ស្ទើររៀងរាល់ឆ្នាំ ក្រោយការប្រមូលផលស្រូវ ប្រជាពលរដ្ឋតែងតែត្អូញត្អែរ ពីបញ្ហាតម្លៃលក់នៅលើទីផ្សារចុះថោក ដែលធ្វើឲ្យពួកគាត់ជួបការលំបាក។
ពាក់ព័ន្ធនឹងការលើកឡើងបែបនេះ លោកបណ្ឌិត គិន ភា ប្រធានវិទ្យាស្ថានទំនាក់ទំនងអន្តរជាតិនៃកម្ពុជា បានថ្លែងថា «រឿងស្រូវចុះថោក សុំកុំនាំគ្នាបន្ទោសតែក្រសួងកសិកម្ម, មានក្រសួង ស្ថាប័នពាក់ព័ន្ធនានាច្រើន ដែលអាចជួយគ្នាលើកស្ទួយកសិករ »។
តាមរយៈបណ្តាញសង្គមនាថ្ងៃអាទិត្យនេះ លោកបណ្ឌិត គិន ភា បញ្ជាក់ថា ៖ ក្រសួងកសិកម្មជួយរឿងបច្ចេកទេសនិងផែនការផលិត, ក្រសួងធនធានទឹកជួយរឿងធារាសាស្ត្រដើម្បីមានទឹកធ្វើស្រែ, ក្រសួងពាណិជ្ជកម្មជួយរកទីផ្សានិងតម្លៃស្រូវ/អង្ករ, ក្រសួងឧស្សាហកម្មជួយរឿងបច្ចេកទេសកែឆ្នៃ, ក្រុមប្រឹក្សាអភិវឌ្ឍន៍ជួយរកម៉ូយមកវិនិយោគ, រីឯអាជ្ញាធរមូលដ្ឋានឃុំ ស្រុក ខេត្ត ជួយតាមដានស្ថានភាពទូទៅរបស់បងប្អូនកសិករ និងជួយអន្តរាគមន៍ទាន់ពេលវេលាតាមសមត្ថកិច្ចរបស់ខ្លួន។
លោកបានបន្តទៀតថា ដោយឡែក សហព័ន្ធស្រូវអង្ករជួយមើលឈ្មួញទុចរិតបង្ខូចថ្លៃស្រូវ, ខណៈធនាគារអភិវឌ្ឍន៍ជនបទនិងកសិកម្ម ជួយផ្តល់កម្ចីការប្រាក់ទាប។ ចុះហេតុអីក៏នាំគ្នាចង្អុលមុខតែក្រសួងកសិកម្ម? ក្រសួង ស្ថាប័នពាក់ព័ន្ធដទៃទៀត ម៉េចក៏នាំគ្នាស្ងាត់មាត់យករួចខ្លួន? ឬក៏ត្រូវបញ្ចូលក្រសួងទាំងអស់ធ្វើជាក្រសួងតែមួយវិញ? ៕ រក្សាសិទ្ធដោយ៖សុទ្ធលី
