ភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានដឹកនាំកិច្ចប្រជុំពេញអង្គគណៈរដ្ឋមន្ត្រី ដើម្បីពិភាក្សាលើសេចក្តីព្រាងច្បាប់ស្តីពី ហិរញ្ញវត្ថុសម្រាប់ការគ្រប់គ្រងឆ្នាំ២០១៩ និងសេចក្តីព្រាងច្បាប់ស្តីពី ការទូទាត់ថវិកាទូទៅរបស់រដ្ឋ សម្រាប់ការគ្រប់គ្រងឆ្នាំ២០១៧ នៅព្រឹកថ្ងៃសុក្រ ទី២៦ ខែតុលា ឆ្នាំ២០១៨នេះនៅវិមានសន្តិភាព ។
បើតាម លោក ផៃ ស៊ីផាន អ្នកនាំពាក្យរាជរដ្ឋាភិបាលកម្ពុជា មានថ្លែងថា កិច្ចប្រជុំគណៈរដ្ឋមន្ត្រីព្រឹកនេះ មានរបៀបវារៈដូចតទៅ៖
១.សេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០១៩។
២.សេចក្តីព្រាងច្បាប់ស្តីពីការទូទាត់ថវិកាទូទៅរបស់រដ្ឋ សម្រាប់ការគ្រប់គ្រងឆ្នាំ២០១៧។
៣.បញ្ហាផ្សេងៗ ៖ សំណើរសុំការយល់ព្រមពីគណៈរដ្ឋមន្ត្រី ដើម្បីសុំសច្ចាប័នពីស្ថាប័ននីតិប្បញ្ញត្តិលើ ៖
៣.១.កិច្ចព្រមព្រៀងស្តីពីការចៀសវាងការយកពន្ធត្រួតគ្នា និងការបង្ការការកិបកេងបន្លំពន្ធពាក់ព័ន្ធនឹងពន្ធលើប្រាក់ចំណូល រវាងកម្ពុជា-វៀតណាម និងកម្ពុជា-ឥណ្ឌូនេស៊ី។
៣.២.សន្ធិសញ្ញារវាងព្រះរាជាណាចក្រកម្ពុជា និងសហព័ន្ធរុស្ស៊ី ស្តីពីបត្យាប័នជាដើម។
លោកអ្នកនាំពាក្យរាជរដ្ឋាភិបាល បានបន្ថែមថា កិច្ចប្រជុំពេញអង្គគណៈរដ្ឋមន្ដ្រី ក្រោមអធិបតីភាពដ៏ខ្ពង់ខ្ពស់ សម្ដេចអគ្គ មហាសេនាបតីតេជោ ហ៊ុន សែន នាយក រដ្ឋមន្ដ្រីនៃព្រះរាជាណាចក្រកម្ពុជា បានចាប់ផ្ដើមពិភាក្សាលើរបៀបវារៈស្ដីពី “សេចក្តីព្រាងច្បាប់ស្តីពី ហិរញ្ញវត្ថុ សម្រាប់ការគ្រប់គ្រងឆ្នាំ២០១៩” ៖ សេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០១៩ ដែលគណៈរដ្ឋមន្ត្រីកំពុងពិនិត្យក្នុងពេលនេះ គឺជាថវិកាឆ្នាំទី១ ដើម្បីគាំទ្រ គោលនយោបាយរបស់រាជរដ្ឋាភិបាលនីតិកាលទី៦ នៃរដ្ឋសភា ក្នុងដំណើរ ឆ្ពោះទៅមុខប្រកបដោយជឿជាក់ នៅលើមាគ៌ានៃការកែទម្រង់ស៊ីជម្រៅ និងការអភិវឌ្ឍ ព្រមទាំងលើមូលដ្ឋាននៃសមិទ្ធផលសំខាន់ៗ ជាច្រើន ដែល សម្រេចបានកន្លងមក ទាំងខាងនយោបាយ សន្តិសុខ សណ្ដាប់ធ្នាប់សង្គម និងការអភិវឌ្ឍសង្គម-សេដ្ឋកិច្ច ដែលជាបុរេលក្ខខណ្ឌសម្រាប់ ការបន្ត រក្សាសន្តិភាព ស្ថិរភាព ក៏ដូចជាការទ្រទ្រង់ដំណើរការវិវឌ្ឍឈានឡើង របស់កម្ពុជា លើវិថីនៃការអភិវឌ្ឍប្រកបដោយគុណភាព និងចីរភាព។
ក្នុងន័យនេះ ថវិកាឆ្នាំ២០១៩ ត្រូវបានរៀបចំ និងវិភាជន៍ ដើម្បីអនុវត្ត សកម្មភាពអាទិភាព ដែលត្រូវបានកំណត់ក្នុងកម្មវិធី និងអាទិភាព គោលនយោបាយសំខាន់ៗរបស់រាជរដ្ឋាភិបាល ក្នុងនោះរួមមាន៖ ការអភិវឌ្ឍធនធានមនុស្ស ការកសាងហេដ្ឋារចនាសម្ព័ន្ធរូបវន្ត ការបន្តអភិវឌ្ឍ និងបង្កើនតម្លៃបន្ថែមនៃវិស័យ កសិកម្ម ការលើកកម្ពស់គុណភាពសេវាសុខាភិបាលឱ្យកាន់តែល្អប្រសើរ ការកែលម្អប្រព័ន្ធអប់រំឱ្យកាន់តែមានគុណភាពខ្ពស់ ការលើកកម្ពស់ប្រព័ន្ធគាំពារសង្គម, ជាពិសេសការអនុវត្តកម្មវិធី កែទម្រង់ស៊ីជម្រៅលើគ្រប់វិស័យ ដែលរាជរដ្ឋាភិបាលបានដាក់ចេញ ដើម្បីបន្តគាំទ្រ និងជម្រុញកំណើនសេដ្ឋកិច្ចប្រកបដោយគុណភាព និងមានភាពធន់ខ្ពស់ ធានាបានសមធម៌សង្គម ដែលមានបរិយាប័ន្ន និងពង្រឹងស្ថាប័នថ្នាក់ជាតិ និងថ្នាក់ក្រោមជាតិ ក្នុងដំណើរឆ្ពោះទៅ សម្រេចឱ្យបាននូវចក្ខុវិស័យអភិវឌ្ឍន៍កម្ពុជា ជា “ប្រទេសដែលមាន ចំណូលមធ្យមកម្រិតខ្ពស់នៅឆ្នាំ២០៣០”។
សេចក្ដីព្រាងច្បាប់ហិរញ្ញវត្ថុសម្រាប់ការគ្រប់គ្រងឆ្នាំ២០១៩ ត្រូវបានរៀបចំឡើងនៅក្នុងបរិការណ៍ ដែលរាជរដ្ឋាភិបាល ដឹកនាំដោយគណបក្ស ប្រជាជកម្ពុជា បន្ដទទួលបាននូវទំនុកចិត្តដ៏ច្រើនលើសលុបចេញ ពីឆន្ទៈ របស់ប្រជាជនកម្ពុជានៅទូទាំងប្រទេស ក្នុងការដឹកនាំប្រទេសជាតិ សម្រាប់ រយៈពេល៥ឆ្នាំបន្ដទៀត ។ រាជរដ្ឋាភិបាលនីតិកាលទី៦ នៃរដ្ឋសភា ដែលបានប្រសូតចេញពីការបោះឆ្នោត ដោយសេរី យុត្តិធម៌ ត្រឹមត្រូវ និងមានតម្លាភាព ស្របទៅតាមគោលការណ៍ នៃលទ្ធិប្រជាធិបតេយ្យ សេរីពហុបក្ស និងមានប្រជាពលរដ្ឋចូលរួមរហូតដល់៨៣,០២ភាគរយ នៃចំនួនអ្នកមានឈ្មោះក្នុងបញ្ជីបោះឆ្នោត បាននឹងកំពុង បន្ដបេសកកម្មដ៏ឧត្តុង្គឧត្តមជាប្រវត្តិសាស្ដ្ររបស់ខ្លួន បន្ដពីរាជរដ្ឋាភិបាលអាណត្តិទី៥ ជាមួយនឹងការប្ដេជ្ញាចិត្តយ៉ាងមុតមាំឥតរាថយ និងកាន់តែស្វាហាប់ ជាងពេលណាៗទាំងអស់ ក្នុងការបម្រើប្រជាជនទ្វេដង ក៏ដូចក្នុងការពន្លឿនកិច្ចអភិវឌ្ឍ និងជំរុញអនុវត្តការកែទម្រង់កាន់តែស៊ីជម្រៅ និងទូលំទូលាយគ្រប់វិស័យ ឆ្ពោះទៅរកអនាគតមួយដ៏រុងរឿង ស្របតាមឆន្ទៈ និងបំណងប្រាថ្នាដ៏ពិសិដ្ឋរបស់ប្រជាជន ។
ឈរលើមូលដ្ឋាននេះ សេចក្ដីព្រាងច្បាប់ស្ដីពីហិរញ្ញវត្ថុសម្រាប់ការគ្រប់គ្រងឆ្នាំ២០១៩ មានគោលដៅគាំទ្រការអនុវត្តកម្មវិធីនយោបាយ របស់រាជរដ្ឋាភិបាល ជាពិសេសអនុវត្តតាមគោលនយោបាយអាទិភាពសំខាន់ៗ និងវិធានការកែទម្រង់ជាក់ស្ដែងនានា ដែលនឹងត្រូវចាប់ផ្ដើមអនុវត្តនៅក្នុងឆ្នាំ២០១៩ ដែលជាឆ្នាំទី១ របស់រាជរដ្ឋាភិបាលនីតិកាលទី៦ នៃរដ្ឋសភា ឱ្យសម្រេចបានលទ្ធផលផ្លែផ្កាជាអតិបរមាជូនប្រទេសជាតិ ដើម្បីឆ្លើយតបនឹងសំណូមពរ សេចក្ដីត្រូវការ និងការរំពឹងទុករបស់ប្រជាជនដែលជាម្ចាស់ឆ្នោត នៅក្នុងដំណាក់កាលថ្មីនៃការអភិវឌ្ឍនេះ ។ ក្នុងន័យនេះ ថវិកាឆ្នាំ២០១៩ ដែលជាឆ្នាំទី១ នៃនីតិកាលទី៦ នៃរដ្ឋសភា ត្រូវតែជាយុទ្ធសាស្ដ្រនៃការរក្សាសមិទ្ធផលដែលសម្រេចបានដោយលំបាក និងការបន្ដបុកគ្រឹះថ្មីៗសម្រាប់គាំទ្រដល់ការសម្រេចបានគោលដៅសំខាន់ៗ នៃកម្មវិធីនយោបាយរបស់រាជរដ្ឋាភិបាលនីតិកាលទី៦ និងយុទ្ធសាស្ដ្រចតុកោណ-ដំណាក់កាលទី៤ របស់រាជរដ្ឋាភិបាល ដើម្បីបន្ដរក្សាសន្ដិភាព ស្ថិរភាព ក៏ដូចជាទ្រទ្រង់នូវដំណើរការវិវឌ្ឍឈានឡើងរបស់កម្ពុជាលើវិថីនៃការអភិវឌ្ឍប្រកបដោយគុណភាព និងចីរភាព តទៅមុខឥតឈប់ឈរ ។
