រថភ្លើងចេញពីក្រុងប៉េកាំងបានមកដល់ ! រថភ្លើងទីមួយក៏បានចាកចេញពីហុងកុងសំដៅចិនដីគោកដែរ នៅថ្ងៃអាទិត្យនេះពីស្ថានីយ West Kowloon ដ៏ធំទូលាយ ដ៏មហាទំនើប ដែលមានសមត្ថភាពទទួលអ្នកដំណើរបានដល់២សែននាក់ក្នុងមួយថ្ងៃ។
ថ្ងៃអាទិត្យទី ២៣កញ្ញានេះ ហុងកុងបានបើកស្ថានីយអយស្ម័យយានថ្មី ឈ្មោះថា West Kowloon ។ ជាស្ថានីយដ៏ធំ ដែលមានកម្មវត្ថុបើកទូលាយចរន្តធ្វើដំណើរតាមផ្លូវដែកឱ្យកាន់តែរលូន តភ្ជាប់កោះហុងកុង ជាអតីតដែនដីក្រោមអាណានិគមអង់គ្លេស ទៅរដ្ឋធានីប៉េកាំង តាមរយៈរថភ្លើងល្បឿនលឿនខ្សែថ្មី ក្នុងរយៈពេលតែ២ម៉ោង។
គម្រោងសាងសង់ដែលផ្តួចផ្តើមឡើងតាំងពីឆ្នាំ២០០៨ ដោយចំណាយថវិកាអស់ប្រមាណ៤ពាន់លានអឺរ៉ូ។ អ្នកដំណើរដំបូងៗបានសម្តែងការរីករាយចំពោះខ្សែរថភ្លើងថ្មី ដែលអនុញ្ញាតឱ្យពួកគេ ផ្លាស់ទីពីក្រុងដែនកោះ ទៅក្រុងដែនគោកក្នុងរយៈពេលតែពីរម៉ោង ទល់នឹងបីកន្លះ បើប្រៀបទៅនឹងមធ្យោបាយចាស់។
ប៉ុន្តែគម្រោងនេះ មានភាពចម្រូងចម្រាសខ្លាំង នៅពេលចាប់ដំណើរការដោយការបញ្ឈរការិយាល័យត្រួតពិនិត្យពន្ធគយ និងព្រំដែន នៅប្រមាណពីរបីម៉ែត្រពីស្ថានីយ ដែលបង្កបង្កើតឱ្យមានគំនិតគិតដល់ការវាតទីដី។ ពីព្រោះរដ្ឋាភិបាលហុងកុង សុខចិត្តចែករំលែកទីស្នាក់ការរបស់ខ្លួនកណ្តាលក្រុង ទៅឱ្យអាជ្ញាធរចិនគ្រប់គ្រងជាតំបន់ពិសេស ស្ថិតក្រោមអធិបតេយ្យភាពប៉េកាំង។ ភ្នាក់ងារសន្តិសុខចិន ត្រូវបានដាក់ពង្រាយនៅក្នុងតំបន់ពិសេសនៃស្ថានីយ។
ចេញផុតពីអាណានិគមអង់គ្លេសនៅឆ្នាំ១៩៩៧ ហុងកុងបានប្រគល់មកឱ្យចិន តែរក្សាប្រព័ន្ធដឹកនាំ និងច្បាប់ដាច់ដោយឡែក ខុសពីចិនដីគោក។ ប៉ុន្តែជាមួយនឹងការបង្កើតស្ថានីយរថភ្លើងថ្មី អ្នកវិភាគយល់ថា ការសាកល្បងបិទខ្ទប់សេរីភាព អាចនឹងមានឥទ្ធិពលកាន់ច្បាស់ ជាពិសេសសេរីភាពនៃការបញ្ចេញមតិ ព្រោះដោយជាក់ស្តែង កាសែត និងសៀវភៅដែលដាក់លក់នៅក្នុងស្ថានីយ មានកំរិតមិនដូចនៅកន្លែងនៃហុងកុងឡើយ។
សម្រាប់បក្សប្រឆាំងនិងអ្នកវិភាគ នេះជាចំណែកមួយនៃយុទ្ធសាស្ត្រនយោបាយដ៏ស្មុគស្មាញរបស់ចិន ដែលចង់ត្រួតត្រា និងកម្រិតសេរីភាពហុងកុង តាមរយៈរដ្ឋាភិបាលហុងកុងដែលគាំទ្រប៉េកាំង ឬដោយផ្ទាល់តែម្តង។ តាំងពីឆ្នាំមុនមក គេចិនសម្រុកខ្លាំងគួរឱ្យព្រួយបារម្ភ ខ្លាចតែទម្រង់កិច្ចព្រមព្រៀងចិន-អង់គ្លេស “ប្រទេសមួយប្រព័ន្ធដឹកនាំពីរ” មិនអាចធន់បានយូរ៕
សូយន