បុរីញូវយ៉ក សហរដ្ឋអាមេរិក៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានថ្លែងសុន្ទរកថា ប្រកបដោយអត្ថន័យបំផុត នៅក្នុងមហាសន្និបាតអង្គការសហប្រជាជាតិលើកទី៧៣ នៅបុរីញូវយ៉ក ហើយដែលទើបនឹងបញ្ចប់សុន្ទរកថា នៅវេលាម៉ោង១រំលងអធ្រាត្រ ឈានចូលព្រឹកថ្ងៃទី២៩ ខែកញ្ញា ឆ្នាំ២០១៨។
សម្តេចតេជោ បានថ្លែងថា ជូនបងប្អូនជនរួមជាតិពេលនេះ ខ្ញុំកំពុងអង្គុយនៅលើកៅអីកម្ពុជា ក្នុងមហាសន្និបាតអង្គការសហប្រជាជាតិលើកទី៧៣។ ថ្ងៃត្រង់នេះខ្ញុំនឹងឡើងថ្លែងសុន្ទរកថា និង ពេលល្ងាចខ្ញុំនឹងជួបអគ្គលេខាអង្គការសហប្រជាជាតិ។ ពាក្យខ្មែរថាដេញទាន់កុំជាន់កែង ប៉ុន្តែពួកបោកប្រាស់នៅកម្ពុជា ពិសេសទណ្ឌិតរត់ចោលគុក បើមិនជាន់កែងមិនរាងចាលទេ។
ឯណាទៅអាមេរិកមិនឲ្យជាន់ដី? ឯណាទៅដែលអសនៈ នៅអង្គការសហប្រជាជាតិត្រូវបានព្យូរ?
ឯណាទៅដែលគេមិនឲ្យប្រតិភូលោកហ៊ុន សែនចូលរួមប្រជុំ? អ្នកបោកប្រាស់គេគួរទៅរៀនថែមទៀត។ ឯអ្នកជឿគេបោកគួរមានការអៀនខ្មាសផងដែរ។ សូមជូនពរបងប្អូនជនរួមជាតិជួបតែសេចក្តីសុខ។
សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានលើកឡើងថា ប្រទេសមហាអំណាចមួយចំនួនកំពុងនឹងយក បញ្ហាសិទ្ធិមនុស្ស ធ្វើជាខែលបិទបាំងមហិច្ឆតា ពិសពុលរបស់ពួកគេ ក្នុងការជ្រៀតជ្រែកលើការងារផ្ទៃក្នុងរបស់ប្រទេសដទៃ។
បញ្ហាសិទ្ធិមនុស្ស និងការអនុវត្តន៍លទ្ធិប្រជាធិបតេយ្យ ត្រូវបានគេមើលឃើញជាបញ្ហាដ៏ពេញនិយម របស់ប្រទេសលោកសេរី រួមទាំងអាមេរិកផង តែងតែយកធ្វើជាលេស ដើម្បីធ្វើជាទណ្ឌកម្ម ឬឈានដល់ផ្តួលរំលំរបបដឹកនាំ នៅបណ្តាប្រទេសមួយចំនួនថែមទៀតផង។ នៅក្នុងប្រទេសកម្ពុជា នាពេលបច្ចុប្បន្ន ក៏ដូចគ្នាផងដែរ បញ្ហាគោរពសិទ្ធិមនុស្ស និងលទ្ធិប្រជាធិបតេយ្យនេះ ក្លាយទៅជាចំណោទបញ្ហាមួយ ដែលអាមេរិក និងលោកសេរីមួយចំនួនទៀត យកធ្វើបញ្ហាវាយប្រហារលើរាជរដ្ឋាភិបាលកម្ពុជា។
ពីក្នុងទីស្នាក់ការអង្គការសហប្រជាជាតិ ស្ថិតលើទឹកដីអាមេរិកនោះ សម្តេចតេជោ ហ៊ុន សែន បានលើកឡើងថា បញ្ហាសិទ្ធិមនុស្សនាពេលបច្ចុប្បន្ននេះ បានក្លាយទៅជា បេសកកម្មដើម្បីបំពាក់អរិយធម៌ សម្រាប់ប្រទេសមានអំណាចមួយចំនួន ឬ ក៏អាចនិយាយបានថា ជានិយាមប្រតិបត្តិថ្មីដែលគេយកធ្វើជាលេស សម្រាប់លូកដៃជ្រៀតជ្រែកការងារផ្ទៃក្នុងរបស់ប្រទេសដទៃ។
