ខេត្តកំពង់ចាម: ដើម្បីពង្រឹងសុខភាពរបស់ប្រជាពលរដ្ឋមន្ត្រីជំនាញនៃសាខាក.ប.ប បានសហការជាមួយនឹងមន្ត្រីមន្ទីរពាណិជ្ជកម្មខេត្តចុះពិនិត្យមើលរកប្រេងឆាក្លែងក្លាយចំនួន៥ម៉ាក ដែលធ្វើឲ្យប៉ះពាល់សុខភាព។តែតាមរយៈការចុមពិនិត្យរបស់មន្ត្រីជំនាញគិតរហូតមកដល់ល្ងាចថ្ងៃទី២៤តុលា ឆ្នាំ ២០២៥ មិនទាន់រកឃើញនៅផ្សារណាមួយក្នុងខេត្តកំពង់ចាម ចរាចរណ៍លក់ដូរនោះទេ។
លោកស៊ាន ស៊ីណាត ប្រធានអង្គភាពសាខាក.ប.ប មានប្រសាសន៍ឲ្យដឹងថា:
ក្រោយពីបានទទួលបទបញ្ជាពីស្ថាប័នជំនាញក្រសួងពាណិជ្ជកម្មក៏ដូចជាការណែនាំរបស់រដ្ឋបាលខេត្តបានឲ្យកម្លាំងជំនាញរបស់លោកបំពេញបេសកកម្មនៅតាមបណ្ដាស្រុកមួយចំនួនក្នុងខេត្តកំពង់ចាម នាពេលកន្លងទៅថ្មីៗ តែពេលចុះទៅដល់តូបលក់ដូររបស់បងប្អូនអាជីវករគឺរកប្រេងឆាចំនួន៥ម៉ាក ដែលជាប្រភេទប្រេងឆាក្លែងក្លាយនៅប្រទេសវៀតណាមដែលធ្វើឲ្យប៉ះពាល់សុខភាព តែពុំឃើញមានតូបលក់ដូរណាមួយលក់ប្រេងឆាទាំងនោះទេ។
មន្ត្រីជំនាញបានបន្តឲ្យដឹងទៀតថាកាលពីថ្ងៃទី២២តុលា ២០២៥ មន្រ្តីសាខា ក.ប.ប.ខេត្តកំពង់ចាមបានសហការជាមួយមន្រ្តីមន្ទីរពាណិជ្ជកម្មចុះត្រួតពិនិត្យទំនិញផលិតផលម្ហូបអាហារ និងស្វែងរកប្រេងឆាទាំងប្រាំប្រភេទដែលមានបញ្ហានៅប្រទេសវៀតណាម នៅផ្សារព្រែករំដេង និងផ្សារព្រែកដំបូក ស្រុកស្រីសន្ធរ តែជាលទ្ធផលរកពុំឃើញលក់នៅលើទីផ្សារឡើយ ។ដោយឡែកចំពោះផ្សារបឹងកុកនិងផ្សារធំក្រុងកំពង់ចាម ក្រុមមន្ត្រីជំនាញបានចុះស្វែងរកដោយយកចិត្តទុកដាក់តែរកមិនឃើញមាននោះឡើយ។
ការចុះត្រួតពិនិត្យនេះ ក្នុងគោលបំណងធានាការពារនូវសុខុមាលភាពជូនអ្នកប្រើប្រាស់ ទប់ស្កាត់ផលិតផលទំនិញមិនសមស្រប ពិសេស ផលិតផលម្ហូបអាហារដែលមិនអនុលោមតាមលក្ខខណ្ឌតម្រូវផ្នែកបច្ចេកទេស ឬមានកត្តាជាគ្រោះណាមួយ ធ្វើឱ្យប៉ះពាល់សុខភាពអ្នកប្រើប្រាស់ជាយថាហេតុ។
ទន្ទឹមនឹងនេះ អគ្គនាយកដ្ឋាន ក.ប.ប. នៃក្រសួងពាណិជ្ជកម្ម សូមអំពាវនាវដល់ប្រជាពលរដ្ឋបង្កើនការប្រុងប្រយ័ត្ន កុំទិញ លក់ ឬប្រើប្រាស់ផលិតផលប្រេងឆាដែលមានម៉ាកខាងលើ និងក្នុងករណីពើបប្រទះ សូមធ្វើការទំនាក់ទំនងតាមរយៈ CCF Complaint App, លេខទូរសព្ទ ១២៦៦ ដើម្បីមានវិធានការតាមនីតិវិធី ឱ្យបានទាន់ពេលវេលា៕ រក្សាសិទ្ធដោយ៖ភ្នំប្រុសភ្នំស្រី
