ស្រុកខ្សាច់កណ្តាល ៖ ករណីគ្រោះចរាចរណ៍រវាងម៉ូតូនឹងម៉ូតូ កើតហេតុថ្ងៃអាទិត្យ ទី១៦ ខែកញ្ញា ឆ្នាំ២០១៨ វេលាម៉ោង១៣ និង៣០នាទី នៅលើផ្លូវខេត្ត ៣៨០ ចំណុចភូមិស្វាយអាត់លើ ឃុំព្រែកតាមាក់ ស្រុកខ្សាច់កណ្ដាល ខេត្តកណ្ដាល បណ្តាលឲ្យស្លាប់ម្នាក់ និងរបួសម្នាក់។
នគរបាលស្រុកខ្សាច់កណ្តាល បានឲ្យដឹងថា បង្កឡើងដោយម៉ូតូមួយគ្រឿងម៉ាកHonda C125 ប្រភេទស្រី ពណ៌ខ្មៅ ពាក់ស្លាកលេខ ភ្នំពេញ1GE-9071 បើកបរដោយបុរសម្នាក់ ឈ្មោះមិនស្គាល់អត្តសញ្ញាណ រងរបួសធ្ងន់ បើកបរក្នុងទិសដៅពីត្បូងទៅជើង
លុះមកដល់ចំណុចកើតហេតុខាងលើ ម៉ូតូបានបុកជាមួយម៉ូតូមួយគ្រឿង ម៉ាកសង់កូរ៉េ C110 ពណ៌ក្រហម គ្មានស្លាកលេខ បើកបរដោយឈ្មោះប៊ន ចាន់ថុន ភេទប្រុស អាយុ៣១ឆ្នាំ នៅភូមិស្វាយអាត់ក្រោម ស្រុកខ្សាច់កណ្ដាល ខេត្តខេត្តកណ្ដាល ស្លាប់នៅកន្លែងកើតហេតុ បើកបរនៅក្នុងទិសដៅពីជើងទៅត្បូង។
នគរបាលមូលដ្ឋាន បានបន្ថែមថា មុនពេលកើតហេតុ ម៉ូតូមួយគ្រឿងម៉ាកHonda C125 ពណ៌ខ្មៅ ពាក់ស្លាកលេខ ភ្នំពេញ1GE-9071 ប្រភេទស្រី បានបើកបរនៅក្នុងទិសដៅបញ្ច្រាសទិសគ្នា បើកបរនៅក្នុងល្បឿនលឿន ខ្វះការប្រុងប្រយ័ត្ន។ ចំណែកជនរងគ្រោះ ត្រូវបានក្រុមគ្រួសារ បញ្ជូនទៅកាន់មន្ទីរពេទ្យភ្នំពេញ។ រីឯសពត្រូវបានសមត្ថកិច្ច ធ្វើកំណត់ហេតុ ប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី ចំពោះវត្ថុតាង ត្រូវបានសមត្ថកិច្ចជំនាញ យកមករក្សារទុក នៅអធិការនគរបាលស្រុក ចាត់ការតាមនីតិវិធីច្បាប់៕ ដោយ ៖ បញ្ញាស័ក្តិ
