ខេត្តក្រចេះ ៖ កំហឹងរបស់ប្អូនថ្លៃ បានយកកាំបិតផ្គាកកាប់បងថ្លៃមួយកាំបិតពីក្រោយចំកញ្ចឹងក បណ្តាលឲ្យស្លាប់ភ្លាមៗនៅនឹងកន្លែង ដោយសារតែជម្លោះ រឿងបងថ្លៃមិនបើកទ្វារឲ្យចូលផ្ទះកាលពីយប់ លុះព្រឹកឡើងប្អូនថ្លៃមកជម្រះបញ្ជីតែម្តង ស្ថិតក្នុងភូមិស្នួលកើត ឃុំស្នួល ស្រុកស្នួល ខេត្តក្រចេះកាលពីវេលាម៉ោងជិត៨ព្រឹកថ្ងៃទី២០ខែតុលាឆ្នាំ២០១៨។
មន្ត្រីអាវុធហត្ថស្រុកស្នួលបានឲ្យដឹងថា ជនរងគ្រោះឈ្មោះ ផន យ៉ត ភេទប្រុសអាយុ៣១ឆ្នាំ របួសដាច់កញ្ចឹងកខាងស្ដាំ។ ឯជនសង្ស័យឈ្មោះ ឃាន ណាម ភេទប្រុស អាយុ១៩ឆ្នាំ។ អ្នកទាំងនេះនឹងរស់នៅ នៅភូមិឃុំកើតហេតុខាងលេីជាមួយគ្នា ក្រោយពីធ្វេីសកម្មភាពរួចជនសង្ស័យក៏បានរត់គេចខ្លួនបាត់។
មន្ត្រីអាវុធហត្ថបានបញ្ជាក់ថា ជនសង្ស័យ បានយកកាំផ្គាក់កាប់ទៅលេីជនរងគ្រោះ ត្រូវជាបងថ្លៃ ខណៈពេលដែលជនរងគ្រោះកំពុងអង្គុយកិនម្សៅនៅលើគ្រែផ្ទះបាយ ។ ក្រោយពីធ្វេីសកម្មភាពរួចហើយជនសង្ស័យ បានយកកាំបិតផ្គាកជិះម៉ូតូទៅទិសខាងជើងរត់គេចខ្លួនបាត់។
សូមបញ្ជាក់ថា កាលពីថ្ងៃទី១៨ ខែតុលា ឆ្នាំ២០១៨ ជនសង្ស័យបានឈ្លោះគ្នា ជាមួយជនរងគ្រោះ យ៉ាងខ្លាំង ដោយសារមិនបើកទ្វាឲ្យចូលផ្ទះ។ លុះដល់ព្រឹកថ្ងៃទី២០ ខែតុលា ឆ្នាំ២០១៨នេះ ជនសង្ស័យបានយកកាំបិត កាប់ជនរងគ្រោះ ពីក្រោយចំកញ្ចឹងកបណ្ដាលឲ្យស្លាប់តែម្ដង៕ ដោយ ៖ បញ្ញាស័ក្តិ
