ទីក្រុងបុស្តុន រដ្ឋម៉ាស្សាជូសេដ ៖ កាលពីថ្ងៃទី ២៨ កញ្ញា ២០១៨(ម៉ោងនៅញ៉ូវយក សហរដ្ឋអាមេរិក) នៅសណ្ឋាគារហ៊ីលថុន សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងតំណាង ក្រុមហ៊ុន GE Global Growth និងបានអញ្ជើញជាអធិបតីដ៏ខ្ពង់ខ្ពស់ នៅក្នុងពិធីចុះហត្ថលេខាស្តីពីការវះកាត់ប្រកបដោយសុវត្ថិភាពឆ្នាំ ២០២០ រវាងកម្ពុជានិងមូលនិធិ GE។
សម្តេចតេជោនាយករដ្ឋមន្ត្រីបានវាយតម្លៃខ្ពស់ និងកោតសរសើរចំពោះក្រុមហ៊ុន GE Global Growth ដែលតែងតែមានសហប្រតិបត្តិការល្អជាមួយរាជរដ្ឋាភិបាលកម្ពុជាលើបញ្ហាសុខភាពរបស់ប្រជាជន។ សម្តេចតេជោនាយករដ្ឋមន្ត្រី និងតំណាងក្រុមហ៊ុន GE Global Growth បានពិភាក្សាគ្នាយ៉ាងយកចិត្តទុកដាក់ទៅលើការបន្តកិច្ចខិតខំប្រឹងប្រែងរួមគ្នាក្នុងការពង្រឹង និងពង្រីកកិច្ចសហប្រតិបត្តិការលើការគាំពារសុខុមាលភាពនៅក្នុងប្រទេសកម្ពុជា។
បន្ទាប់មក សម្តេចតេជោ ហ៊ុន សែន បានអញ្ជើញជាអធិបតីដ៏ខ្ពង់ខ្ពស់នៅក្នុងពិធីចុះហត្ថលេខាលើស្តីពីការវះកាត់ប្រកបដោយសុវត្តិភាព ឆ្នាំ២០២០ រវាងកម្ពុជា និងមូលនិធិ GE ដែលចុះហត្ថលេខា ដោយ លោក អ៊ុច បូរិទ្ធ រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ និងតំណាងក្រុមហ៊ុន GE Global Growth ដែលនឹងបង្កើនការជួយជាបន្តទៀតដល់ប្រទេសកម្ពុជា ជា ពិសេសលើការបណ្តុះបណ្តាល និងការកសាងសមត្ថភាពធនធានមនុស្សលើបច្ចេកទេសនៃការវះកាត់ប្រកបដោយសុវត្ថិភាព។
សូមបញ្ជាក់ថា មូលនិធិ GE គាំទ្រការពង្រីក កម្មវិធីវះកាត់ដោយសុវត្ថិភាពឆ្នាំ២០២០ (SAFE SURGERY 2020) ទៅក្នុងតំបន់អាស៊ី អាគ្នេយ៍ជាមួយថវិកា 25លានដុល្លារ ចំពោះការវះកាត់ប្រកបដោយសុវត្ថិភាពជាសកល។ កម្មវិធី ការវះកាត់ប្រកបដោយសុវត្ថិភាព ឆ្នាំ២០២០ នឹងពង្រីកការទទួលបានសេវាវះកាត់ប្រកបដោយសុវត្ថិភាព គុណភាព និងតំលៃសមរម្យនៅទូទាំងតំបន់អាស៊ីអាគ្នេយ៍។
មូលនិធិ GE ប្រកាសជាផ្នែកចុងក្រោយជាមួយថវិការ 25 លានដុល្លាររបស់ខ្លួន ចំពោះការវះកាត់ប្រកបដោយសុវត្ថិភាពទូទាំងពិភពលោក ដោយ គាំទ្រកម្មវិធីវះកាត់ប្រកបដោយសុវត្ថិភាពឆ្នាំ២០២០ ទៅក្នុងតំបន់អាស៊ីអាគ្នេយ៍មាន ប្រទេសកម្ពុជា និងសាធារណរដ្ឋប្រជាមានិតប្រជាធិបតេយ្យឡាវ ជាដើម។ ការវិនិយោគនេះមានសារសំខាន់ក្នុង ការពន្លឿនការទទួលបានសេវា វះកាត់នៅតំបន់អាស៊ីអាគ្នេយ៍ ខណៈដែលតំបន់ នេះមានកម្រិតនៃការវះកាត់ទាបបំផុតមួយនៅក្នុងពិភពលោក ដែលបច្ចុប្បន្ន ៩៧ភាគរយ នៃប្រជាជនក្នុងតំបន់មិនអាចទទួលបាន ការវះកាត់ដោយសុវត្ថិភាព។