នៅក្នុងរយៈពេលមធ្យមខាងមុខ ការអភិវឌ្ឍសង្គមសេដ្ឋកិច្ចកម្ពុជានឹងឈានដល់ដំណាក់កាលប្រែប្រួលថ្មីមួយទៀត ជាពិសេសចាប់ពីពេលនេះទៅរយៈពេល០៥ឆ្នាំខាងមុខ ដែលជាអន្ដរកាលឆ្ពោះទៅសម្រេច ឋានៈប្រទេសមានចំណូលមធ្យមកម្រិតខ្ពស់នៅឆ្នាំ២០៣០ ។ ក្នុងក្របខណ្ឌនេះ កម្ពុជាត្រូវតែមាន ប្រព័ន្ធរដ្ឋបាលសាធារណៈមួយដែលកាន់តែស្អាតស្អំ ឆ្លាតវៃ និងមានសមត្ថភាពខ្លាំងពូកែ (A clean, Smart and Strong Government) ដើម្បីអាចដោះស្រាយបញ្ហាសង្គម និងសេដ្ឋកិច្ចប្រកបដោយប្រសិទ្ធភាពខ្ពស់ ក្នុងអត្រាប្រមាណ៧ភាគរយក្នុងមួយឆ្នាំ សម្រាប់បង្កើតការងារប្រកបដោយគុណភាព សម្រាប់យុវជនផង ឆ្លើយតបប្រកបដោយប្រសិទ្ធភាពចំពោះក្ដីរំពឹងទុករបស់ប្រជាជនផង ឆ្លើយតបនឹងសេចក្ដីត្រូវការរបស់ប្រជាជន ដែលចេះតែកើនឡើងជាលំដាប់ នូវសេវាសាធារណៈសំខាន់ៗប្រកបដោយគុណភាព ទាំងហេដ្ឋារចនាសម្ព័ន្ធរូបវន្ដ សេវាអប់រំ សុខាភិបាល និងសេវាមូលដ្ឋានចាំបាច់ផ្សេងទៀត រួមទាំងរបបសន្ដិសុខសង្គម និងសុខមាលភាពរបស់ប្រជាជនទូទៅ ការធានាសុវត្ថិភាពចំណូល ជាពិសេសសម្រាប់ប្រជាជនងាយរងគ្រោះ និងការកាត់បន្ថយគម្លាតនៃការរីកចម្រើនរវាងទីក្រុង និងជនបទ ។
ចំពោះទិដ្ឋភាពក្រៅប្រទេស ស្ថានភាពភូមិសាស្ដ្រនយោបាយពិភពលោក ដែលកំពុងវិវត្តក្នុងក្របខ័ណ្ឌពហុប៉ូលនេះ កាន់តែស្មុគស្មាញឡើងៗ ហើយស្ថានភាពសេដ្ឋកិច្ចពិភពលោក និងតំបន់ ក៏នៅបន្ដស្ថិតក្នុងភាពមិនប្រកដប្រជានៅឡើយ ដោយសារសង្គ្រាមពាណិជ្ជកម្មដែលអាចនឹងនាំទៅដល់វិបត្តិរូបិយវត្ថុ និងហិរញ្ញវត្ថុថែមទៀត ។ ពិតណាស់ថា កម្ពុជាដែលជាប្រទេសមានសេដ្ឋកិច្ចបើកចំហខ្លាំង និងទទួលបានការរីកចម្រើនដោយសារសាកលភាវូបនីយកម្ម អាចនឹងទទួលរងនូវផលប៉ះពាល់អវិជ្ជមានមួយចំនួន ដោយមិនគិតទៅដល់ផលប៉ះពាល់ដែលបណ្ដាលមកពីការឡើងថ្លៃប្រេង ព្រមទាំងការឡើងថ្លៃ និងកាដំឡើងអត្រាការប្រាក់ដុល្លារអាមេរិក ។ ប៉ុន្តែជាមួយគ្នានេះ កម្ពុជាក៏អាចនឹងទទួលបានកាលានុវត្តភាពមួយចំនួន វិញដែរ ។ ក្នុងន័យនេះ កម្ពុជាត្រូវចេះបត់បែន និងតាមឱ្យទាន់សភាពការណ៍ប្រែប្រួលក្នុងតំបន់ និងពិភពលោកដើម្បីបញ្ចៀស និងសម្រាលនូវផលប៉ះពាល់ជាអវិជ្ជមានទាំងឡាយ ដែលអាចកើតមានឡើងជាយថាហេតុ ហើយត្រូវត្រៀមខ្លួនឱ្យបានល្អ ដើម្បីប្រែក្លាយបញ្ហាប្រឈមទាំងឡាយ ឱ្យក្លាយទៅជាកាលានុវត្តភាព និងត្រូវចេះប្រើប្រាស់លក្ខខណ្ឌអំណោយផលទាំងឡាយសម្រាប់លើកកម្ពស់ប្រសិទ្ធភាព និងភាពប្រកួតប្រជែងសេដ្ឋកិច្ច និងកែលម្អបរិស្ថានវិនិយោគសម្រាប់ទទួល និងទាក់ទាញបន្ថែមការវិនិយោគនិងធុរកិច្ចដែលអាចនឹងហូរចេញ ពីតំបន់ជម្លោះពាណិជ្ជកម្មចូលមកកាន់កម្ពុជា ។ ទន្ទឹមនេះ កម្ពុជាក៏ត្រូវទាញយកផលប្រយោជន៍ជាអតិបរមាពីការរីកចម្រើនផ្នែកបច្ចេកវិទ្យា និងឌីជីថលរូបនីយកម្ម ជាពិសេសក្នុងបរិការណ៍នៃបដិវត្តឧស្សាហកម្មទី៤ និងត្រូវលើកកម្ពស់ប្រសិទ្ធភាពនៃកិច្ចការពារ និងអភិរក្សបរិស្ថាន ធនធានធម្មជាតិ ប្រព័ន្ធអេកូឡូស៊ី តំបន់ជីវៈចម្រុះ ព្រៃឈើ និងជម្រកសត្វព្រៃ ព្រមទាំងសម្របខ្លួនទៅនឹងការប្រែប្រួលអាកាសធាតុផងដែរ ។
រាជរដ្ឋាភិបាលនីតិកាលទី៥ នៃរដ្ឋសភា បានបញ្ចប់បេសកកម្មជាប្រវត្តិសាស្ដ្ររបស់ខ្លួនប្រកបដោយភាពជោគជ័យដ៏ត្រចះត្រចង់ និងសម្រេចបាននូវសមិទ្ធផលធំៗជាច្រើនជូនប្រទេសជាតិ និងប្រជាជន ហើយទទួលបាននូវពរជ័យ និងការគាំទ្រភ្លូកទឹកភ្លូកដីពីប្រជាពលរដ្ឋទូទាំងប្រទេស ។ ជាក់ស្ដែងក្នុងរយៈពេល៥ឆ្នាំកន្លងមកនេះ រាជរដ្ឋាភិបាលនីតិកាលទី៥ នៃរដ្ឋសភា រក្សាបានពេញលេញនូវសន្ដិភាព បូរណភាពទឹកដី និងស្ថិរភាពនយោបាយ ដែលជាមូលដ្ឋានគ្រឹះមិនអាចខ្វះបានក្នុងការធានានូវដំណើរការជាប្រក្រតីនៃកិច្ចដំណើរការសង្គម-សេដ្ឋកិច្ចកម្ពុជា ជាពិសេសការរក្សាបាននូវលំនឹងនៃជីវភាពរស់នៅប្រចាំថ្ងៃរបស់ប្រជាជន ។
