កំពង់ឆ្នាំង ៖ សម្ដេចធិបតី ហ៊ុន ម៉ាណែត÷បញ្ជាក់ជាថ្មីថា រឿងបើកច្រកព្រំដែន កម្ពុជាសុំតែ៣លក្ខខណ្ឌប៉ុណ្ណោះគឺ
-ទី១. ថៃប្រកាសបើកមុនជាឯកតោភាគី និងត្រូវអះអាងថាមិនប្រើប្រាស់វិធានការបិទជាឯកតោភាគីទៀតទេ។
-ទី២. ត្រូវបើកគ្រប់ច្រកទាំងអស់ និង -ទី៣. បើកឱ្យដូចស្ថានភាពមុនថ្ងៃទី៧ ខែមិថុនា ឆ្នាំ២០២៥។
ប្រសិនបើថៃអនុវត្ដបាន៣លក្ខខណ្ឌនេះ កម្ពុជានឹងបើកតាមក្រោយយ៉ាងយូរ៥ម៉ោង ប៉ុន្ដែបើថៃធ្វើមិនបានកម្ពុជាមិនលេងឆ្មាចាប់កណ្ដុរជាមួយឡើយ ព្រោះកម្ពុជាចង់បានដំណោះស្រាយច្បាស់លាស់ ហើយឈប់យកករណីបិទព្រំដែននេះធ្វើជាលក្ខខណ្ឌដោះស្រាយបញ្ហាតទៅទៀត ដែលវាប៉ះពាល់ដល់ប្រជាពលរដ្ឋទាំងសងខាង។
សម្ដេចបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា នៅព្រឹកថ្ងៃទី១៤ខែកក្កដាឆ្នាំ២០២៥នេះក្នុងឱកាសអញ្ជើញជាអធិបតី ក្នុងពិធីសម្ពោធដាក់ឱ្យប្រើប្រាស់សមិទ្ធផលនៃមជ្ឈមណ្ឌលហ្វឹកហ្វឺនកងរាជអាវុធហត្ថភ្នំជុំសែនរីករាយ និងអបអរសាទរ ខួបលើកទី៣២ ទិវាកងរាជអាវុធហត្ថ។
សម្តេចធិបតី ហ៊ុន ម៉ាណែត បានអះអាងថា ជំហររបស់កម្ពុជា គ្មានការប្រែប្រួលអ្វីនោះឡើយ ក្នុងដំណើរការប្តឹងទៅ ICJ។
ប្រមុខរដ្ឋាភិបាលបញ្ជាក់ថា ដំណើរប្តឹងទៅ ICJ មិនអាចធ្វើឡើងតាមបែបតក់ក្រហល់ដោយមិនគិតគូរគ្រប់ជ្រុងជ្រោយនោះឡើយ ហើយកម្ពុជាមានក្រុមអ្នកច្បាប់របស់ខ្លួនក្នុងការចាត់ចែងរឿងនេះ។
សម្តេច ហ៊ុន ម៉ាណែត បញ្ជាក់ថា ត្រង់ចំណុចទាំង៤ មិនអាចត្រូវរ៉ូវគ្នាតាមយន្តការទ្វេរភាគីឡើយ ព្រោះថៃតែងតែសម្រេចជាឯកតោភាគី។ សម្តេចមិនចង់ឱ្យរឿងរ៉ាវព្រំដែននេះ បន្តដល់កូនចៅជំនាន់ក្រោយនោះទេ ដូច្នេះ តុលាការយុត្តិធម៌អន្តរជាតិ ជាជម្រើសដ៏ល្អបំផុត។
សម្ដេចធិបតី នាយឧត្ដមសេនីយ៍ បានគូសបញ្ជាក់អំពីគម្រោងបង្កើនកញ្ចប់ថវិកាធ្វើទំនើបកម្មវិស័យការពារជាតិ និងបានគិតគូរអំពីវិស័យទ័ពអាកាសកម្ពុជា ដែលបច្ចុប្បន្នមានត្រឹមតែយន្តហោះស្លាប និងឧទ្ធម្ភាគចក្រប៉ុណ្ណោះ។
សម្ដេចធិបតី ថ្លែងជាសំណួរដូច្នេះ៖«ទ័ពអាកាស … យើងមានឧទ្ធម្ភាគចក្រ យន្តហោះស្លាប តើយើងត្រូវមានអ្វីទៀត? ដើម្បីស្របទៅតាមសំណូមពរភារកិច្ច បូកជាមួយធនធានដែលយើងមាន ត្រូវតែពិនិត្យ យើងធ្វើកំណែទម្រង់ ដើម្បីដាក់ទិសដៅនៅក្នុងហ្វឹកហ្វឺនបំពាក់ »៕ រក្សាសិទ្ធដោយ៖សុទ្ធលី