នៅក្នុងសម័យប្រជុំលើកទី 73 នៃមហាសន្និបាតអង្គការសហប្រជាជាតិ មូលនិធិ GE បានសហការជាផ្លូវការជាមួយក្រសួង សុខា ភិបាលកម្ពុជា ដើម្បីពង្រឹងប្រព័ន្ធវះកាត់ តាមរយៈកម្មវិធីវះកាត់ប្រកបដោយសុវត្ថិភាពឆ្នាំ២០២០ លើការអភិវឌ្ឍធនធានមនុស្ស និងការគាំទ្រផ្នែកសម្ភារបរិក្ខាវេជ្ជសាស្ត្រ។ វះកាត់ប្រកបដោយសុវត្ថិភាពឆ្នាំ២០២០នេះ នឹងសហការជាមួយមន្ទីរពេទ្យ កាល់ម៉ែត និងសាកលវិទ្យាល័យវិទ្យាសាស្ត្រសុខាភិបាល ដើម្បីបង្កើតមជ្ឈមណ្ឌល បណ្តុះបណ្តាលមួ ដែលនឹងអភិវឌ្ឍធនធានជំនាញផ្នែកវះកាត់។
កម្មវិធីវះកាត់ប្រកបដោយសុវត្ថិភាពឆ្នាំ២០២០ កំពុងពង្រឹងមូលដ្ឋានគ្រឹះនៃប្រព័ន្ធវះកាត់ ដើម្បីផ្តល់ការវះកាត់សំខាន់ៗ ប្រកប ដោយសុវត្ថិភាព និងទូលំទូលាយ។ លោក Ann Klee ប្រធានមូលនិធិ GE បានលើកឡើងថា “គំនិតផ្តួចផ្តើមនេះនឹងផ្តោតទៅ លើការកសាងសមត្ថភាពស្ថាប័នរបស់កម្ពុជា ដើម្បីបន្តកែលម្អការវះកាត់យូរ អង្វែង នៅក្នុងពេលអនាគត”។ “រដ្ឋាភិបាលកម្ពុជា ប្តេជ្ញាលើកកម្ពស់គុណភាព និងបង្កើនលទ្ធភាពទទួលបានការថែទាំសុខភាពនៅក្នុងប្រទេស ហើយមូលនិធិ GE រីករាយក្នុង ការសហការជាមួយក្រសួងសុខ ភិបាល ដើម្បីលើកកម្ពស់ផ្នែកវះកាត់នេះ។”
លោកសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាលកម្ពុជាបានលើកឡើងថា៖ “យើងមានក្តីរំភើបរីករាយដែលត្រូវ បានជ្រើសរើសជាប្រទេសដំបូងគេនៅអាស៊ីអាគ្នេយ៍ដើម្បីដំណើរការកម្មវិធីវះកាត់ប្រកបដោយសុវតិ្ថភាពនេះ។ វាផ្តល់នូវ ឱកាសបណ្តុះ បណ្តាលថ្មី សម្រាប់ក្រុមគ្រូពេទ្យវះកាត់បច្ចុប្បន្នរបស់យើង។ កម្មវិធីនេះក៏នឹងគាំទ្របន្ថែមទៀតហើយសង្ឃឹម ថានឹងពន្លឿនការដាក់ឱ្យអនុវត្តនូវកម្មវិធីធានារ៉ាប់រងសុខភាពសាកលនាពេលអនាគតខាមុខនេះ។
“កម្មវិធីវះកាត់ប្រកបដោយសុវត្ថិភាពឆ្នាំ 2020 ត្រូវបានបង្កើតឡើងនៅឆ្នាំ 2015 ជាមួយនឹងគោលដៅកាត់បន្ថយការស្លាប់ ដែលអាចបង្ការបាន និងការពន្លឿនការទទួលបានសេវាវះកាត់ប្រកបដោយសុវត្ថិភាព និងការប្រើថ្នាំសណ្តំ នៅទូទាំង ពិភពលោក។
គោលបំណង សំខាន់ៗរបស់កម្មវិធីវះកាត់ប្រកបដោយសុវត្ថិភាពឆ្នាំ 2020 គឺ៖ 1.ឥទ្ធិពល៖ កាត់បន្ថយការស្លាប់ ដែលអាចបង្ការបានពីលក្ខខណ្ឌជំងឺ ដែលអាចព្យាបាលដោយការវះកាត់ដោយបង្កើន គុណភាពនៃការថែទាំ និងបង្កើនចំនួននៃការវះកាត់ក្នុងកន្លែងវះកាត់ ដែល គាំទ្រដោយកម្មវិធីវះកាត់ប្រកបដោយសុវត្ថិភាពឆ្នាំ 2020។ 2.ភាពច្នៃប្រឌិត ៖ ណែនាំ និងសាកល្បងគំរូប៉ិនប្រសព្វសម្រាប់ការអនុវត្ត ក្នុងវិស័យសុខភាពជាសកល និង 3.ការពង្រីក៖ កសាង និងពង្រឹងប្រព័ន្ធអេកូសាស្ត្រ ប្រកបដោយនិរន្តរភាព សម្រាប់ការវះកាត់ សង្គ្រោះបន្ទាន់ និងសំខាន់ នៅក្នុងតំបន់ក្រីក្រ។
