កំពង់ស្ពឺ៖ ស្នងការដ្ឋាននគរបាលខេត្ដកំពង់ស្ពឺ បានឲ្យដឹងថា ដោយអនុវត្ដបទបញ្ជាលោកឧត្ដមសេនីយ៍ទោ ឃឹម សុកខៃ ស្នងការនគរបាលខេត្ដកំពង់ស្ពឺ លើយុទ្ធនាការ ការចុះបង្រ្កាបមុខសញ្ញាក្រុមក្មេងទំនើង៖ យប់ថ្ងៃទី២៥.១២.២០២៤ កំលាំនគរបាលតាមបណ្ដាគោលដៅប៉ុស្ដិ៍នគរបាលរដ្ឋបាល បានការសហការពីរកំលាំងអន្តរាគមន៍នៃអធិការដ្ឋាននគរបាលស្រុកបសេដ្ឋ ធ្វើការល្បាតពួនស្ទាក់តាមផែនការប្រទាក់ក្រឡាក្នុងភូមិសាស្រ្ត ជាក់ស្ដែងរកឃើញនិងធ្វើការឃាត់ខ្លួនមុខសញ្ញាក្រុមក្មេងទំនើង ចំនួន០៣ក្រុម៖
ក្រុមទី០១ មានគ្នាចំនួន០៣នាក់ ម៉ូតូ០១គ្រឿង វត្ថុតាងដាវកែច្នៃ០១,ទូរស័ព្ទ០១គ្រឿង ឃាត់ខ្លួនចំណុចផ្លូវកៅស៊ូស្ថិតក្នុងភូមិរកាកោង ឃុំកាតភ្លុក ស្រុកបសេដ្ឋ រួមមាន ១./ឈ្មោះ សួង សាន ភេទប្រុស អាយុ២១ឆ្នាំ , ២./ឈ្មោះ និន សុខណា ភេទប្រុស អាយុ១៧ឆ្នាំ , ៣./ឈ្មោះ សឿន ភាក់ ភេទប្រុស អាយុ២០ឆ្នាំ ។ គោលបំណងដាក់អាវុធតាមខ្លួនដើរមើលគេរាំនិងការពារខ្លួនពីសត្រូវ។
ក្រុមទី០២ មានគ្នាចំនួន០២នាក់ម៉ូតូ០១គ្រឿង វត្ថុតាងកាំបិតផ្គាក់០១,ទូរស័ព្ទ០១គ្រឿង ឃាត់ខ្លួនលើផ្លូវបេតុង ស្ថិតក្នុងភូមិត្រពាំងអណ្តូង ឃុំនិទាន ស្រុកបសេដ្ឋ រួមមាន ១./ឈ្មោះ សៀក បញ្ញា ភេទប្រុស អាយុ១៨ឆ្នាំ , ២./ឈ្មោះ លន ណែម ភេទប្រុស អាយុ២១ឆ្នាំ។ គោលបំណង ធ្លាប់មានជំលាល់ជាមួយភាគីក្មេងទំនើងដើរយប់ដូចគ្នាការពារខ្លួន(ត្រៀមប្រយុទ្ធ)
ក្រុមទី០៣ មានគ្នាចំនួន០៣នាក់ ម៉ូតូ០១គ្រឿង វត្ថុតាងកាំបិតផ្គាក់០១ដើម ដាវកែច្នៃ០១ ឃាត់ខ្លួនលើផ្លូវកៅស៊ូ ស្ថិតក្នុងភូមិចំបក់ ឃុំកាត់ភ្លុក ស្រុកបសេដ្ឋ រួមមាន ១./ឈ្មោះ វុិត សំណាង ភេទប្រុស អាយុ១៨ឆ្នាំ , ២./ឈ្មោះ ប៊ុន ដា ភេទប្រុស អាយុ១៨ឆ្នាំ, ៣./ឈ្មោះ យ៉ង រតនា ភេទប្រុស អាយុ១៩ឆ្នាំ ។
លោកវរសេនីយ៍ឯក ចន សុភីត អធិការនគរបាលស្រុកបសេដ្ឋ បានបញ្ជាក់ថាក្រុមក្មេងទំនើងទាំងបីក្រុមនេះសុទ្ធតែជាមុខសញ្ញាគ្រប់គ្រងរបស់មូលដ្ឋាននិងធ្លាប់មានសកម្មភាព ប៉ុន្ដែជាក់ស្ដែងយប់នេះគឺពួកគេអាចគ្មានឱកាសគេចឆ្លងដែនទៅប្រព្រឹត្ដបទល្មើសបាននោះទេ ដោយអនុវត្ដបទបញ្ជាដ៏ម៉ឹងម៉ាត់ និងការចង្អុលដឹកនាំផ្ទាល់ពី លោកស្នងការនគរបាលខេត្តកំលាំងរបស់អធិការដ្ឋាននគរបាលស្រុកបសេដ្ឋបានត្រៀមកំលាំងអនុវត្ដតាមផែនការ២៤ម៉ោងលើ២៤ដោយបង្កើនការប្រមូលផ្ដុំព័ត៌មានប្រើប្រាស់វិធានការស្រាវជ្រាវស៊ើបបញ្ជាក់ករណីនិមួយៗ ធ្វើយ៉ាងណាមិនអោយក្រុមនេះអាចឈានទៅបង្កជាបក្ខពួកនិងការគំរាមកំហែងដល់សន្ដិសុខសុវត្ថិភាពសង្គមក្នុងមូលដ្ឋានស្រុកបសេដ្ឋបានឡើយ ពិសេសសហការជាមួយស្រុកជាប់ព្រំប្រទល់ផ្លាស់ប្ដូរព័ត៌មាននិងមុខសញ្ញា។
បច្ចុប្បន្នក្រុមក្មេងទំនើងទាំងបីក្រុមរួមជាមួយវត្ថុតាង សមត្ថកិច្ចកំពុងអនុវត្តនីតិវិធី និងកសាងសំណុំរឿងបញ្ជូនទៅការិយាល័យជំនាញ នៃស្នងការដ្ឋាននគរបាលខេត្តកំពង់ស្ពឺ ចំណាត់ការនីតិវិធីបន្ដ៕ រក្សាសិទ្ធដោយ៖សុទ្ធលី
