ឧត្តរមានជ័យ ៖ អ្នកលក់ការ៉េមម្នាក់ត្រូវរថយន្តបុកស្លាប់នៅថ្ងៃសុក្រ ទី២១ ខែកញ្ញា ឆ្នាំ២០១៨ វេលាម៉ោង១៥និង៥១នាទី នៅលើផ្លូវជាតិលេខ៦៨ ចន្លោះបង្គោលគីឡូមែត្រលេខ៧៧-៧៨ ស្ថិតនៅភូមិពុរ សង្កាត់សំរោង ក្រុងសំរោង ខេត្តឧត្តរមានជ័យ។
សមត្ថកិច្ចបានឱ្យដឹងថា មុនពេលកើតហេតុមានរថយន្តមួយគ្រឿង ម៉ាកកាមរី (បាឡែន) ពណ៌ស គ្មានស្លាកលេខ អ្នកបើកបររថយន្តបានរត់គេចខ្លួនបាត់ មិនស្គាល់អត្តសញ្ញាណ ។ រថយន្តកាមរី បានទិសដៅពីត្បូងទៅជើង ពេលមកដល់កន្លែងកើតហេតុ បានបុករ៉ឺម៉កម៉ូតូលក់ការ៉េម បណ្តាលឱ្យបុរសម្នាក់ ឈ្មោះប៉ាន់ វ៉ាន់ ភេទប្រុស អាយុ ៥២ឆ្នាំ មុខរបរលក់ការ៉ែម រស់នៅភូមិ ភ្នៀត សង្កាត់សំរោង ក្រុងសំរោង ខេត្តឧត្តរមានជ័យ (ស្លាប់នៅកន្លែងកើតហេតុ)។
ក្រោយកើតហេតុសាកសព បានប្រគល់ទៅឲ្យសាច់ញាតិ យកទៅធ្វើបុណ្យតាមប្រពៃណី ហើយកម្លាំងជំនាញ អធិការដ្ឋានក្រុងសំរោងបានវាស់វែង រួចហើយបានយកវត្ថុតាង ទាំងសងខាង ទៅរក្សាទុក នៅអធិការដ្ឋាននគរបានក្រុងសំរោង ៕ ដោយ ៖ បញ្ញាស័ក្តិ
