កណ្ដាល ៖ លោក ស្វាយ តុញ ចៅក្រមសើបសួរសាលាដំបូងខេត្តកណ្តាល បានចេញដីកាឃុំខ្លួនគ្រូបង្រៀនម្នាក់នៅស្រុកកៀនស្វាយ ខេត្តកណ្តាល ដែលបង្គាប់ឲ្យសិស្សស្រីថតរូបអាក្រាតកាយជាថ្នូរបានពិន្ទុល្អ ដាក់ពន្ធនាគារជាបណ្តោះអាសន្ន។
សេចក្តីរាយការណ៍ពីសមត្ថកិច្ច បានឲ្យដឹងថា ជនត្រូវចោទឈ្មោះ ហឿន រ៉ាវី អាយុ៣៨ឆ្នាំ មុខរបរគ្រូបង្រៀនថ្នាក់ទី៩ និងទី១០ ផ្នែកគណិតវិទ្យា មានទីលំនៅភូមិកំពង់ស្វាយ២ ឃុំកំពង់ស្វាយ ស្រុកកៀនស្វាយ ខេត្តកណ្តាល។
គ្រូបង្រៀនរូបនេះ ត្រូវបានលោកស្រី ផាន់ សុគន្ធថង តំណាងអយ្យការអមសាលាដំបូងខេត្តកណ្តាល បានចោទប្រកាន់ពីបទ គំរាមកំហែងដោយមានបញ្ជាឱ្យបំពេញលក្ខខណ្ឌអ្វីមួយ និង រុកកួនខាងផ្លូវភេទ។ បទល្មើសនេះយោងតាមក្រមព្រហ្មទណ្ឌ មាត្រា២៣២ចែងដែលបានថា បទគំរាមកំហែងដោយមានបញ្ជាឱ្យបំពេញលក្ខខណ្ឌអ្វីមួយ ត្រូវផ្ដន្ទាទោសដាក់ពន្ធនាគារពី ៦ខែ ទៅ ២ឆ្នាំ និងពិន័យជាប្រាក់ពី ១លានរៀល ទៅ ៤លានរៀល។
សូមរំលឹកថា នៅថ្ងៃទី ២៤ ខែកក្កដា ឆ្នាំ ២០២៥ នេះ តាមប្រភពព័ត៌មានមួយបានបញ្ជាក់ឱ្យបានដឹងពីករណីសមត្ថកិច្ចស្រុកកៀនស្វាយ បានឃាត់ខ្លួនលោកគ្រូបង្រៀនម្នាក់នៅវិទ្យាល័យសិរីដីដុះ ឈ្មោះ ហឿន រ៉ាវី ដើម្បីបន្តនិតិវិធីករណីគំរាមបង្ហោះរូបភាព។
ទាក់ទិនទៅនឹងករណីនេះ តាមប្រភពព័ត៌មានបានបញ្ជាក់ឱ្យបានដឹងថា ក្រោយទទួលបានបណ្ដឹងរបស់អាណាព្យាបាលសិស្សឈ្មោៈ ជ.ម.ន.ហ្សា នៅថ្ងៃទី ២១ ខែកក្កដា ឆ្នាំ ២០២៥ មន្ត្រីជំនាញផ្នែកព្រហ្មទណ្ឌស្រុក បានស្រាវជ្រាវលើករណីគំរាមបង្ហោះរូបភាព និង ឆាត ទៅលើករណីលោកគ្រូបង្រៀនមួយរូប មានឈ្មោះ ហឿន រ៉ាវី ភេទប្រុស អាយុ ៣៨ ឆ្នាំ ជនជាតិខ្មែរ គ្រូបង្រៀនថ្នាក់ទី ៩-១០ ផ្នែកគណិតវិទ្យា មានទីលំនៅភូមិកំពង់ស្វាយ២ ឃុំកំពង់ស្វាយ ស្រុកកៀនស្វាយ ខេត្តកណ្តាល ខណៈកូនសិស្សមានឈ្មោះ ជ.ម.ន.ហ្សា ភេទស្រីអាយុ ១៥ ឆ្នាំ ជនជាតិខ្មែរ មុខរបរសិស្សថ្នាក់ទី ៩ មានទីលំនៅភូមិព្រែកស្វាយ ឃុំឈើទាល ស្រុកកៀនស្វាយ ខេត្តកណ្តាល។
