ភ្នំពេញ ៖ លោក សំម ប្ញទ្ធីវាសនា តំណាងអយ្យការអមសាលាដំបូងរាជធានីភ្នំពេញ បានបញ្ជាក់ក្នុងអង្គសវនាការថា ទង្វើរបស់ជនជាប់និងបក្ខពួកទៅលើស្ត្រីដែលជាជនទេសចរណ៍បរទេស ពីសំណាក់ក្រុមជនដៃដល់មិនត្រឹមតែមានទោសទណ្ឌនូវកម្រិតឧក្រិដ្ឋប៉ុណ្ណោះទេ ប៉ុន្តែវាកាន់តែអាក្រក់ជាងនេះ វាបានធ្វើឲ្យប៉ះពាល់សម្បើមធំធេងដល់កិត្តិយសជាតិ និងប្រទេសលើវិស័យទេសចរណ៍។
ទោះបីជនត្រូវចោទបានព្យាយាមឆ្លើយដោះសារមិនទទួលខុសត្រូវនូវកំហុសរបស់ខ្លួនក៏ដោយ នៅទីបញ្ចប់នៃអង្គសវានាការនេះ លោកព្រះរាជអាជ្ញារង សំម ប្ញទ្ធីវាសនា បានសម្រេចតម្កល់បទចោទ “អំពើលួចមានស្ថានទម្ងន់ទោស “ទុកជាបានការ និងបានបានស្នើសុំចៅក្រុមក្រុមប្រឹក្សាក្នុងរឿងនេះ ផ្តន្ទាទោសនូវបទចោទដូចបានចោទប្រកាន់ខាងលើឲ្យបានធ្ងន់ធ្ងរ។
សវនាការលើសំណុំរឿងនេះ គេកត់សម្គាល់មានលោក ញឹម វិសាល ចៅក្រមសាលាដំបូងរាជធានីភ្នំពេញ ជាចៅក្រមប្រធានក្រុមប្រឹក្សារអមដោយចៅក្រមប្រឹក្សា២រូបទៀត និងមានលោក សំម ប្ទទ្ធីវាសនា ជាតំណាងអយ្យការ។
ក្រោយការបញ្ចប់ការសួរដេញដោលលើជនត្រូវចោទ តាត វណ្ណ: អមដោយមេធាវីការពារចំនួន៣រូបផងនោះ តុលាការបានសម្រេចលើកយកសំណៅរឿងនេះ ទៅប្រកាសសាលក្រមនៅថ្ងៃទី២៤ ខែមិថុនា ឆ្នាំ២០២៥ ខាងមុខ។
សូមរំលឹកថា កាលពីថ្ងៃទី១ ខែសីហា ឆ្នាំ២០២៤ វេលាម៉ោងប្រហែល១៤ និង០០នាទី កម្លាំងការិយាល័យជំនាញពព្រហ្មទណ្ឌ បានចុះទៅសហការជាមួយសមត្ថកិច្ចប៉ុស្តិ៍នគរបាលរដ្ឋបាលបឹងត្របែកហើយ ធ្វើការឃាត់ខ្លួនជនសង្ស័យម្នាក់ នៅចំណុចប៉ុស្តិ៍នគរបាលរដ្ឋបាលបឹងត្របែក សង្កាត់បឹងត្របែក ខណ្ឌចំការមន រាជធានីភ្នំពេញ ពាក់ព័ន្ធប្រព្រឹត្តបទល្មើស អំពើលួចមានស្ថានទម្ងន់ទោស និងបង្កឲ្យមានរបួសដោយអចេតនា ។
បើតាមលោកវរសេនីយ៍ឯក ម៉ម សាវន បញ្ជាក់ថា ជនសង្ស័យបើកម៉ូតូកង់បីផាសអេប បានដឹកជនរងគ្រោះទៅកន្លែងស្ងាត់ ដែលជនរងគ្រោះប្រាប់ឲ្យឈប់តែមិនព្រមឈប់ ដោយមានការភ័យជនរងគ្រោះបានលោតចុះពីលើម៉ូតូកង់បី បណ្តាលឲ្យរងរបួស ហើយក៏ត្រូវបក្ខពួក អ្នករត់ម៉ូតូកង់បី១ក្រុម ដែលនៅចាំទីនោះ បានធ្វើសកម្មភាពលួចយកសម្ភាររបស់ជនរងគ្រោះតែម្តងទៅ ប្រព្រឹត្តនៅចំណុចផ្លូវ០៥ ភូមិ១៤ ភូមិទួលរកា សង្កាត់ចាក់អង្រែក្រោម ខណ្ឌមានជ័យរាជធានីភ្នំពេញ កាលពីវេលាម៉ោងប្រហែល០៤ និង០០នាទីថ្ងៃទី៣១ ខែកក្កដា ឆ្នាំ២០២៤ ។
លោកបញ្ជាក់ទៀតថា ពេលចាប់ខ្លួនជនសង្ស័យ និងវត្ថុតាង ត្រូវបានបញ្ជូនមកការិយាល័យមកដល់នៅនារសៀលថ្ងៃដដែល ដើម្បីសាកសួរ និងចាត់ការតាមនីតិវិធី ។
ជនសង្ស័យរូបនេះ មានឈ្មោះ តាត វណ្ណៈ ភេទប្រុស អាយុ៣៥ឆ្នាំ មុខរបរអ្នករត់ម៉ូតូកង់បី មានទីលំនៅផ្ទះគ្មានលេខផ្លូវលំ ភូមិបារាជ ឃុំស្វាយជ្រុំ ស្រុកខ្សាច់កណ្តាល។
វត្ថុតាងចាប់យក រួមមាន ៖-ម៉ូតូកង់បី១គ្រឿង ម៉ាក BAJAJ 3W RE 4S LPG ពណ៌ក្រហម សេរីឆ្នាំ២០១៧ ពាក់ផ្លាកលេខកណ្តាល 1Z-8889 -ទូរសព្ទដៃ ម៉ាកវីវ៉ូ ពណ៌ទឹកមាស ១គ្រឿង -ទូរសព្ទ័ដៃ ម៉ាកសាំសុង ពណ៌ខ្មៅ ១ គ្រឿង ពាក់ព័ន្ធបទល្មើសខាងលើនេះ ។
ចំណែកជនរងគ្រោះមានឈ្មោះ P H N ភេទស្រី ជនជាតិកូរ៉េ កាន់លិខិត ស្នាក់នៅសណ្ឋាគារយូតៃ ផ្លូវលេខ២១៤ ភូមិ២ សង្កាត់បឹងរាំង ខណ្ឌដូនពេញ រាជធានីភ្នំពេញ ។
សម្ភារៈបាត់បង់ ៖.ទូរសព្ទដៃម៉ាកអាយហ្វូន១២ ចំនួន០១ គ្រឿង .កាតធនាគារ និងកូនសោសណ្ឋាគារ ។
ការឃាត់ខ្លួនជនសង្ស័យគឺយោងតាមពាក្យបណ្តឹងរបស់ជនរងគ្រោះ និងស្តាប់ចម្លើយជនសង្ស័យមានភាពស៊ីសង្វាក់ពាក់ពន្ធបទល្មើស “លួចមានស្ថានទម្ងន់ទោស” សមត្ថកិច្ចបានកសាងសំណុំរឿងបញ្ជូនជនសង្ស័យ និងវត្ថុតាង ទៅសាលដំបូងររាជធានីភ្នំពេញ ផ្តន្ទាទោសតាមច្បាប់៕ រក្សាសិទ្ធដោយ៖ CEN
