ភ្នំពេញ៖ លោក ហ្វា សាលី ប្រធានសម្ព័ន្ធសហជីពជាតិ បានឲ្យដឹងថា ការនាំចេញសម្លៀកបំពាក់ កាបូប និងស្បែកជើង ពីប្រទេសកម្ពុជា ទៅកាន់ទីផ្សារអឺរ៉ុប (EU) នៅតែមានស្ថានភាពល្អប្រសើរ បើទោះបីជាមានការកាត់បន្ថយប្រព័ន្ធអនុគ្រោះពន្ធ EBA ចំនួន២០% តាំងពីឆ្នាំ២០១៨ ក៏ដោយ។
លោក ហ្វា សាលី បន្តថា ក្រៅពីប្រព័ន្ធអនុគ្រោះពន្ធ EBA ដែលជាប្រព័ន្ធអនុគ្រោះពន្ធរបស់អឺរ៉ុប ការនាំចេញវិស័យកាត់ដេរ ជាពិសេសកាបូប ក៏ទទួលបានអត្ថប្រយោជន៍ពីប្រព័ន្ធអនុគ្រោះពន្ធ GSP ពីសហរដ្ឋអាម៉េរិកដែរ ហើយបើផ្អែកលើស្ថានភាពនយោបាយ សិទ្ធិមនុស្ស សិទ្ធិការងារនៅកម្ពុជា និងទំនាក់ ទំនងរវាងកម្ពុជានិងសហរដ្ឋអាម៉េរិក ក្រោមការដឹកនាំអាណត្តិទី២របស់ លោក ដូណាល់ ត្រាំ គឺក្នុងនាមជាថ្នាក់ដឹកនាំសម្ព័ន្ធសហជីព សង្ឃឹមជឿជាក់ថា កម្ពុជា មានលក្ខខណ្ឌគ្រប់គ្រាន់ក្នុងការទទួលបាន GSP បន្តទៀត ដោយមិនប្រកាន់លើភូមិសាស្ត្រនយោបាយ និងសង្ឃឹមថាអាណត្តិនេះ នឹងមានការវិនិយោគក្រុមហ៊ុនអាម៉េរិកលើទឹកដីកម្ពុជា។
លោកប្រធានសម្ព័ន្ធសហជីព សង្ឃឹមថា អ្នកនយោបាយបក្សប្រឆាំង ឬសហជីពបម្រើបរទេស គួរជួយអំពាវនាវ ដល់អាម៉េរិកក្នុងការវិនិយោគនៅកម្ពុជា ជៀសវាងដើរបាតុកម្មឲ្យគេកាត់ផ្តាច់ EBA ឬ GSP ពីកម្ពុជា ដើម្បីតែមហិតារបស់ខ្លួន ភ្លេចពលរដ្ឋ និងកម្មករដែលកំពុងធ្វើការយ៉ាងសប្បាយរីករាយជាមួយនឹងប្រាក់ឈ្នួលថ្មី ២០៨ដុល្លារ។
សូមបញ្ជាក់ថា ប្រាក់ឈ្នួលអប្បបរមា ឆ្នាំ២០២៥ មានចំនួន២០៨ដុល្លារ សម្រាប់កម្មករ និយោជិតនៃវិស័យវាយនភណ្ឌកាត់ដេរ ផលិតស្បែកជើង និងផលិតផលធ្វើដំណើរ និងកាបូប ដែលត្រូវបានចាប់ផ្តើមអនុវត្តចាប់ពីខែមករា ឆ្នាំ២០២៥នេះតទៅហើយ ខណៈដែលសហជីព និងកម្មករនិយោជិត បានបង្ហាញការសប្បាយចិត្ត ចំពោះការដំឡើងប្រាក់ឈ្នួលអប្បបរមាក្នុងឆ្នាំ ថ្មី២០២៥នេះ៕
