ភ្នំពេញ ៖ ឯកឧត្តមបណ្ឌិតឧកញ៉ា ម៉ុង ឫទ្ធី បានមានចម្ងល់ជាខ្លាំងចំពោះអ្នកយកលុយជាច្រេីនមកដាក់តម្រៀបថតបង្ហោះហ្វេសប៊ុក ថានិងយកលុយនេះមកជួយទិញស្រូវពីកសិករ តើពួកគាត់ធ្លាប់មានបទពិសោធន៍បច្ចេទេសលើមុខរបរនេះដែរឬអត់ទេ ហើយគាត់មានជាមូលដ្ឋានគ្រឹះដែរឬទេ?
ឧកញ៉ា ម៉ុង ឫទ្ធី បានសរសេរសារលើបណ្តាញសង្គមហ្វេសប៊ុកផ្លូវការនាព្រឹកថ្ងៃទី ០៦ ខែវិច្ឆិកា ឆ្នាំ ២០២៥ នេះថា “តាំងនាមរូបខ្ញុំ ជាអ្នកមានបទពិសោធន៍ ធ្វើពាណិជ្ជកម្មលើវិស័យ កសិកម្ម កសិឧស្សាហកម្ម អស់រយៈពេលជាង៣០ឆ្នាំកន្លមកហើយ រហូតមកដល់ពេលបច្ចុប្បន្ននេះ ក៏នៅតែបន្ត ប្រកបមុខរបរនេះដោយមិនបោះបង់
បើទោះបីជាត្រូវជួប ឧបសគ្គតូចធំ យ៉ាងណាក្ដី ចំពោះរឿងកសិផលឡើងថ្លៃ ចុះថ្លៃ វាជារឿងធម្មតា របស់ពិភពលោកនេះទៅហើយ យើងមិនអាចស្តីបន្ទោសបង្អាប់បង្ខូចកេរ្ដិ៍ឈ្មោះអ្នកណាបានទេ បើចំពោះរាជរដ្ឋាភិបាល ចង់ឱ្យតែប្រជាជន លក់កសិផល បានតម្លៃថ្លៃទេ។
និយាយដោយឡែក ជាបន្តបន្ទាប់ រហូតមកដល់ពេលបច្ចុប្បន្ននេះ ខ្ញុំបានជួយប្រមូលទិញកសិផលដូចជាពោត ដំឡូងមី កន្ទក់ ចុងអង្ករ ពេលខ្លះជួយទិញស្រូវស្រាល យកមកកិនជាសម្រូប ពីកសិករយើងប្រមាណជាជាង៤០លានដុល្លារ សហរដ្ឋអាមេរិកជារាងរាល់ឆ្នាំ សម្រាប់យកមកចូលរោងចក្រកែច្នៃធ្វើជាចំណីសត្វ ដោយមានសាយឡូនិងឃ្លាំងសម្រាប់ស្តុកគ្រាប់ធញ្ញជាតិសរុបប្របាណជា១០០,០០០សែនតោន ។
ខ្ញុំមានចម្ងល់ជាខ្លាំងចំពោះអ្នកយកលុយជាច្រេីនមកដាក់តម្រៀបថតបង្ហោះហ្វេសប៊ុក ថានិងយកលុយនេះមកជួយទិញស្រូវពីកសិករ តើពួកគាត់ធ្លាប់មានបទពិសោធន៍បច្ចេទេសលើមុខរបរនេះដែរឬអត់ទេ ហើយគាត់មានជាមូលដ្ឋានគ្រឹះ ដូចជាឡសម្ងួត សាយឡូ ឃ្លាំងស្តុក ម៉ាស៊ិនកិនស្រូវ និងមានទីផ្សារនៅទីណា?
អភ័យទោសផងខ្ញុំនិយាយនេះគ្រាន់តែជាទស្សនផ្ទាល់ខ្លួនតែប៉ុណ្ណឹងទេ”៕រក្សាសិទ្ធដោយ៖សុទ្ធលី