សម្តេចតេជោ បានថ្លែងបញ្ជាក់ដូច្នេះ “ការដាក់ទណ្ឌកម្មជាឯកតោភាគី បានក្លាយទៅជាអាវុធដ៏ពេញនិយម នៃប្រទេសមហាអំណាច នៅក្នុងការគ្រប់គ្រងនយោបាយអន្តរជាតិ ដែលស្ថិតនៅក្រោមរបៀបវារៈភូមិសាស្ត្រនយោបាយ។ ទាំងនេះ គឺគ្មានអ្វីក្រៅពីការប្រើអំណាច ដោយកម្រោលរបស់រដ្ឋមួយ ដើម្បីបន្តុបឆន្ទៈរបស់ខ្លួន ទៅលើរដ្ឋអធិបតេយ្យដទៃនោះឡើយ”។
សម្តេចប្រមុខរាជរដ្ឋាភិបាលកម្ពុជា បានលើកឡើងថា សម័យកាលចក្រពត្តិនិយម និងអាណានិគមនិយមសម្រាប់ពិភពលោក វាបានក្លាយទៅជាព្រឹត្តិការណ៍ប្រវត្តិសាស្ត្រទៅហើយ។ ដូច្នេះប្រទេសធំៗ មិនគួរដាក់បន្តុបប្រព័ន្ធគ្រប់គ្រងរដ្ឋបាលរបស់ពួកគេ មកលើប្រទេសនានា ដែលតូចជាងខ្លួននោះឡើយ ព្រោះប្រទេសតូចៗទាំងនេះ ក៏មានអធិបតេយ្យភាព និងមានសេចក្តីប្រាថ្នាស្របច្បាប់ ក្នុងការរក្សានូវអត្តសញ្ញាណរបស់ខ្លួន។
សម្តេចនាយករដ្ឋមន្ត្រី បានគូសបញ្ជាក់ដែរថា សម័យកាលបច្ចុប្បន្ននេះ ជាសម័យកាលដែលប្រទេសទាំងអស់ នៅលើពិភពលោកពឹងផ្អែកគ្នាទៅវិញទៅមក ហើយផ្នត់គំនិតចាប់បង្ខំដ៏ចាស់គំរិលនោះ គួរតែត្រូវបានបានបញ្ចប់។ សម្តេចតេជោ ហ៊ុន សែន បានសង្កត់ធ្ងន់ថា ប្រទេសតូច ប្រទេសធំ ត្រូវតែរួមគ្នាគោរព និងលើកតម្កើងវិធាននៃច្បាប់អន្តរចាតិ និងធម្មនុញ្ញអង្គការសហប្រជាជាតិ ដែលចែងពីការគោរពគ្នា និងមិនជ្រៀតជ្រែកគ្នានោះ ។
សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានថ្លែងទៅកាន់អង្គការសហប្រជាជាតិថា ព្រោះតែមហិច្ឆតាជ្រៀតជ្រែកកិច្ចការផ្ទៃក្នុងរបស់កម្ពុជា មជ្ឈដ្ឋានខាងក្រៅបន្តធ្វើជាមើលមិនឃើញនូវគុណភាព និងសុច្ចរិតភាពនៃការបោះឆ្នោតនៅកម្ពុជា។ សម្តេចតេជោ បានប្រាប់ទៅវេទិកាអន្តរជាតិមួយនេះថា ការព្យាយាមមិនទទួលស្គាល់លើការបោះឆ្នោតនេះ ជាការប្រមាថដ៏ធ្ងន់ធ្ងរ លើឆន្ទៈរបស់ប្រជាពលរដ្ឋខ្មែរ។
នៅចំពោះមុខមន្ត្រីអង្គការសហប្រជាជាតិ និងមេដឹកនាំបណ្តាប្រទេសនានា ដែលបានចូលរួមក្នុងមហាសន្និបាតអង្គការសហប្រជាជាតិនោះ សម្តេចនាយករដ្ឋមន្ត្រី បានលើកបង្ហាញពីដំណើរការបោះឆ្នោតជ្រើសតាំងតំណាងរាស្ត្រនីតិកាលទី៦ ធ្វើឡើងការពីថ្ងៃទី២៩ ខែកក្កដា ឆ្នាំ២០១៨កន្លងទៅប្រកបដោយភាពល្អប្រសើរ។
