ភ្នំពេញ ៖ ក្រុមហ៊ុន Air Cambodia ចាយជាង៣០០លានដុល្លារទិញយន្តហោះចិន C909 ចំនួន១០គ្រឿងបន្ថែមទៀតដើម្បីប្រើប្រាស់ការហោះហើរក្នុងស្រុក និងទៅកាន់អន្តរជាតិ។
ក្រុមហ៊ុនអាកាសចរណ៍ជាតិកម្ពុជា (Air Cambodia) បានចុះអនុស្សរណៈនៃការយោគយល់គ្នាជាមួយក្រុមហ៊ុនចិន Commercial Aircraft Corporation of China Ltd. (COMAC) អំពីការគ្រោងនឹងទិញយន្តហោះផលិតដោយប្រទេសចិន C909 regional ចំនួន ២០គ្រឿង ដែលជាផ្នែកមួយនៃកិច្ចសហប្រតិបត្តិការក្នុងវិស័យដែនអាកាសនៃប្រទេសទាំងពីរ ។
លោកឯកអគ្គរដ្ឋចិនប្រចាំនៅកម្ពុជា លោក Wang Wenbin កាលពីថ្ងៃទី១០ ខែសីហា បានសរសេរនៅលើបណ្តាញសង្គមផ្ទាល់ខ្លួនថា កាលពីថ្ងៃទី០៨ ខែកញ្ញា ក្រុមហ៊ុនអាកាសចរណ៍កម្ពុជា Air Cambodia និង ក្រុមហ៊ុនចិន Commercial Aircraft Corporation of China, Ltd.,(COMAC) បានអនុស្សរណៈនៃការយោគយល់គ្នា (MoU) អំពីការគ្រោងនឹងទិញយន្តហោះផលិតដោយប្រទេសចិនផ្ទាល់ គឺ C909 regional ចំនួន ២០គ្រឿង ដោយក្នុងនោះចំនួន ១០គ្រឿងបានបញ្ជាក់ការបញ្ជាទិញ និងចំនួន ១០គ្រឿងផ្សេងទៀតមានបំណងបញ្ជាទិញ ។
លោកលើកឡើងថា៖ «ភាគីទាំងពីរគ្រោងនឹងសហការគ្នាលើវិស័យការបញ្ជាទិញយន្តហោះ ការគាំទ្រប្រតិបត្តិការ និងបណ្ដុះបណ្ដាលផលិតកម្មជាដើម។ នេះគឺជាវឌ្ឍនភាពថ្មីនៃកិច្ចសហប្រតិបត្តិការក្នុងវិស័យដែនអាកាសនៃប្រទេសទាំងពីរ ដែលមានអត្ថប្រយោជន៍សំខាន់សម្រាប់ភាគីទាំងពីរ» ៕រក្សាសិទ្ធដោយ៖សុទ្ធលី
