្លន់តែម្នាក់ឯងនៅសាខាធនាគារ Gornment Housing Bank នៅក្នុងខេត្ត Phuket កាលពីព្រឹកថ្ងៃសុក្រ (១០ សីហា) និងបានយកអស់សាច់ប្រាក់ចំនួន ២៦,៩០០ បាត ។
ប៉ូលីស Thalang បានឆ្លើយតបទៅនឹងហេតុការណ៍ប្លន់ប្រដាប់អាវុធនេះ នៅវេលាម៉ោង ៩ និង០៥ នាទីព្រឹក និងបានដឹងថា ចោរប្លន់តែម្នាក់ឯងនោះ បានមកធ្វើសកម្មភាពចូលមកប្លន់ធនាគារនេះ តាមរយៈមធ្យោបាយម៉ូតូ១គ្រឿង ។ វាបានដើរចូលក្នុងធនាគារ និងដកកាំភ្លើងភ្ជង់បង្ខំឲ្យបុគ្គលិករាប់លុយ ដកលុយពីក្នុងថតតុ ដាក់ចូលក្នុងកាបូបខ្មៅរបស់វាយ៉ាងលឿន ។
អតិថិជនជាច្រើន ដែលកំពុងអង្គុយតម្រង់ជួរគ្នា បាននាំគ្នារត់ចេញ ខណៈសន្តិសុខម្នាក់ដែលបានព្យាយាមរារាំងសកម្មភាពចោរនេះ ត្រូវបានចាប់ធ្វើជាចំណាប់ខ្មាំង ។
សន្តិសុខនេះ ត្រូវបានដឹងថា ពុំទទួលរងរបួសណាមួយនោះទេ ខណៈចោររូបនោះ បានគេចខ្លួនតាមរយៈម៉ូតូរបស់វាដោយសុវត្ថិភាព ។
តាមរយៈវីដេអូ CCTV នោះហេតុការណ៍ប្លន់ដ៏ពុំខ្លាចញញើតនេះ ត្រូវបានធ្វើឡើងក្នុងរយៈពេលប្រហែល ៦ នាទី ប៉ុណ្ណោះ ។
ទោះយ៉ាងណា ក្រោយពេលកើតហេតុ សេវាបម្រើជូនអតិថិជនរបស់ធានាគារនេះ នៅតែបន្តដំណើរការធម្មតា ខណៈសមត្ថកិច្ចធ្វើការស្រាវជ្រាវតាមនីតិវិធី ៕ ឧត្តម (The Nation)