ក្នុងនោះ បើតាមលទ្ធផលបឋមនៃការបំភ្លឺរបស់សិស្សស្រីឈ្មោៈ ជ.ម.ន.ហ្សា បានបំភ្លឺថា ជាធម្មតាខ្លួនតែងតែមានការរាយការណ៍ជូនលោកគ្រូធម្មតា តាមរយៈតេឡេក្រាម ឬ តាមឆាតពីការរៀនសូត្ររបស់សិស្សក្នុងថ្នាក់ព្រោះ ន.ហ គឺជាប្រធានថ្នាក់។ លុះដល់ពេលប្រលងមធ្យមសិក្សាបឋមភូមិថ្នាក់ទី ៩ រួច ន.ហ បានឆាតសួរលោកគ្រូ ហឿន រ៉ាវី អំពីលទ្ធផលប្រលង ពេលនោះលោកគ្រូបានប្រាប់ ន.ហ ថាឱ្យទៅមើលនៅផ្ទះលោកគ្រូ ន.ហ ក៏បានទៅដល់ផ្ទះលោកគ្រូឃើញបានពិន្ទុមធ្យម ពេលនោះលោកគ្រូបានប្រាប់ថាដាក់លុយយកពិន្ទុល្អ តែ ន.ហ មិនបានបង់លុយឡើយ ក៏ត្រឡប់មកផ្ទះវិញស្រាប់តែលោកគ្រូបានឆាតមកតាមរយៈ Messenger ទៅ ន.ហ ឱ្យថតរូបបែបសិចស៊ី ឱ្យលោកគ្រូមើលបើចង់បានពិន្ទុល្អ ខណៈពេល ន.ហ បានថតរូបស្លៀកពាក់រ៉ូបពណ៌សផ្ញើឱ្យលោកគ្រូខាងលើមើល លោកគ្រូរូបនេះបានប្រាប់ ន.ហ ថាឱ្យស្លៀកពាក់បែបសិចស៊ីវិញ ន.ហ ថាអត់មានខោអាវហ្នឹងទេ ក្រោយមក ន.ហ បាន Screenshot ផ្ញើទៅសួរមិត្តភក្ដិពីអត្ថន័យដែលខ្លួនឆាតជាមួយលោកគ្រូចង់ដឹងថា តើមានលោកគ្រូធ្វើចឹងដូចខ្លួនអត់ ទើបមានអាខោន ឡេង ប៊ុ.ន.ន.កញ្ញា/(Bunthon Kanha) យកទៅផុសទើបបែកធ្លាយករណីខាងលើនេះ។
តាមប្រភពបានឱ្យដឹងថា តាមការស្រាវជ្រាវរបស់ផ្នែកជំនាញបានបញ្ជាក់ថា លោកគ្រូ ហឿន រ៉ាវី ពិតជាបានប្រព្រឹត្តអំពើ ដូចខាងលើទៅលើសិស្ស ន.ហ មែនហើយក៏ធ្លាប់ប្រព្រឹត្តអំពើបែបនេះដាក់សិស្សស្រីផ្សេងទៀតដែរ ខណៈផ្នែកជំនាញកំពុងបន្តស្រាវជ្រាវលើករណីខាងលើ ខណៈបើតាមសំណូមពររបស់សិស្សឈ្មោះ ន.ហ នៅលើពាក្យបណ្តឹងសុំឱ្យនគរបាលចាត់ការទៅតាមផ្លូវច្បាប់៕ រក្សាសិទ្ធដោយ៖សុទ្ធលី
