អាជ្ញាធរខេត្តកណ្តាល បង្រាបក្រុមបើកល្បែងស៊ីសងប្រព័ន្ធអនឡាញខុសច្បាប់ ឃាត់ខ្លួនជនជាតិវៀតណាមចំនួន៧នាក់

ខេត្តកណ្ដាល៖ គណៈកម្មការចំពោះកិច្ចប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា (Online Scams) ដែលដឹកនាំដោយ ឯកឧត្តម ណុប ដារ៉ា អភិបាលរងខេត្តកណ្ដាល បានចុះពិនិត្យ និងបង្ក្រាបទីតាំងសង្ស័យមួយកន្លែង ដែលប្រើប្រាស់ជាកន្លែងឆបោកតាមអនឡាញ។ ប្រតិបត្តិការនេះបានធ្វើឡើងកាលពីវេលាម៉ោង ១៦និង៤០នាទីល្ងាច ថ្ងៃទី៣១ កក្កដា ២០២៥ នៅភូមិព្រែកសំរោង៣ សង្កាត់តាខ្មៅ ក្រុងតាខ្មៅ ក្នុងនោះ សមត្ថកិច្ចបានឃាត់ខ្លួនជនជាតិវៀតណាមចំនួន ៧នាក់ (ស្រី ២នាក់) រួមជាមួយវត្ថុតាងជាច្រើនទៀត។

ក្រោយការឆែកឆេរនិងពិនិត្យទីតាំង ក្រុមការងារបានរកឃើញវត្ថុតាងជាច្រើនរួមមាន៖ កុំព្យូទ័រចំនួន ២២គ្រឿង, ទូរសព្ទ័ដៃ ១៦គ្រឿង, លិខិតឆ្លងដែនវៀតណាម ៩លិខិត, អត្តសញ្ញាណបណ្ណវៀតណាម ១០សន្លឹក និងបណ្ណបើកបរ ២សន្លឹក។

តាមលទ្ធផលត្រួតពិនិត្យលើម៉ាស៊ីនកុំព្យូទ័រ ក្រុមជំនាញបានរកឃើញឯកសារណែនាំស្តីពីរបៀបសន្ទនាដើម្បីទាក់ទាញជនរងគ្រោះឲ្យជឿទុកចិត្ត និងឯកសារគ្រប់គ្រងគណនី Facebook ក្លែងក្លាយជាច្រើន ដែលបង្កើតឡើងក្នុងគោលបំណងឆបោកជនជាតិវៀតណាម។ សកម្មភាពរបស់ពួកគេគឺ ណែនាំជនរងគ្រោះឲ្យចូលធ្វើការក្រៅម៉ោងតាមអនឡាញនៅក្រុមហ៊ុនលក់ទឹកដោះគោម៉ាក Th Milk ដើម្បីរកប្រាក់ចំណូលតាមអនឡាញ។ លើសពីនេះ គេក៏រកឃើញការគ្រប់គ្រងគណនី Lotus chat សម្រាប់បម្រើការងារពាក់ព័ន្ធនឹងការបញ្ចូលលុយ និងដោះស្រាយបញ្ហាដើម្បីទទួលការចំណេញពីជនរងគ្រោះ។

បច្ចុប្បន្ន ជនជាតិវៀតណាមទាំង ៧នាក់ត្រូវបានប្រគល់ជូនអធិការនគរបាលក្រុងតាខ្មៅ ដើម្បីសួរនាំ ចំណែកវត្ថុតាងត្រូវបានរក្សាទុកនៅទីតាំងកើតហេតុ ដើម្បីរង់ចាំចំណាត់ការបន្តតាមនីតិវិធីច្បាប់ ៕រក្សាសិទ្ធដោយ៖សុទ្ធលី