Michael ជាព្យុះសង្ឃរាដ៏មហាកំណាចបំផុត បើគិតក្នុងរយៈពេលជាង៨០ឆ្នាំចុងក្រោយនេះ និងជាព្យុះដ៏សែនកំណាចទីបី ដែលអាមេរិកបានជួបប្រទះនៅលើទឹកដីរបស់ខ្លួន។ Michael បានបោកបក់មួយទំហឹង នាំទឹកភ្លៀង ទៅចាក់លើភាគពាយ័ព្យនិងតំបន់ឆ្នេររបស់រដ្ឋFlorida បង្កឱ្យមានទឹកជំនន់ និងការហិនហោចយ៉ាងដំណំ ព្រមទាំងបានសម្លាប់ជីវិតមនុស្សអស់ម្នាក់ផង។
ថ្វីបើអាជ្ញាធរបានចាត់វិធានការការពារត្រៀមជាមុន បញ្ចេញពលទាហានប្រមាណ៣៥០០នាក់ ដើម្បីជួយជម្លៀសប្រជាជនជាងពីរលានមួយសែននាក់ទៅកាន់ទីមានសុវត្ថិភាព បួនពាន់នាក់ត្រៀមអាសន្នចាំជួយតាមផ្លូវ តាំងពីថ្ងៃចន្ទហើយក្តី ប៉ុន្តែអាជ្ញាធរនៅតែស្លន់ខ្លាំងនៅចំពោះមុខភាពកំណាចរបស់ព្យុះMichael ដែលកាលពីថ្ងៃអាទិត្យមុននេះ មានទម្រង់ជាព្យុះត្រូពិកទេ។ តែបានប្រែរាងទៅជាព្យុះកំណាចខ្លាំងឡើងៗ ក្លាយជាព្យុះសង្ឃរាកម្រិត៣ រួច៤ ក្នុងចំណាត់ថ្នាក់ព្យុះសង្ឃរា៥កម្រិត នៅពេលមកដល់ដី Florida។ ៨ម៉ោងក្រោយប៉ះតំបន់ដីគោក Michael បន្តបោកបក់ខ្លាំងក្នុងល្បឿន១៥០គីឡូម៉ែត្រក្នុងមួយម៉ោង។
ក្រុងឆ្នេរសមុទ្ទ Panama City Mexico Beach នៃរដ្ឋFlorida សាងសង់ស្មើនឹងកម្រិតកម្ពស់ទឹកសមុទ្រ បានត្រូវព្យុះសង្ឃរាMichael ឈូសបាត់ ! ផ្ទះនៅប្របមាត់ទឹក ត្រូវលិចដល់ដំបូល។ នៅតាមផ្លូវ គេឃើញសល់តែជញ្ជាំងធ្លុះធ្លាយ ព្រោះកម្លាំងខ្យល់បានបោកបក់យកទៅអស់។ ព្យុះMichael បានមកដល់ជ្រោយអាមេរិកលឿនហួសពីការព្រាងទុក និងក្នុងល្បឿន ២៥០គីឡូម៉ែត្រក្នុងមួយម៉ោង ជាហេតុធ្វើឱ្យប៉ើងខ្ទេចប៉ើងខ្ទី ដើមឈើរលើងឫសដួល រថយន្តក្រឡាប់គរគ្នាត្រៀបត្រា … កម្ពស់ទឹកបានឡើង៤,៣ម៉ែត្រលើកម្រិតធម្មតា។
សម្រាប់ពេលនេះ Michael ត្រូវបានគេចាត់ទុកជាព្យុះសង្ឃរាដ៏កំណាចបំផុតគិតចាប់តាំងពីឆ្នាំ ១៩៣៨ និងបន្ទាប់ពីព្យុះសង្ឃរាកាលពីឆ្នាំ១៩៦៩មក។ ពលរដ្ឋជម្លៀសខ្លួនចេញពីស្ថានភាពខូចខាតផ្ទះសម្បែងរបស់ខ្លួន មិនទាន់បានទទួលការអនុញ្ញាតឱ្យវិលត្រឡប់ចូលវិញទេ ។ សាលារៀន សាកលវិទ្យាល័យ នឹងត្រូវបិទទ្វាររហូតដល់ចុងសប្តាហ៍។
លោកប្រធានាធិបតី Donald Trump បានប្រកាសដាក់Florida ក្នុងភាពអាសន្ន និងសន្យាចុះជួបពលរដ្ឋរងគ្រោះផ្ទាល់នៅថ្ងៃអាទិត្យ ឬយ៉ាងយូរថ្ងែចន្ទខាងមុខ៕សូយន