សិល្បករសញ្ជាតិអង់គ្លេស Anna Brownsted បានទម្លាក់កាក់ចំនួន១០០.០០០ទៅក្នុងសួនទឹកសាធារណៈមួយដែលត្រូវបានទុកចោលនៅCambridge ប្រទេសអង់គ្លេស នៅទិវាចុងសប្តាហ៍មួយ វាគឺស្នាដៃរៀបចំបំណងស្វែងយល់អត្តចរិតរបស់មនុស្ស។កាក់ទាំងនេះត្រូវបានគេ«បោសសម្អាត»ក្នុងអំឡុងពេលតែមួយថ្ងៃប៉ុណ្ណោះ ។
ជាក់ស្តែងប្រាក់កាក់ដែលមានតម្លៃប្រមាណ១.០០០ផោនអង់គ្លេសនេះត្រូវបានចាក់ចូលទៅក្នុងសួនទឹកមួយ Quayside, Cambridge, វេលាម៉ោង៨ព្រឹកថ្ងៃសោរ៍ ហើយតាមគម្រោងនោះគេនឹងទុកវានៅទីនោះរយៈពេល៤៨ម៉ោង។
ប៉ុន្ដែរហូតដល់ម៉ោង៩ព្រឹកថ្ងៃអាទិត្យ កាក់ប្រាក់ស្ទើរតែអាំងអស់ត្រូវបានគេយកទៅបាត់ ទោះបីជានៅជុំវិញសួនទឹកនេះមានស្លាកព្រមានប្រាប់ថាមានកាមេរ៉ាទូរទស្សន៍តាមឃ្លាំមើលក្ដី។
នៅក្រោមបាតសួនទឹកនេះមានកាក់ប្រាក់នៅសេសសល់តម្លៃប្រមាណ១,៦៦ផោនប៉ុណ្ណោះ ប៉ុន្តែចំពោះអ្នករៀបចំព្រឹត្តិការណ៍ខាងលើពុំបានចាត់ទុកថាវាជារឿងចោរកម្មទេ។ម្ចាស់គម្រោ ងAnna Brownsted ពោលថា កាក់ប្រាក់ដែលចាក់ចូលក្នុងសួនទឹកនេះទុកសម្រាប់ឱ្យគេ«ប្រព្រឹត្ត» អ្វីចំពោះវាក៏បាន តែនាងមានអារម្មណ៍ថាល្បឿននៃការបាត់កាក់ទាំងនេះពិតជាមិនធម្មតាទេ។
នាយកផ្នែកសិល្បៈDaniel Pitt និយាយថា ការពិសោធន៍នេះបានផ្ដល់នូវលទ្ធផលគួរឱ្យរំជើបរំជួល ហើយវានឹងនាំមកនូវការ ជជែកពិភាក្សាអំពីអត្តចរិតមនុស្ស ក៏ដូចជាប្រតិកម្មរបស់អ្នកដែលសម្លឹងឃើញហេតុការណ៍នេះ។
ប្រាក់កាក់ទាំងនោះមានទម្ងន់សរុប៣៥៦គីឡូក្រាម ផលិតឡើងអំពីស្ពាន់លោហៈនេះមានតម្លៃគួរសម ដូច្នេះការដែលមនុស្សមួយចំនួនទប់ចិត្តមិនបាន ពុំមែនជារឿងពិបាកយល់នោះទេ៕
សូយន