សម្តេចតេជោ បានថ្លែងថា ការបោះឆ្នោតកន្លងទៅមានប្រជាពលរដ្ឋ ចេញទៅបោះឆ្នោតជិត ៧លាននាក់ ឬស្មើនឹង ៨៣,០២ភាគរយ នៃចំនួនអ្នកចុះឈ្មោះបោះឆ្នោតសរុប។ សម្តេចនាយករដ្ឋមន្ត្រី បានបន្ថែមទៀតថា ប្រជាព លរដ្ឋកម្ពុជា បានចេញទៅបោះឆ្នោត និងបានសម្រេចយកនូវជម្រើស នយោបាយរបស់ពួកគេដោយសេរី និងដោយគ្មានការបង្ខិតបង្ខំ ឬ ការគំរាមកំហែង ឬអំពើហិង្សាណាមួយនោះឡើយ។
សម្តេចតេជោ ហ៊ុន សែន បានលើកឡើងផងដែរថា គណបក្សនយោបាយចំនួន២០ បានចូលរួមប្រកួតប្រជែងក្នុងការបោះឆ្នោត ដែលជាការបង្ហាញយ៉ាងច្បាស់ នូវភាពជាតំណាងស្របច្បាប់ នៃនយោយបាយពហុនិយម និងឆ្លុះបញ្ចាំងនូវអ្វីដែលអ្នកសង្កេតការណ៍ជាតិ និងអន្តរជាតិរាប់ម៉ឺននាក់ បានបរិយាយថា ជាដំណើរការលទ្ធិប្រជាធិបតេយ្យប្រកបដោយស្ថិរភាពនៅកម្ពុជា និងជាការបោះឆ្នោតមានលក្ខណៈសេរី យុត្តិធម៌ និងអាចជឿទុកចិត្តបាន។ តាមរយៈសន្លឹកឆ្នោតរបស់ពួកគេ ប្រជាជនកម្ពុជា បានបញ្ជាក់ជាថ្មីទៀត នូវបំណងប្រាថ្នាចង់បាននូវសុខសន្តិភាព ស្ថិរភាព និងការអភិវឌ្ឍប្រកបដោយចីរភាពជាប់មិនដាច់។ ជាការពិតជម្រើសដោយសេរីរបស់ប្រជាជនកម្ពុជា និងលទ្ធផលប្រកបដោយធម្មានុរូបនៃការបោះឆ្នោតនេះ មិនមែនជាប្រធានបទដែលត្រូវចោទសួរ ឬពិភាក្សាដេញដោលនោះទេ។
សម្តេចតេជោ ហ៊ុន សែន ក៏បានលើកឡើងដែរថា បើទោះបីការបោះឆ្នោតនេះ បានប្រព្រឹត្តទៅក្នុងស្ថានភាពល្អប្រសើរយ៉ាងណាក្តី តែក៏នៅតែមានមជ្ឈដ្ឋានអន្តរជាតិមួយចំនួន ដែលប៉ុនប៉ងជ្រៀតជ្រែកការងារផ្ទៃក្នុងរបស់កម្ពុជា នៅតែធ្វើជាមើលមិនឃើញ នូវភាពល្អប្រសើរនៃការបោះឆ្នោតនេះ។
សម្តេចតេជោ ហ៊ុន សែន បានថា មជ្ឈដ្ឋានខាងក្រៅមួយចំនួន ដែលចិញ្ចឹមជាប់នូវមហិច្ឆតាប៉ុនប៉ងជ្រៀតជ្រែក ចូលកិច្ចការផ្ទៃក្នុងរបស់កម្ពុជា នៅតែធ្វើជាមើលមិនឃើញនូវគុណភាព និងសុចរិតភាពនៃដំណើរការបោះឆ្នោត របស់យើងតាមរយៈការចេញ សេចក្តីថ្លែងការណ៍នានា ប្រឆាំងនឹង ឬ វាយប្រហារលើលទ្ធផលបោះឆ្នោតនេះ ដែលទង្វើនេះ គឺជាការប្រមាថធ្ងន់ធ្ងរចំពោះឆន្ទៈរបស់ប្រជាជនកម្ពុជា៕ ដោយ ៖ កូឡាប
ខាងក្រោមនេះជាទិដ្ឋាភាពទាំងស្រុង ដែលសម្តេចតេជោ នាយករដ្ឋមន្ត្រីកម្ពុជា ឡើងថ្លែងសុន្ទកថានៅការិយាល័យអង្គការសហប្រជាជាតិ៖
