កូនប្រុសអ្នកមានរុស្ស៊ីម្នាក់បានបង្កឱ្យមានសម្អប់ចំពោះក្រុមអ្នកមាន ដោយសារទង្វើអង្គុយក្នុងរថយន្ត បាចលុយតាមផ្លូវ ហើយថែមទាំងថតឃ្លីបង្ហោះ អមដោយពាក្យពេចន៍ធ្វើឱ្យអ្នកក្រឈឺចាប់។
នៅក្នុងឃ្លីប គេឃើញយុវជនម្នាក់មិនបញ្ចេញឈ្មោះ ហើយពាក់ម៉ាស់មុខ ដៃកាន់លុយទាំងដុំ រួចបង្ហើបកញ្ចក់ពង្រាយលុយពីលើរថយន្ត។
យុវជនដែលអង្គុយក្នុងរថយន្តទំនើបនូវបានស្រែកថា ៖រដ្ឋមិនជួយអ្នកក្រទេ ហេតុនេះគួរអរគុណមនុស្សដូចខ្ញុំ។ពួកអ្នកពិតជាធ្វើការវេទនា ហើយបានលុយតែប៉ុណ្ណឹងឬ ខ្ញុំឃើញពួកអ្នកពិតជាគួរអាណិត! និយាយចប់បុរសរូបនេះបានចាប់ផ្តើមពង្រាយលុយតាមផ្លូវ។
មានយោបល់ច្រើនផ្ទុយគ្នាលើបណ្តាញសង្គម។ជារួមពួកគេបានរិះគន់ចំពោះទង្វើមានលក្ខណៈពេបជ្រាយរបស់យុវជននេះ។ខ្លះទៀតថា ៖ រឿងដែលគួរឱ្យនិយាយនោះ គឺលុយទាំងនេះពុំមែនជារបស់រកបានដោយញើសឈាមខ្លួនវាទេ ។ វាចង់មាក់ងាយអ្នកដទៃ តែចុងក្រោយគឺវាមើលងាយខ្លួនវាតែម្តង។ជាក់ស្តែងវាពុំហ៊ានបង្ហាញមុខមាត់ឱ្យគេឃើញ។
ខ្លះទៀតនិយាយថា៖ បញ្ហានេះកើតឡើងព្រោះតែឪពុកម្តាយមិនចេះប្រដៅកូន ធ្វើឱ្យឆ្គាំឆ្គងជាមួយអ្នកដទៃ។យុវជននេះតាមពិតទៅវាបិទមុខ ព្រោះតែខ្លាចឪពុកម្តាយវាឃើញ៕សូយន