កម្មវិធីវះកាត់ប្រកបដោយសុវត្ថិភាពឆ្នាំ 2020 បានចាប់ផ្តើមប្រតិបត្តិការនៅប្រទេសអេត្យូពីនៅឆ្នាំ 2016 និងនៅប្រទេស តង់ហ្សានីនៅឆ្នាំ 2017។ គំនិតផ្តួចផ្តើមនេះបានជួយគាំទ្រដល់រដ្ឋាភិបាលអេត្យូពី និងតង់ហ្សានី ដើម្បីបង្កើត យុទ្ធសាស្ត្រ វះកាត់ថ្នាក់ជាតិ ដែលត្រូវបានគេស្គាល់ថាជាការសង្គ្រោះជីវិតតាមរយៈការវះកាត់ និង ផែនការវះកាត់ សម្ភព និងថ្នាំស្ពឹកជាតិ។ តាមរយៈកម្មវិធីរបស់កម្មវិធីវះកាត់ប្រកបដោយសុវត្ថិភាពឆ្នាំ 2020 មន្ទីរពេទ្យបឋម ជាក់លាក់នានាបានបង្កើនបរិមាណ នៃការ វះកាត់ដល់ទៅ 50ភាគរយ និងកាត់បន្តយអត្រាមរណភាព និងអត្រា ឆ្លងមេរោគដល់ទៅមួយភាគបី។ មានបុគ្គលិកជាង 1200 នាក់នៅអាហ្វ្រិកខាងកើត កម្មវិធីវះកាត់ប្រកបដោយសុវត្ថិភាពឆ្នាំ 2020 ផ្តល់លទ្ធភាពឱ្យក្រុមវះកាត់នានាធ្វើការជាមួយគ្នា បានយ៉ាងល្អ អនុវត្តមានឧត្តមានុវត្តនានាដូចជា អនុវត្តតាមនីតិវិធីវះកាត់ប្រកបដោយសុវតិ្ថភាពរបស់ អង្គការ សុខភាព ពិភពលោក ជួសជុល និងសម្អាត ឧបករណ៍វះកាត់ប្រើសើរជាងមុខ។
ការវិនិយោគរបស់មូលនិធិ GE ក្នុងការវះកាត់នៅតំបន់អាស៊ីអាគ្នេយ៍ បានអនុវត្តបន្តលើការងារអស់រយៈ ពេលជាង 10 ឆ្នាំនៅ ក្នុងតំបន់ ដើម្បីកែលម្អការទទួលបានសេវាថែទាំសុខភាព ដែលមានគុណភាព របស់សហគមន៍ជនបទ និងសហគមន៍ងាយ រងគ្រោះ។
ក្នុងអំឡុងពេលនោះ ក្រុមហ៊ុន GE និងមូលនិធិ GE បានផ្តល់ថវិកាចំនួន 12 លានដុល្លារ ដើម្បីនាំយកឧបករណ៍ វេជ្ជសាស្ដ្រទំនើបៗ បង្កើតកម្មវិធីបណ្តុះ បណ្តាលបច្ចេកទេសប្រើប្រាស់សម្ភារៈបរិក្ខារជីវវិជ្ជសាស្ត្រ (BMET) ដោយសហការ ជាមួយសាកលវិទ្យា ល័យ Duke និងអង្គការសុខភាពវិស្វកម្មពិភពលោក ហើយបង្កើនលទ្ធភាពទទួលទឹកសុវត្ថិភាព ដោយ ឧបត្ថម្ភប្រព័ន្ធបន្សុតទឹក ជាមួយនឹងការបណ្តុះបណ្តាលសម្រាប់មជ្ឈមណ្ឌលថែទាំសុខភាពនានា។ កម្មវិធី នេះបានគាំទ្រដល់ មន្ទីរពេទ្យជាង 40 នៅក្នុងខេត្តចំនួន 25 ។
“កម្មវិធីវះកាត់ប្រកបដោយសុវត្ថិភាពឆ្នាំ 2020 បំពេញបន្ថែមយ៉ាងល្អប្រសើរ លើកម្មវិធីថែទាំសុខភាព ដែលគាំទ្រដោយ មូលនិធិ GE ដែលយើងបានចាប់ផ្តើមនៅកម្ពុជាក្នុងឆ្នាំ 2009។ លោក លឹម តារារិទ្ធិ ប្រធានតំណាងក្រុមហ៊ុន GEប្រចាំប្រទេសកម្ពុជា បានលើក ឡើងថា ៖ “ខណៈដែលគំនិតផ្តួចផ្តើមនេះផ្តោតសំខាន់ លើការផ្តល់នូវការព្យាបាលចាំបាច់ ដូចជាការបណ្តុះបណ្តាល និងឧបករណ៍វិជ្ជសាស្ត្រទៅឱ្យមន្ទីរពេទ្យដែលខ្វះធនធាន កម្មវិធីដែលផ្តោតលើជំនាញឯកទេស នេះផ្តល់នូវអត្ថប្រយោជន៍ រយៈពេលវែងសម្រាប់ក្រុមគ្រូពេទ្យវះកាត់របស់យើងនៅទូទាំងប្រទេស”៕ ដោយ ៖ បញ្ញាស័ក្តិ
