ភ្នំពេញ ៖ នៅថ្ងៃសុក្រនេះ សហភាពអឺរ៉ុប បានចេញសេចក្តីប្រកាសព័ត៌មានឲ្យដឹងថា ដំណើរទស្សនកិច្ចអ្នកសារព័ត៌មានលើកទី ៣ នៃគម្រោងអភិវឌ្ឍន៍ជលផលក្រោយប្រមូលផល (CAPFISH-Capture) បានបញ្ចប់ដោយជោគជ័យ! យើងបានទៅទស្សនាសហគ្រាសកែច្នៃជលផលចំនួនប្រាំមួយ ដែលផ្ដោតលើសុវត្ថិភាពម្ហូបអាហារ និងការពង្រីកទីផ្សារ។
ចំនុចលេចធ្លោមួយក្នុងចំណោមភាពលេចធ្លោផ្សេងទៀតនោះ គឺការរួមបញ្ចូលសមសភាពយេនឌ័រ ដែលក្នុងនោះបុគ្គលិកស្ត្រីមានរហូតដល់ ៨០% នៃកម្លាំងពលកម្ម! ការលើកកម្ពស់ និងកំណើនស្រ្តីនៅក្នុងវិស័យវារីវប្បកម្មបែបនេះ ជាមូលហេតុដែលសហភាពអឺរ៉ុបតែងតែគាំទ្រនិងនៅទីនេះជាមួយអ្នក។
ម្ចាស់សិប្បកម្មទាំងនោះបានប្រាប់ឱ្យដឹងថា ដោយមានការគាំទ្រពីសហភាពអឺរ៉ុបតាមរយៈគម្រោងនេះ ពួកគេអាចសម្រេចបានលទ្ធផលក្នុងរយៈពេលដ៏ខ្លី ដែលពួកគេអាចនឹងត្រូវចំណាយពេលមួយទសវត្សរ៍ប្រសិនបើជាត្រូវស្វះស្វែងដោយខ្លួនឯង។
សហភាពអឺរ៉ុបរួមជាមួយនឹងតំណាងមកពី ក្រសួងកសិកម្ម រុក្ខាប្រមាញ់ និងនេសាទ, រដ្ឋបាលជលផល, និងអង្គការយូនីដូ យើងមានក្ដីសោមនស្សដែលការគាំទ្រនេះ បានផ្តល់ឱកាសការងារដល់ស្ត្រីនិងយុវជនដើម្បីប្រកបរបរចិញ្ចឹមជីវិត និងបង្កើនប្រាក់ចំណូល។
លោក អ៊ីហ្គ័រ ឌ្រីសមេន ឯកអគ្គរដ្ឋទូត ប្រតិភូសហ ប្រតិភូសហភាពអឺរ៉ុបប្រចាំកម្ពុជា បានថ្លែងក្នុងពិធីសម្ពោធសិប្បកម្មផលិត និងកែច្នៃផលិតផលជលផល ខនហ្វីរេល
ក្រោមកម្មវិធីទស្សនកិច្ចសិក្សា និងផ្សព្វផ្សាយសមិទ្ធផលរបស់គម្រោងអភិវឌ្ឍន៍ជលផលក្រោយប្រមូលផល CAPFISH-CAPTURE នៅថ្ងៃទី០៨ ខែកញ្ញា ឆ្នាំ២០២៥ វេលាម៉ោង ១៣:00 រសៀល នៅសិប្បកម្មផលិត និងកែច្នៃផលិតផលជលផល ខនហ្វីរេល ស្ថិតនៅភូមិបាក់ខែង សង្កាត់ព្រែកលៀប ខណ្ឌជ្រោយចង្វារ រាជធានីភ្នំពេញ។
លោក អ៊ីហ្គ័រ ឌ្រីសមេន បានថ្លែងអំណរគុណយ៉ាងជ្រាលជ្រៅចំពោះក្រសួងកសិកម្ម រុក្ខាប្រមាញ់ និងនេសាទ និងរដ្ឋបាលជលផលសម្រាប់ការរៀបចំព្រឹត្តិការណ៍ដ៏សំខាន់នេះនៅថ្ងៃនេះ។ វាជាព្រឹត្តិការណ៍ដ៏សំខាន់មួយសម្រាប់យើងធ្វើជាសាក្សីអំពីលទ្ធផលដែលទទួលបានពីការវិនិយោគ និងកិច្ចសហប្រតិបត្តិការរួមគ្នារបស់យើងក្នុងវិស័យជលផល និងកសិកម្ម។ ក្នុងនាមសហភាពអ៊ឺរ៉ុប វាជាកិត្តិយសណាស់ដែលសហភាពអឺរ៉ុបជាផ្នែកមួយនៃវឌ្ឍនភាពមួយនេះ និងបានសហការជាមួយក្រុមការងារ ទាំងពីក្រសួងកសិកម្ម រុក្ខាប្រមាញ់ និងនេសាទ និងពីអង្គការយូនីដូ។