ទន្ទឹមនេះ កម្ពុជាសម្រេចបាននូវកំណើនសេដ្ឋកិច្ចខ្ពស់ ក្នុងអត្រាជាង៧ភាគរយក្នុងមួយឆ្នាំ ហើយមូលដ្ឋាននៃកំណើនក៏កាន់តែមានពិពិធកម្មច្រើនឡើង ដែលធ្វើឱ្យទំហំសេដ្ឋកិច្ចកាន់តែរីកចម្រើនឡើងជាលំដាប់ ។ ជាក់ស្ដែង ទំហំសេដ្ឋកិច្ច (ផ.ស.ស តាមថ្លៃបច្ចុប្បន្ន) បានកើនឡើងពី ៦១.៣២៦.៩២៨ លានរៀល ឬសមមូលនឹងប្រមាណជាង ១៥.២៣៧ លានដុល្លារអាមេរិកក្នុងឆ្នាំ២០១៣ ដល់ ៩៩.១១៦.០៤១ លានរៀល ឬ សមមូលនឹងប្រមាណជាង ២៤.៥៥២ លានដុល្លារអាមេរិកនៅឆ្នាំ២០១៨ ។ ចំណូលមនុស្សម្នាក់ធៀងនឹង ផ.ស.ស ក៏បានកើនឡើងពី ១ .០៤២ ដុល្លារអាមេរិកក្នុងឆ្នាំ២០១៣ ដល់ប្រមាណ ១.៥៦៣ ដុល្លារអាមេរិកនៅក្នុងឆ្នាំ២០១៨ ។ អត្រាប្ដូរប្រាក់ស្ថិតក្នុងរង្វង់ ៤.០៥០ រៀលក្នុងមួយដុល្លារអាមេរិក ក្នុងខណៈ ដែលអត្រាអតិផរណា ជាមធ្យមស្ថិតក្នុងរង្វង់៣ភាគរយ ដែលជាកម្រិតមួយទាប និងអាចគ្រប់គ្រងបាន ក្នុងរយៈពេលដូចគ្នា ។ ទន្ទឹមនេះ ទុនបម្រុងអន្ដរជាតិក៏បានកើនឡើងពី ៣ ៦៤៣
លានដុល្លារអាមេរិកក្នុងឆ្នាំ២០១៣ ដល់ ៩.៤៩៤ លានដុល្លារអាមេរិកនៅឆ្នាំ២០១៨ ។
ការសម្រេចបាននូវកំណើនសេដ្ឋកិច្ចខ្ពស់ និងស្ថេរភាពម៉ាក្រូសេដ្ឋកិច្ចរឹងមាំ និងធននឹងវិបត្តិក្នុងបរិការណ៍អតិផរណាទាប និងអត្រាប្ដូរប្រាក់មានស្ថិរភាពខាងលើនេះ បានធ្វើឱ្យរាជរដ្ឋាភិបាលអាចធ្វើការបែងចែកនូវផ្លែផ្កានៃកំណើនសេដ្ឋកិច្ចកាន់តែច្រើនថែមទៀតដល់ប្រជាជនគ្រប់ស្រទាប់វណ្ណៈ ដើម្បីលើកកម្ពស់ជីវភាពរស់នៅឱ្យកាន់តែប្រសើរឡើង ទាំងខាងសម្ភារៈនិងស្មារតី ។
ជាក់ស្ដែង ក្នុងរយៈពេល៥ឆ្នាំ កន្លងមកនេះមន្ដ្រីរាជការស៊ីវិល និងកម្លាំងប្រដាប់អាវុធទទួលបានការដំឡើងបៀវត្សដល់កម្រិតជាង១លានរៀល នៅក្នុងឆ្នាំ២០១៨ ហើយការបើកបៀវត្សធ្វើបានទាន់ពេលវេលា ក្នុងសប្ដាហ៍ទី៤នៃខែតាមប្រព័ន្ធធនាគារ ។ និវត្តជនក៏ទទួលបាននូវការបង្កើនប្រាក់សោធននិវត្តន៍ និងរបបតាវកាលិកផ្សេងទៀតជាបន្ដបន្ទាប់ផងដែរ ។ ដូចគ្នានេះដែរ កម្មកនយោជិត ក្នុងវិស័យឯកជនក៏ទទួលបានការដំឡើងប្រាក់ឈ្នួលអប្បបរមាដល់ចំណុច ១៧០ ដុល្លារអាមេរិកក្នុងឆ្នាំ២០១៨ ហើយគ្រោងនឹងឡើងដល់ ១៨២ ដុល្លារអាមេរិកនៅឆ្នាំ២០១៩ ហើយបើក២ដងក្នុងមួយខែ ដោយមិនទាន់គិតទៅដល់ការទទួលបាននូវអត្ថប្រយោជន៍បន្ថែមផ្សេងទៀត ពីការអនុវត្តគោលនយោបាយគាំពារសង្គមរបស់រាជរដ្ឋាភិបាល រួមមានការកំណត់ផ្ដល់ជូននូវរបបថែទាំសុខភាពដល់កម្មករ ដោយនិយោជកជាអ្នកបង់ថ្លៃជួស និងការផ្ដល់នូវរបបឧត្ថម្ភមាតុភាពចំនួន ៤០ ម៉ឺនរៀល សម្រាប់ការសម្រាលកូនមួយជាដើម ។ ដោយឡែកចំណូលរបស់កសិករ អាជីវករ និងពលករផ្សេងទៀតក៏បានកើនឡើងដូចគ្នាដែរ តែបងប្អូនប្រជាកសិករទទួលបាននូវការយកចិត្តទុកដាក់ខ្ពស់ពីសំណាក់រាជរដ្ឋាភិបាល តាមរយៈការវិនិយោគដ៏ច្រើនសន្ធឹកសន្ធាប់ លើគម្រោងហេដ្ឋារចនាសម្ព័ន្ធសេដ្ឋកិច្ចជនបទ និងការលើកកម្ពស់ផលិតភាពកសិកម្ម ក៏ដូចជាតាមរយៈអន្ដរាគមន៍ផ្ទាល់ របស់រដ្ឋនៅពេលកសិផល ជាពិសេសស្រូវ-អង្ករ ប្រឈមនឹងការធ្លាក់ចុះថ្លៃនៅលើទីផ្សារអន្ដរជាតិ ឬទ្រទ្រង់ថ្លៃកុំឱ្យធ្លាក់ចុះហួសពីថ្លៃទីផ្សារខ្លាំងពេក ដោយមិនសមហេតុសមផលជាដើម ។ ក្រៅពីការបង្កើតឱកាសរកប្រាក់ចំណូល និងការកាត់បន្ថយបន្ទុកចំណាយចំពោះប្រជាពលរដ្ឋទូទៅ ជាពិសេសអ្នកមានចំណូលទាប និងអ្នកប្រកបអាជីវកម្មតូចតាច រាជរដ្ឋាភិបាលក៏បានប្រមូលពន្ធ កាន់តែច្រើនពីអ្នកដែលមាចំណូលខ្ពស់ ដោយឈរលើគោលការណ៍សមធម៌ និងយុត្តិធម៌ ហើយមិនឱ្យរវាតពីតួនាទីរបស់ប្រព័ន្ធពន្ធដារ ដែលជាឃ្នាស់នៃកំណើនសេដ្ឋកិច្ច និងជាយន្ដការនៃការបែងចែកនូវផលរំពឹងទុកនេះឡើងវិញ នៅក្នុងក្របខ័ណ្ឌនៃប្រព័ន្ធថវិកាជាតិ ក្នុងនោះ រួមទាំងការដំឡើងបៀវត្សរ៍ជូនមន្ដ្រីរាជការ ការពង្រីក និងកែលម្អគុណភាពសេវាសាធារណៈ និងការវិនិយោគលើការកសាងហេដ្ឋារចនាសម្ព័ន្ធផ្សេងៗ ព្រមទាំងការកែលម្អ និងការពង្រីកវិសាលភាព និងរបបគាំពារសង្គម និងសន្ដិសុខសង្គមដល់មន្ដ្រីរាជការគ្រប់ប្រភេទ និងជូនដល់ក្រុមជនងាយរងគ្រោះនៅក្នុងសង្គមជាដើម ៕ ដោយ៖បញ្ញាស័ក្តិ
