ភ្នំពេញ ៖ ក្រសួងការបរទេស និងសហប្រតិបត្តិការអន្តរជាតិ បានចេញសេចក្តីប្រកាសព័ត៌មានថា នៅថ្ងៃទី២៤ ខែធ្នូ ឆ្នាំ២០២៤ ឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និងសហ ប្រតិបត្តិការអន្តរជាតិកម្ពុជា បានទទួលការចូលជួបសម្តែងការគួរសមរបស់ ឯកឧត្តម Shaharuddin Onn ឯកអគ្គរដ្ឋទូតម៉ាឡេស៊ីប្រចាំកម្ពុជា និងបានផ្លាស់ប្តូរទស្សនៈគ្នាស្តីពីការពង្រឹងទំនាក់ទំនងទ្វេភាគីកម្ពុជា- ម៉ាឡេស៊ី។
ដោយរំលឹកពីលទ្ធផលជាផ្លែផ្កានៃដំណើរទស្សនកិច្ចផ្លូវការនៅប្រទេសម៉ាឡេស៊ីរបស់សម្តេចមហាបវរធិបតី នាយករដ្ឋមន្ត្រី ហ៊ុន ម៉ាណែត ក្នុងខែកុម្ភៈ ឆ្នាំ ២០២៤ នេះ ឯកឧត្តមឧបនាយករដ្ឋមន្ត្រី ប្រាក់ សុខុន បាន កត់សម្គាល់ដោយក្តីរីករាយ ពីការកើនឡើងនៃការគាំទ្រអង្ករកម្ពុជានៅក្នុងប្រទេសម៉ាឡេស៊ី។
ឯកឧត្តម ឧបនាយករដ្ឋមន្ត្រី និងឯកឧត្តមឯកអគ្គរដ្ឋទូត Shaharuddin មានការពេញចិត្តចំពោះកំណើនពាណិជ្ជកម្ម ការវិនិយោគ ទេសចរណ៍ និងកិច្ចសហប្រតិបត្តិការលើវិស័យការងារ ការអប់រំ និងវិស័យដែលកំពុងរីក ចម្រើន ដូចជាឧស្សាហកម្មអាហារហាឡាល់រវាងប្រទេសទាំងពីរ។
ឯកឧត្តមឧបនាយករដ្ឋមន្ត្រីក៏បានផ្លាស់ ប្តូរទស្សនៈជាមួយឯកឧត្តមឯកអគ្គរដ្ឋទូត Shaharuddin អំពីលទ្ធភាពនៃការរៀបចំកិច្ចប្រជុំលើកទី៣ នៃ គណៈកម្មការចម្រុះសម្រាប់កិច្ចសហប្រតិបត្តិការទ្វេភាគីរវាងកម្ពុជា និងម៉ាឡេស៊ីនាពេលខាងមុខ ហើយ ថែមទាំងបានសង្កត់ធ្ងន់លើសារៈសំខាន់នៃការពង្រឹងកិច្ចសហប្រតិបត្តិការការពារជាតិ និងសន្តិសុខ ជា ពិសេសលើការប្រយុទ្ធប្រឆាំងនឹងឧក្រិដ្ឋកម្មឆ្លងដែន រួមទាំងការបោកប្រាស់តាមអ៊ីនធឺណិតផងដែរ។
ឯកឧត្តមឧបនាយករដ្ឋមន្ត្រីបានអបអរសាទរប្រទេសម៉ាឡេស៊ីចំពោះការទទួលតំណែងជាប្រធានអាស៊ាន នៅឆ្នាំ២០២៥ ដោយសន្យាផ្តល់ការគាំទ្រ និងកិច្ចសហប្រតិបត្តិការរបស់កម្ពុជា៕ រក្សាសិទ្ធដោយ៖សុទ្ធលី
