ភ្នំពេញ ៖ ជនបរទេសជាង២ម៉ឺននាក់ (វៀតណាម និងឡាវ) ដែលឆ្លងដែនមករស់នៅទូទាំងរាជធានី-ខេត្តទាំង២៥ ក្នុងព្រះរាជាណាចក្រកម្ពុជា បាននិងកំពុងកាន់កាប់ឯកសាររដ្ឋបាលកម្ពុជាមិនប្រក្រតី ត្រូវបានកម្លាំងនគរបាល នៃអគ្គនាយកដ្ឋានអន្តោប្រវេសន៍ក្រសួងមហាផ្ទៃ សហការជាមួយកម្លាំងនគរបាលអន្តោប្រវេសន៍ ចុះដកហូតឯកសារ។
លោកនាយឧត្តមសេនីយ៍ សន្តិបណ្ឌិត សុខ ផល អគ្គនាយក នៃអគ្គនាយកដ្ឋានអន្តោប្រវេសន៍ បានថ្លែងប្រាប់ក្រុមអ្នកសារព័ត៌មានថា ក្នុងយុទ្ធនាការ ដកហូតការកាន់កាប់ឯកសាររដ្ឋបាលកម្ពុជាមិនប្រក្រតី ពីជនបរទេសនេះ មានរយៈពេល២ខែមកនេះ តាំងពីថ្ងៃទី២៣ ខែវិច្ឆិកា ឆ្នាំ២០១៧ រហូតដល់ថ្ងៃទី២១ ខែមករា ឆ្នាំ២០១៨នេះ ។ យោងតាមអនុក្រឹត្យលេខ ១២៩អនក្រ.ប្រកចុះថ្ងៃទី១៥ ខែសីហា ឆ្នាំ២០១៧ ស្តីពីការលុបចោល និងការដកហូតឯកសាររដ្ឋបាលកម្ពុជាមិនប្រក្រតី ដែលជនបរទេសកំពុងកាន់កាប់ប្រើប្រាស់របស់រាជរដ្ឋាភិបាលកម្ពុជា ក្រសួងមហាផ្ទៃ បានចាត់តាំងក្រុមការងារចំនួន១៤ក្រុម របស់អគ្គនាយកដ្ឋានអន្តោប្រវេសន៍ ដើម្បីចុះអនុវត្តការងារដកហូតឯកសាររដ្ឋបាល កម្ពុជាមិនប្រក្រតី ដែលជនបរទេស កំពុងកាន់កាប់ប្រើប្រាស់ នៅទូទាំង២៥រាជធានីខេត្ត ក្នុងរយៈពេល ២ខែ កន្លងមកនេះ ។
លោកនាយឧត្តមសេនីយ៍ បានថ្លែងថា ចាប់ពីថ្ងៃទី២៣ ខែវិច្ឆិកា ឆ្នាំ២០១៧ ដល់ថ្ងៃទី២១ ខែមករា ឆ្នាំ២០១៨ ក្រុមការងារ ទាំងអស់បានធ្វើការ ដកហូតឯកសាររដ្ឋបាលកម្ពុជាពីជនបរទេស ចំនួន៦.២៤៤គ្រួសារ មនុស្សរួម២១.១៦៧នាក់ (ស្រី ៩.៨២៩នាក់) មាន២សញ្ជាតិ គឺវៀតណាម និងឡាវ ដែលដកហូតឯកសារសរុបចំនួន៩.៩៣៤ឯកសារ រួមមាន៖ សៀវភៅ ស្នាក់នៅចំនួន ៤.២១៩ក្បាល សៀវភៅគ្រួសារចំនួន៨៧៣ក្បាល សំបុត្រកំណើតខ្មែរចំនួន២.៧៣៧ច្បាប់ សំបុត្រអាពាហ៍ពិពាហ៍ ចំនួន១៥២ច្បាប់ អត្តសញ្ញាណប័ណ្ណសញ្ជាតិខ្មែរចំនួន១.៨៤៨ប័ណ្ណ លិខិតឆ្លងដែនខ្មែរ ចំនួន១០៥ក្បាល។
អគ្គនាយកដ្ឋានអន្តោប្រវេសន៍ បានជូនដំណឹងដល់ជនបរទេស ដែលកំពុងតែកាន់កាប់ប្រើប្រាស់ឯកសាររដ្ឋបាលកម្ពុជា មិនប្រក្រតី ត្រូវចូលរួមសហការ ជាមួយក្រុមការងារ យកឯកសារដើម មកឲ្យសមត្ថកិច្ច ធ្វើការដកហូត ហើយជនបរទេស ដែលបានដកហូតឯកសាររដ្ឋបាលកម្ពុជា មិនប្រក្រតីរួចហើយ អាចមានជំរើស២យ៉ាង ទី១-អាចត្រឡប់ទៅប្រទេសដើមវិញ និងទី២-អាចដាក់ពាក្យស្នើសុំ ជាជនបរទេសអន្តោប្រវេសន៍ ដែលត្រូវបានត្រួតពិនិត្យ និងសម្រេចដោយអាជ្ញាធរមានសមត្ថកិច្ច របស់ព្រះរាជាណាចក្រកម្ពុជា ៕ ដោយ៖បញ្ញាស័ក្តិ
