“សប្តាហ៍ភាពយន្ត អន្តរជាតិឡានឆាង-មេគង្គលើកទី៧” ជាព្រឹត្តការណ៍ដ៏សំខាន់ ក្នុងការលើកកម្ពស់ចំណងមិត្តភាព និងកិច្ចសហប្រតិបត្តិការលើវិស័យ វប្បធម៌រវាង ប្រទេសក្នុងអនុតំបន់ ឡានឆាង-មេគង្គ

ភ្នំពេញ ៖ នាសៀលថ្ងៃទី២៨ ខែវិច្ឆិកា ឆ្នាំ២០២៥ ឯកឧត្ដម ហាប់ ទូច រដ្ឋលេខាធិការប្រចាំការតំណាងដ៏ខ្ពង់ខ្ពស់លោកជំទាវបណ្ឌិតសភាចារ្យរដ្ឋមន្ត្រីក្រសួងវប្បធម៌ និងវិចិត្រសិល្បៈ បានអញ្ជើញចូលរួមពិធីបើកសប្តាហ៍ភាពយន្តអន្តរជាតិមេគង្គ-ឡានឆាង លើកទី៧ ក្រោមប្រធានបទ “ទស្សនៈអន្តរជាតិ នៃភាពយន្តអំពីធម្មជាតិ និងមនុស្សជាតិ” ដែលរៀបចំឡើងនៅទីក្រុង Qujing ខេត្តយូណាន សាធារណរដ្ឋប្រជាមានិតចិន។ វត្តមានចូលរួមក្នុងឱកាសនោះរួមមាន លោក Qin Zhenggui អនុប្រធានរដ្ឋបាលភាពយន្តនៃសាធារណរដ្ឋប្រជាមានិតចិន លោក Zhai Youlong អនុប្រធានគណៈកម្មាធិការឃោសនានៃបក្សកុម្មុយនិស្តចិនប្រចាំខេត្តយូណាន និងជាប្រធានរដ្ឋបាលភាពយន្តខេត្ត ព្រមទាំងលោក លោកស្រីជាថ្នាក់ដឹកនាំនៃខេត្តយូណាន ថ្នាក់ដឹកនាំទីក្រុង Qujing ព្រមទាំងអ្នកជំនាញក្នុងវិស័យភាពយន្ត ផលិតករ តារាសម្តែងពីបណ្តាប្រទេសក្នុងអនុតំបន់មេគង្គឡានឆាងជាច្រើនរូប។

ការរៀបចំ“សប្តាហ៍ភាពយន្ត អន្តរជាតិឡានឆាង-មេគង្គលើកទី៧” នាពេលនេះ គឺជាព្រឹត្តការណ៍ដ៏សំខាន់ ក្នុងការលើកកម្ពស់ចំណងមិត្តភាព និងកិច្ចសហប្រតិបត្តិការលើវិស័យ វប្បធម៌រវាង ប្រទេសក្នុងអនុតំបន់ ឡានឆាង-មេគង្គ ជាពិសេសលើវិស័យភាពយន្ត និង ជាការផ្តល់ឱកាសសម្រាប់អ្នកដឹកនាំរឿង ផលិតករ សិល្បករ សិល្បការិនីនិង អ្នកដែលមាន អាជីពក្នុង វិស័យ ភាពយន្ត បានជួបជុំគ្នា ចែករំលែកចំណេះដឹង បទពិសោធន៍ពី គ្នា ទៅវិញទៅមក និងស្វែងរកឱកាសវិនិយោគថ្មីៗបន្ថែមទៀត ដើម្បីរួមចំណែកដល់ការអភិវឌ្ឍឧស្សាហកម្មភាពយន្ត និង វប្បធម៌នៃ ប្រទេសក្នុងអនុតំបន់នេះ។

កម្មវិធីសប្ដាហ៍ភាពយន្តអន្តរជាតិមេគង្គ-ឡានឆាង រៀបចំធ្វើចាប់ពីថ្ងៃទី២៧ ខែវិច្ឆិកា ដល់ថ្ងៃទី១ ខែធ្នូ ឆ្នាំ២០២៥ ដែលមានកម្មវិធីកិច្ចសន្ទនាផ្លាស់ប្តូរភាពយន្តមេគង្គឡានឆាង ការចាក់បញ្ចាំងភាពយន្តពីបណ្តាប្រទេសមេគង្គ-ឡានឆាង ដែលក្នុងនោះភាពយន្តកម្ពុជាចំនួន០២ចំណងជើង ត្រូវបានគណ:កម្មការរៀបចំជ្រើសរើសចាក់បញ្ចាំង គឺភាពយន្តរឿង ប្រវត្តិស្នេហ៍នាងនាថ របស់ផលិតកម្ម LD Pictures និងភាពយន្តរឿង ភូមិបុរាណ របស់ផលិតកម្ម Black Box។រក្សាសិទ្ធដោយ៖សុទ្ធលី