ចាប់តាំងពីការចាប់ផ្តើមកម្មវិធីរបស់យើងជាមួយក្រសួង និងអង្គការ UNIDO យើងបានឃើញពីការផ្លាស់ប្តូរបន្តិចម្តងៗ ប៉ុន្តែប្រកបដោយស្ថេរភាពរបស់សហគ្រាសធុនតូច និងមធ្យមនៅកម្ពុជា។ គេប្រាប់ខ្ញុំថា សហគ្រាសធុនតូច និងមធ្យមនៅកម្ពុជាមានការវិវឌ្ឍគួរឲ្យចាប់អារម្មណ៍ ហើយថ្ងៃនេះ យើងបានឃើញថាការវិវឌ្ឍនេះនៅទីនេះ គឺនៅ Confirel។ សហគ្រាសធុនតូច និងមធ្យមនៅកម្ពុជាបន្តបង្ហាញពីសក្តានុពលនៃភាពច្នៃប្រឌិត គុណភាព និងផលិតភាព។ សហគ្រាសធុនតូច និងមធ្យមក្នុងវិស័យឧស្សាហកម្ម និងវិស័យកសិកម្មមិនខុសគ្នានោះទេ។ តាមពិតទៅ ខ្ញុំជឿថា ពួកគេកំពុងក្លាយជាក្បាលម៉ាស៊ីននៃការផ្លាស់ប្តូរយ៉ាងឆាប់រហ័ស ដោយងាកមកប្រើប្រាស់បច្ចេកវិទ្យាថ្មី និងការអនុវត្តដែលធន់នឹងអាកាសធាតុ។ សមិទ្ធផលនេះហាក់ដូចជាតូច ប៉ុន្តែបង្ហាញពីសក្តានុពលដ៏ធំធេងក្នុងការបំពេញតម្រូវការក្នុងស្រុក រួមចំណែកដល់ការរីកលូតលាស់បៃតងជាតិ និងជួយឲ្យកម្ពុជាអាចឈរជើងប្រកួតប្រជែងក្នុងទីផ្សារពិភពលោទៀត។
សហភាពអឺរ៉ុប មានមោទនភាពក្នុងការគាំទ្រកិច្ចខិតខំប្រឹងប្រែងនេះ និងចូលរួមចំណែកក្នុងការជំរុញការងារកែច្នៃក្នុងស្រុក បង្កើតការងារសមរម្យ និងលើកកម្ពស់ស្តង់ដារសុវត្ថិភាពម្ហូបអាហារខ្ពស់បំផុត ដែលជាការត្រួសត្រាយផ្លូវសម្រាប់ការនាំចេញកើនឡើង។
ដូចដែលយើងបានប្ររព្វពិធីនៅទីនេះថ្ងៃនេះ ខ្ញុំសង្ឃឹមថាយើងទាំងអស់គ្នាយល់ស្របថាគម្រោង CAPFISH បានសម្រេចបាននូវលទ្ធផលដ៏មានអត្ថន័យ និងយូរអង្វែង។ គម្រោងនេះ ជាគំនិតផ្តួចផ្តើមទ្វេភាគីដ៏ធំបំផុតដែលគាំទ្រថវិកាដោយសហភាពអឺរ៉ុបដើម្បីជួយដល់កម្ពុជា និងសហគ្រាសកែច្នៃផលិតផលជលផល គម្រោង CAPFISH បានជួយបំពេញតាមស្តង់ដារសុវត្ថិភាពម្ហូបអាហារជាតិ។ នេះជាលទ្ធផលបានធ្វើឲ្យផលិតផលក្នុងស្រុកទទួលបានការពេញនិយម ដោយជំនួសការនាំចូល និងជាសញ្ញានៃការរីកចម្រើនយ៉ាងឆាប់រហ័សក្នុងវិស័យ។ ជាមួយនឹងភាពអាចរកបាននៅក្នុងទីផ្សារក្នុងស្រុក និងស្តង់ដារសុវត្ថិភាពម្ហូបអាហារត្រូវបានបំពេញ សហគ្រាសជាច្រើនកំពុងស្វែងរកទីផ្សារអន្តរជាតិយ៉ាងសកម្ម ហើយឥឡូវនេះឧស្សាហកម្មនេះមានលក្ខខណ្ឌល្អគ្រប់គ្រាន់សម្រាប់ការធ្វើសវនកម្ម DG SANTE របស់សហភាពអឺរ៉ុបនាពេលខាងមុខ ដែលជាជំហានដ៏សំខាន់មួយឆ្ពោះទៅកាន់ទីផ្សារអឺរ៉ុប។
