នេះជាហេតុការណ៍គ្រោះថ្នាក់ចរាចរណ៍មួយ ពិតជាគួរឲ្យហួសចិត្តណាស់ ដែលរថយន្ត Toyota ALPHARD បើកបរបញ្ច្រាស ទៅបុករថយន្ត Toyota LAND CRUISER កំពុងបើកស្របទិស(ផ្លូវត្រង់) យ៉ាងពេញទំហឹង បណ្តាលឲ្យរងការខូចខាតទាំងពីរតែម្តង។
ហេតុការណ៍នេះ បានបង្កឱ្យមានការភ្ញាក់ផ្អើល កាលពីព្រឹកថ្ងៃទី១៦ ខែមីនា ឆ្នាំ២០២៥ ស្ថិតនៅផ្លូវសហព័ន្ធរុស្សី កែងផ្លូវលេខ១០៨ មុខស្ថានីយ៍ប្រេង TOTAL សង្កាត់ស្រះចក ខណ្ឌដូនពេញ។ ទោះជាយ៉ាងណា ក្រោយហេតុការណ៍កើតឡើង ក៏បានឃើញមន្រ្តីប៉ូលីសចរាចរណ៍ មកធ្វើការវាស់វែងតាមជំនាញ និងនាំយករថយន្តទាំងពីរ រួមទាំងម្ចាស់ ទៅដោះស្រាយគ្នាតាមផ្លូវច្បាប់។
ជុំវិញករណីនេះ មិនដឹងថា ភាគីណាជាមានចេតនាបង្កឲ្យមានគ្រោះថ្នាក់នេះកើតឡើងនោះទេ ប៉ុន្តែ បើនិយាយពីកំហុសវិញ គឺខាងភាគីរថយន្ត Alphard ជាអ្នកខុសទាំងស្រុងតែម្តង ដែលបើកបរបញ្ច្រាសផ្លូវគេបែបនេះ ខណៈមហាជននៅលើបណ្តាញសង្គម បាននាំគ្នាព្រលះរថយន្ត Alphard យ៉ាងធ្ងន់ៗ។
តែទន្ទឹមនឹងឃើញមានអ្នកលើកឡើង «មកពីមិនចេះអធ្យាស្រ័យគ្នា ទើបមានគ្រោះថ្នាក់នេះកើតឡើង», អ្នកលេងបណ្តាញសង្គមជាច្រើន ក៏បានដាក់ឲ្យបែបនេះថា៖ «ម្នាក់ៗ ជិះអត់គោរពច្បាប់ចរាចរណ៍ទេ រួចនិយាយថាគេមិនចេះយោគយល់អធ្យាស្រ័យ, ខ្លួនខុសតែអោយគេអធ្យាស្រ័យ ចឹងៗអីនៅមានប៉ុន្មានទៀត, បើកបញ្ច្រាសអោយគេអធ្យាស្រ័យ ដល់គេបុកងាប់ អ្នកស្របសងមែន កាលងាប់អស់ពួកអោយគេអធ្យាស្រ័យ នៅនាំចង្រៃដល់ឡានគេផ្សេងទៀត, កុំដើម្បីតែចង់បានការអធ្យាស្រ័យបើកបរមិនដឹងខ្យល់អីរបៀបហ្នឹងនោះ, អាហ្វាវាចង់សម្ដែងឫកថា អាចបើកបញ្ច្រាសថ្នល់បានពេលណាក៏បាន ហេតុនេះហើយប៉ះអ្នកមែនទែនបែបហ្នឹងឯង គួរតែឲ្យអាហ្វាហ្នឹងទៅរៀនបើកឡានជាថ្មីទៅ។ គ្មានដឹងច្បាប់ចរាចរណ៍អីសោះពួកអាឆ្កួតចោលម្សៀតអស់នេះ,…»៕
