ជឿជាក់ថាប្រិយមិត្តមួយចំនួន ប្រាកដនៅចាំបានហើយ ពីបុរសម្នាក់ដែលគេផ្តល់រហស្សនាមថា សេដ្ឋីមាសប្រចាំប្រទេសវៀតណាមគឺលោក Phuc XO ដែលតែងបង្អួចពាក់គ្រឿងអលង្ការស្ទើរបាក់ខ្លួន តាំងពីក្បាលរហូតដល់ចុងជើង និងសូម្បីរបស់ប្រើប្រាស់រួមមានម៉ូតូធំៗក៏ស្រោបមាសផងដែរ។ ចំណុចដែលលេចធ្លោរបស់សេដ្ឋី Phuc XO គឺខ្សែកច្រវ៉ាក់ទំហំដ៏ធំសម្បើម ដែលមានបន្តោងមាសទម្ងន់រហូត ១៥ គីឡូក្រាម។ ហើយការពាក់មាសជ្រែកខ្លួនបែបនេះរបស់ Phuc XO ក៏ព្រោះតែរូបគេជឿតាមជំនឿដ៏ងប់ងល់របស់គ្រូហុងស៊ុយ ដែលប្រាប់ថាឲ្យតែមាន « បរិក្ខា មាស » ច្រើននៅក្បែរ ឬជាប់នឹងខ្លួន នោះសុខភាព លាភសក្ការៈ នឹងហូរចូល។
ប៉ុន្តែ ក្រោយពីល្បីមិនយូរប៉ុន្មាន ក៏ស្រាប់តែលេចធ្លាយដំណឹងថាសេដ្ឋីមាសដ៏ល្បីឈ្មោះរូបនេះត្រូវបានប៉ូលីសចាប់ខ្លួន ដោយសារជាប់ពាក់ព័ន្ធជួញដូរគ្រឿងញៀនដ៏ធំសម្បើម កាលបីអំឡុងខែមេសា ឆ្នាំ២០១៩។ ហើយអ្វីដែលហួសចិត្តស្ទើរដាច់ផ្ងារនោះ គឺថាគ្រឿងអលង្ការដែល Phux XO ពាក់បង្អួតទាំងប៉ុន្មានគឺសុទ្ធតែរបស់កាឡៃ និងពណ៌មាសក្រូមេប៉ុណ្ណោះ។
សូមបញ្ចាក់ថា ក្រោយចូលឆែកឆេរនៅផ្ទះ និងក្លឹបកម្សាន្តរបស់ Phuc XO ប៉ូលីសបានរកឃើញថា ការជួញដូរគ្រឿងត្រូវបានធ្វើឡើងចំនួន ១៧ លើករួចមហើយ ដោយមានចំនួន ៤២៥ ដុំ និងធ្វើតេស្តពិនិត្យទៅលើមនុស្ស ៨០ នាក់ រកឃើញផ្ទុកសារជាតិថ្នាំញៀន ក្នុងនោះ មានអ្នកបំរើ ក្លឹបជាង ៣០ នាក់ ផងដែរ។
ដោយឡែក នៅថ្ងៃទី៦ ខែវិច្ឆិកា តុលាការជាន់ខ្ពស់ប្រជាជននៅទីក្រុងហូជីមិញ ក៏បានបើកសវនាការផ្តន្ទាទោសអតីតសេដ្ឋីមាសក្លែងក្លាយ Phuc XO និងបក្ខពួករបស់គាត់ ក្នុងករណីបានប្រើប្រាស់ការប្រើប្រាស់គ្រឿងញៀនខុសច្បាប់ និងកាន់កាប់ដោយខុសច្បាប់នូវសារធាតុញៀន។
ប៉ុន្តែ ដោយសារហេតុផល Phuc XO បានជួបគ្រោះថ្នាក់នៅក្នុងឆ្នាំ២០១៧ បានបង្កឲ្យរបួសរហូតស្វិតសាច់ដុំ មិនអាចដើរបាន តុលាការបានសម្រេចផ្តន្ទាទោសពី ១២ ឆ្នាំ មកត្រឹម ១០ ឆ្នាំ។ ហើយដោយឡែក បក្ខពួកផ្សេងទៀត ត្រូវបានផ្តន្ទាទោសពី ៧ ទៅ ៨ ឆ្នាំ ខណៈជនជាប់ចោទម្នាក់ជាប់ត្រឹម ៣ ខែ និង៥ថ្ងៃប៉ុណ្ណោះ៕ ដោយ៖ លឹម ហុង