លោកបានថ្លែងបន្តទៀតថា ក្នុងបរិបទនេះ ខ្ញុំសូមអបអរសាទរចំពោះ Confirel សម្រាប់សមិទ្ធផលនាថ្ងៃនេះ។ ការពង្រីកអាជីវកម្មរបស់ Confirel គឺជាឧទាហរណ៍ដ៏ល្អឥតខ្ចោះនៃគំរូអាជីវកម្មរួមបញ្ចូល ដែលលើកទឹកចិត្តអ្នកផ្គត់ផ្គង់ខ្នាតតូចពីតំបន់ផលិតប្រហុកសៀមរាបដែលជាទំនិញសម្គាល់ភូមិសាស្ត្រថ្មី។ ផលិតផលម្សៅប្រហុករបស់ Confirel ជាការបង្ហាញឲ្យឃើញបែបទំនើបនៃផលិតផលប្រពៃណីដ៏ល្បីបំផុតរបស់កម្ពុជា។ ប្រហុក ដូចដែលយើងដឹងស្រាប់ហើយថាជានិមិត្តរូបនៃបេតិកភណ្ឌជាតិ និងអត្តសញ្ញាណម្ហូបខ្មែរ។
កម្មវិធីទស្សនកិច្ចសិក្សារ និងផ្សព្វផ្សាយរបស់គម្រោងក្រោមប្រធានបទ «គម្រោង CAPFISH-Capture នឹងបញ្ចប់ សមិទ្ធផលនៅតែបន្ត» ក៏ផ្តល់ជាវេទិកាមួយដើម្បីបង្ហាញពីសមិទ្ធផលរបស់កម្មវិធី CAPFISH របស់សហភាពអឺរ៉ុប។ កម្មវិធីនេះបានដើរតួនាទីយ៉ាងសំខាន់ក្នុងការធ្វើទំនើបកម្ម និងពង្រឹងវិស័យនេសាទរបស់កម្ពុជា។
ឥឡូវនេះមានកម្មវិធីថ្មីចំនួន ៣ របស់សហភាពអឺរ៉ុប កំពុងបន្តការគាំទ្រលើផ្នែកនេះ។ ពីរក្នុងចំណោមពួកគេគឺកម្មវិធី EU German CAPSAFE និង EU German GATE- កំពុងគាំទ្រក្រុមហ៊ុនក្នុងការបង្កើតតម្លៃបន្ថែមសម្រាប់ផលិតផលកសិកម្មក្នុងស្រុករបស់កម្ពុជា ដោយពង្រឹងការកែច្នៃក្នុងស្រុកសម្រាប់ផលិតផលដូចជាស្វាយចន្ទី និងម្រេច និងបំពេញតាមលក្ខខណ្ឌតម្រូវអន្តរជាតិដែលត្រូវការដើម្បីចូលទីផ្សារអន្តរជាតិដូចសហភាពអឺរ៉ុប។
លើសពីនេះទៀត តាមរយៈធនាគារវិនិយោគអ៊ឺរ៉ុប (European Investment Bank) សហភាពអឺរ៉ុបកំពុងគាំទ្រ ASPIRE AT ដែលជាកម្មវិធីដែលផ្តោតលើការពង្រឹងខ្សែសង្វាក់តម្លៃកសិកម្ម ការកែលម្អសន្តិសុខស្បៀង និងធ្វើឱ្យវាកាន់តែងាយស្រួលសម្រាប់កសិករ និងអ្នកផលិត ក្នុងការធ្វើពាណិជ្ជកម្មផលិតផលរបស់ពួកគេទាំងក្នុងប្រទេស និងក្រៅប្រទេស។
ការលើកកម្ពស់ផលិតផលជលផលកម្ពុជា សម្រាប់ទីផ្សារក្នុងស្រុក និងក្រៅស្រុក ពិតជាមានសារៈសំខាន់ណាស់ដើម្បីប្រើប្រាស់វិស័យនេះឱ្យអស់សក្តានុពល។ ជាមួយច្បាប់ជលផលដែលចូលជាធរមាន វិស័យជលផលស្ថិតនៅទីតាំងមួយដែលនឹងអាចទទួលបានកំណើនប្រកបដោយចីរភាព។ ដើម្បីសម្រេចបានអត្ថប្រយោជន៍នេះពេញលេញ ចាំបាច់ណាស់ត្រូវបង្កើតយន្តការមួយដែលមានលក្ខណៈពេញលេញ រឹងម៉ា និងអាចអនុវត្តលិខិតូបករណ៍ពាក់ព័ន្ធប្រកបដោយប្រសិទិ្ធភាព តាមការចង្អុលបង្ហាញរបស់ច្បាស់ស្តីពីជលផលថ្មី៕ រក្សាសិទ្ធដោយ៖សុទ្ធលី
