ភ្នំពេញ ៖ ក្នុងដំណេីរទស្សនកិច្ច ពិនិត្យមើលការដាំស្រូវ និងអង្ករបាយឆ្ងាញ់របស់កម្ពុជា លោក Francisco P.Tiu Laurel រដ្ឋមន្រ្តីក្រសួងកសិកម្មននៃសាធារណរដ្ឋហ្វីលីពីន បានថ្លែងអំណរគុណដល់ លោក ឌិត ទីណា រដ្ឋមន្ត្រីក្រសួងកសិកម្មកម្ពុជា ដែលជាអ្នកដឹកនាំ និងជូនដំណើរទស្សនកិច្ច ហើយថា ការបង្ហាញអំពីស្រូវ-អង្ករកម្ពុជា ព្រមទាំងបច្ចេកទេសផលិត គឺជាការផ្តល់ធាតុចូលសំខាន់អំពីកសិផលសក្តានុពលកម្ពុជា មានគុណភាពល្អ និងរសជាតិឆ្ងាញ់ ដែលអាចនាំចូលទៅកាន់ទីផ្សារប្រទេសហ្វីលីពីនបាន និងជំរុញកសិ-ពាណិជ្ជកម្មនៃប្រទេសទាំងពីរ ពោលគឺ កំពុងស្ថិតក្នុងការពិចារណានាំចេញទៅកាន់ប្រទេសហ្វីលីពីន។
ការមើលឃើញ និងងវាយតម្លៃខ្ពស់ពីគុណភាពស្រូវ-អង្ករកម្ពុជានាពេលនេះពីសំណាក់ហ្វីលីពីន គឺធ្វើឡើងនៅថ្ងៃទី៩ ខែកញ្ញា ឆ្នាំ២០២៥ ក្នុងឱកាសដែល លោក ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានអញ្ជេីញនាំ លោក Francisco P.Tiu Laurel រដ្ឋមន្រ្តីក្រសួងកសិកម្មនៃសាធារណរដ្ឋហ្វីលីពីន បំពេញទស្សនកិច្ចនៅឯ ក្រុមហ៊ុន ខ្មែរហ្វ៊ូតគ្រុប និងសហគមន៍កសិកម្មទំនេីប ត្រាំកក់ ស្ថិតក្នុងខេត្តកំពង់ស្ពឺ និងខេត្តតាកែវ។
ក្នុងដំណេីរទស្សនកិច្ចនេះ លោករដ្ឋមន្រ្តីទាំងពីររូប និងគណៈប្រតិភូអមដំណេីរ បានចុះត្រួតពិនិត្យរោងម៉ាសុីនកិនស្រូវ ដឹងភ្លក់បាយដណ្ដាំពិអង្ករកម្ពុជា ហើយខាងភាគីហ្វីលីពីនទទួលស្គាល់ថា ពិតជាមានរសជាតិឆ្ងាញ់, ហើយខាងភាគីកម្ពុជា បានធ្វេីបទបង្ហាញផ្តោតសំខាន់ទៅលេីពូជស្រូវ ផ្ការំដួល សែនក្រអូប និងស្រងែ ជាពូជស្រូវក្នុងស្រុក ដាំដុះដោយសហគមន៍កសិកម្មទំនេីប ក្នុងតម្លៃតាមកិច្ចសន្យាផលិតកម្ម និងបានពិភាក្សាជាមួយតំណាងក្រុមហ៊ុនអំពីលទ្ធភាពជំរុញការនាំចេញអង្ករកម្ពុជា ទៅកាន់ទីផ្សារប្រទេសហ្វីលីពីនផងដែរ។
លោករដ្ឋមន្ត្រី ឌិត ទីណា បានអញ្ជេីញនាំគណៈប្រតិភូហ្វីលីពីន បន្តចុះត្រួតពិនិត្យកសិដ្ឋានបន្លែនៃសហគមន៍កសិកម្មទំនេីបត្រាំកក់ ដែលផ្តោតទៅលេីផលិតកម្មដំណាំបន្លែជាច្រេីនប្រភេទ រួមមាន : បន្លែស្លឹក ខាត់ណាដេីម ប៉េងប៉ោះ ឈេីរី ។ល។ ដែលមានតម្រូវការផងដែរ។
គួរបញ្ជាក់ថា បើតាមទិន្នន័យរបស់គេហទំព័រ Southeast Asia Statistic ដែលជាអ្នកកត់ត្រា និងតាមដានពីទិន្នន័យនានាក្នុងតំបន់អាស៊ាន និងក្រៅតំបន់ បានបង្ហាញរបាយការណ៍ថា កម្ពុជាជាប្រទេសនាំចេញអង្ករច្រើនជាងគេលំដាប់ថ្នាក់ទី១០ ក្នុងពិភពលោក កាលពីឆ្នាំ២០២៣ ជាមួយនឹងទំហំនាំចេញជិត ៦លានតោនក្នុងមួយឆ្នាំ។
អង្ករក្រអូបប្រណីតកម្ពុជា ម៉ាក «ម្លិះអង្គរ» បានឈ្នះពានរង្វាន់ ជា «អង្ករល្អប្រណីតផ្តាច់គេលើពិភពលោក» សាជាថ្មី ដែលត្រូវបានប្រកាសក្នុងសន្និសីទស្រូវ-អង្ករពិភពលោក នៅរដ្ឋធានីម៉ានីល ប្រទេសហ្វ៊ីលីពីន នាថ្ងៃទី៧ ខែវិច្ឆិកា ឆ្នាំ២០២៤នេះ។ សហព័ន្ធស្រូវអង្ករកម្ពុជា បានប្រកាសព័ត៌មាននេះ លើទំព័រហ្វេសប៊ុកផ្លូវការរបស់ខ្លួន ថា នេះជាលើកទី៦ហើយ ដែលអង្ករខ្មែរម៉ាក «ម្លិះអង្គរ» ជាប់ចំណាត់ថ្នាក់លេខ១ ជាអង្ករល្អជាងគេលើពិភពលោក (World Best Rice)។
សហព័ន្ធស្រូវអង្ករកម្ពុជា បានចាត់ទុកជោគជ័យនេះថា ជាគុណបំណាច់របស់រាជរដ្ឋាភិបាលកម្ពុជា ក្រុមការងារបច្ចេកទេស និងប្រជាកសិករ ដែលបានខិតខំឱ្យកម្ពុជា ប្រែពីប្រទេសខ្វះស្បៀងនៅទសវត្សរ៍ឆ្នាំ៧០ ដល់ទសវត្សរ៍៩០ ហើយក្លាយជាប្រទេសផលិត និងមានអតិរេកនាំចេញ។
ជាមួយគ្នានេះ ការនាំចេញអង្កររបស់កម្ពុជាទៅកាន់គោលដៅ មានជាង ៥២ប្រទេស និងតំបន់ ជាក់ស្តែងទីផ្សារធំៗមានដូចជា ៖ អាម៉េរិក ចិន ប្រទេសតំបន់អឺរ៉ុប អាស៊ី និងក្នុងតំបន់អាស៊ីអាគ្នេយ៍ជាដើម។ កម្ពុជា ក៏បាននាំអង្ករចេញទៅប្រទេសក្បែរខាងក្នុងតំបន់ផងដែរ៕ រក្សាសិទ្ធដោយ៖ពិសិដ្ឋ CEN
