ភ្នំពេញ ៖ អ្នកនាំពាក្យក្រសួងកសិកម្ម បានស្នេីឱ្យកសិករផ្តល់អត្តសញ្ញាណ អ្នកម៉ៅផ្តាច់ទិញស្រូវតាមខេត្ត ដេីម្បីក្រសួង ចាត់វិធានការតាមផ្លូវច្បាប់។
ពាក់ព័ន្ធនឹងបញ្ហាស្រូវចុះថ្លៃបានក្លាយជាប្រធានបទដ៏ក្តៅគគុក នៅក្នុងបណ្តាញទំនាក់ទំនងសង្គមបច្ចុប្បន្ននេះ ហើយមូលហេតុតម្លៃធ្លាក់ចុះនេះ ត្រូវបានអ្នកជំនាញក្នុងវិស័យនេះអះអាងថា ដោយសារប្រទេសធំៗដែលទិញអង្ករច្រើនក្នុងពិភពលោកបានផ្អាកទិញអង្ករ។
បន្ថែមលើសពីនេះ ថ្មីៗនេះ ក៏មានលេចឮព័ត៌មានមកថាមាន អ្នកម៉ៅផ្តាច់ទិញស្រូវតាមខេត្ត ហើយក្រសួងកសិកម្ម បានអំពាវនាវឱ្យមានការផ្តល់អត្តសញ្ញាណអ្នកផ្តាច់មុខនោះ ដើម្បីក្រសួងចាត់វិធានការតាមផ្លូវច្បាប់ភ្លាមៗ។
បើតាមឯកឧត្តម ឃឹម ហ្វីណង់ អនុរដ្ឋលេខាធិការ និងជាអ្នកនាំពាក្យក្រសួងកសិកម្ម បានថ្លែងសារលើបណ្តាញសង្គមយ៉ាងដូច្នេះថា ” ក្រសួងកសិកម្មកំពុងផ្ទៀងផ្ទាត់ព័ត៌មានរឿងបែកធ្លាយថាមានអ្នកម៉ៅផ្តាច់ទិញស្រូវតាមខេត្ត។ សូមផ្តល់អត្តសញ្ញាណអ្នកផ្តាច់មុខនោះ ដើម្បីក្រសួងចាត់វិធានការតាមផ្លូវច្បាប់ភ្លាមៗ។ ក្រសួងតែងតែនៅជាមួយកសិករយើងជានិច្ច!”៕ រក្សាសិទ្ធដោយ៖សុទ្ធលី
