ភ្នំពេញ ៖ ក្រសួងកសិកម្មរុក្ខាប្រមាញ់និងនេសាទ បានឲ្យដឹងថា ដំណើរទស្សនកិច្ចសិក្សា និងផ្សព្វផ្សាយលើកទី៣ អំពីសមិទ្ធផលនៃការកែច្នៃផលិតផលជលផល នៅរាជធានីភ្នំពេញ ខេត្តកំពង់ធំ ខេត្តសៀមរាប និងខេត្តកំពង់ចាម ដែលរៀបចំធ្វើចាប់ពីថ្ងៃទី០៨ ដល់ថ្ងៃទី១១ ខែកញ្ញា ឆ្នាំ២០២៥ បានបិទបញ្ចប់ដោយជោគជ័យ ក្រោមការដឹកនាំពីលោកជំទាវ អ៊ឹម រចនា អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ។
អ្នកសារព័ត៌មាននិងអ្នកផលិតមាតិកាលើបណ្ដាញសង្គម ជាង៤០រូប បានទៅទស្សនានិងផលិតព័ត៌មានអំពីសហគ្រាសកែច្នៃផលិតផលជលផលចំនួន៦រួមមាន៖ ១.សិប្បកម្មកែច្នៃផលិតផលជលផល (ម៉្សៅប្រហុក) របស់ក្រុមហ៊ុនខនហ្វីរេល ២.សិប្បកម្មកែច្នៃផលិតផលជលផល ចាវ សួស្តី ៣. សិប្បកម្ម Sunny Fish Enterprise ៤.សិប្បកម្ម សំណាង សុធា ៥.សិប្បកម្ម យន់ ស៊ីនួន ៦.សិប្បកម្មកែច្នៃត្រីងៀត ផ្អក អ៊ីពៅ ដែលសិប្បកម្មទាំងនោះ ផ្ដោតលើការផលិតម្ហូបអាហារ ដែលមានសុវត្ថិភាព និងស្លាកសញ្ញាម៉ាកសម្គាល់ភូមិសាស្រ្តទំនិញ (GI)។
លោកជំទាវ អ៊ឹម រចនា បានសង្កត់ធ្ងន់ថា ការចូលរួមផ្សព្វផ្សាយពីបងប្អូនអ្នកសារព័ត៌មាន ដែលបានទៅដល់ទីតាំងសហគ្រាសផ្ទាល់ ជាពិសេសបានជួបសម្ភាសជាមួយម្ចាស់សហគ្រាសនិងសិប្បកម្ម ព្រមទាំងតួអង្គពាក់ព័ន្ធ គឺជាការចូលរួមចំណែកផ្ដល់ព័ត៌មានពិតនិងគ្រប់ជ្រុងជ្រោយជូនសាធារណជន ឱ្យស្គាល់កាន់តែច្បាស់ពីផលិតផលជលផលរបស់ខ្មែរ ដែលស្តង់ដា អនាម័យ ជាពិសេសធានាគុណភាព និងសុវត្ថិភាពចំណីអាហារសម្រាប់អ្នកទទួលទាន។
ក្រសួងកសិកម្ម រុក្ខាប្រមាញ់ និងនេសាទ សូមថ្លែងអំណរគុណយ៉ាងជ្រាលជ្រៅដល់ដៃគូពាក់ព័ន្ធទាំងអស់ ក្នុងការសហការរៀបចំដំណើរទស្សនកិច្ចសិក្សានេះឡើង ដែលរួមមាន៖ អង្គការ UNIDO រដ្ឋបាលជលផល ដោយទទួលបានការគាំទ្រហិរញ្ញប្បទានពីសហភាពអឺរុបប្រចាំនៅកម្ពុជា ព្រមទាំងអ្នកសារព័ត៌មាន និងអ្នកផលិតមាតិកាលើបណ្ដាញសង្គម ជាង៤០រូប ដែលបានចូលរួមដំណើរទស្សនកិច្ចនេះតាំងពីដើមរហូតដល់ចប់។
ក្រសួងជឿជាក់ថា ការផ្សព្វផ្សាយផលិតផលជលផលក្រោយប្រមូលផលនៅក្នុងដំណើរទស្សនកិច្ចរយៈពេល៤ថ្ងៃនេះ នឹងរួមចំណែកដល់ការអភិវឌ្ឍសហគ្រាសជលផលខ្នាតតូចនិងមធ្យមឲ្យកាន់តែរឹងមាំ ខណៈពេលដែលសហគ្រាសកែច្នៃផលិតផលទាំងនោះ ប្ដេជ្ញាចិត្តពង្រឹងផលិតកម្មរបស់ខ្លួន ដើម្បីផ្គត់ផ្គង់ផលិតផលស្តង់ដារដែលមានគុណភាពនិងសុវត្ថិភាព សម្រាប់បម្រើទីផ្សារក្នុងស្រុកផង និងឈានឆ្ពោះទៅកាន់ទីផ្សារក្រៅប្រទេសផង៕ រក្សាសិទ្ធដោយ៖សុទ្ធលី
