កាលពីថ្ងៃទី១១ ខែមេសា ឆ្នាំ២០២៥ សារព័ត៌មាន Daily News បានរាយការណ៍ថា អ្នកស្រី Apichada Thum Pradit ឬ Aom មន្ត្រីនៃមូលនិធិ Ruamkatanyu បានចេញមកប្រាប់រឿងរ៉ាវដ៏ព្រឺព្រួច ដែលនាងបានជួបប្រទះក្នុងពេលបំពេញភារកិច្ចជួយអ្នកបាត់ខ្លួន បន្ទាប់ពីការិយាល័យសវនកម្មបានដួលរលំ ក្នុងគ្រោះរញ្ជួយដី។
អ្នកស្រី Apichada បានបញ្ជាក់ថា នៅចំណុចមួយ ខណៈពេលដែលនាងកំពុងដេកនៅក្នុងតង់ ក្រុមជួយសង្គ្រោះបានហៅនាងឱ្យមកជួយ ដោយសារតែពួកគេបានរកឃើញសាកសពមនុស្សពីរនាក់នៅខាងក្នុង ហើយមិនអាចយកចេញមកក្រៅបាន។ ទោះជាយ៉ាងណា ក្រុមសង្គ្រោះនៅខាងក្នុងបានប្រាប់នាងឱ្យរង់ចាំនៅខាងក្រៅ ទើបនាងត្រឡប់ទៅដេកក្នុងតង់ពេទ្យវិញ។ គ្មាននរណាម្នាក់អាចដើរកាត់ផ្នែកម្ខាងនៃតង់បានទេ ហើយនៅខាងក្រោយ គឺជាអគារដួលរលំ ដែលគ្មាននរណាម្នាក់អាចចេញចូលបានឡើយ។
លុះដល់ម៉ោង១ ម៉ោង២ ទៀបភ្លឺ គឺប្រហែល១០នាទីក្រោយមក ខណៈពេលដែលនាងអស់កម្លាំង និងងងុយដេក នាងមានអារម្មណ៍ដូចជាបើកភ្នែកធំៗ ហើយនាងឃើញមិត្តរបស់នាងកំពុងអង្គុយលេងទូរស័ព្ទ។ រំពេចនោះ សំឡេងស្ត្រីម្នាក់បានបន្លឺឡើងថា៖ «បងស្រី សូយកខ្ញុំទៅផ្ទះផង ខ្ញុំចង់ទៅផ្ទះណាស់!» ។
អ្នកស្រីបន្តថា «ពេលនោះ ខ្ញុំហាក់ងងុយគេង ប៉ុន្តែខ្ញុំបានឆ្លើយថា ដឹងហើយ ប៉ុន្តែតើខ្ញុំអាចសម្រាកមុនបានទេ? ខ្ញុំនឹងយកអ្នកត្រឡប់មកវិញ ខ្ញុំប្រាកដជានឹងយកអ្នកមកវិញ រួមទាំងអ្នកទាំងអស់គ្នាផងដែរ»។
អ្នកស្រី Apichada បានឲ្យដឹងគួរឲ្យព្រឺសម្បុរទៀតថា ខណៈសំឡេងនិយាយដដែលៗ សុំយកទៅផ្ទះ ក៏មានសំឡេងមនុស្សនិយាយ និងដើរជុំវិញខ្ញុំផងដែរ។ ក្នុងពេលនោះខ្ញុំសួរថា “តើអ្នកឈ្មោះអ្វី?” ស្ត្រីនោះឆ្លើយថា ខ្ញុំឈ្មោះ សោម ។
ទោះជាយ៉ាងនេះក្តី អ្នកស្រី Apichada មិនប្រាកដថាឈ្មោះសោម ពិតមែនឬអត់នោះទេ ប៉ុន្តែនាងនៅតែបានឆ្លើយថា “ខ្ញុំពិតជានឹងយកអ្នកមកវិញ កុំបារម្ភ ខ្ញុំនឹងយកអ្នកទាំងអស់មកវិញ។ ប៉ុន្តែពេលនេះខ្ញុំហត់ខ្លាំងហើយ តើខ្ញុំអាចគេងមុនបានទេ?»។
ពេលនោះ អ្នកស្រី Apichada នៅតែមានអារម្មណ៍ដូចជាមាននរណាម្នាក់ដើរជុំវិញតង់ រហូតទាល់តែនាងគេងមិនលក់។ ពេលនោះនាងមិនបានគិតអ្វីទេ ប៉ុន្តែនាងមិនអាចធ្វើចលនាបានឡើយ។ វាដូចជាភ្នែករបស់នាងបើកចំហ។ នាងនៅតែឃើញមិត្តភ័ក្តិកំពុងលេងទូរស័ព្ទ ប៉ុន្តែអ្នកនៅក្បែរនោះដេកលក់អស់ហើយ។ ទោះជាយ៉ាងណា ពេលភ្ញាក់ពីព្រលឹម នាងមិនប្រាប់អ្នកណាអំពីរឿងនេះទេ។
នាងគិតថា វាជាជំនឿផ្ទាល់ខ្លួន។ អ្នកខ្លះប្រហែលជាគិតថា នាងគិតច្រើនពេក ព្រោះនាងចង់ជួយអ្នករាល់គ្នាទៅផ្ទះ។ ប៉ុន្តែនាងមិនចង់ឱ្យមនុស្សគិតថានាងកំពុងស្រមៃនោះទេ។ តែយ៉ាងណា ក៏មានមនុស្សផ្សេងទៀត ដែលមានបទពិសោធន៍គួរឱ្យខ្លាចដូចគ្នាដែរ ដូចជាឃើញសាកសពពាក់កណ្តាល ជិះម៉ូតូ ហើយសួរនៅកន្លែងកើតហេតុ តើពួកគេកំពុងធ្វើអ្វីនៅទីនោះ!!៕
