កងកំលាំងរក្សាសន្តិភាពរបស់អង្គការសហប្រជាជាតិចំនួន ១៤នាក់បានស្លាប់ និង ៥៣នាក់ផ្សេងទៀតរងរបួស នៅក្នុងការវាយប្រហារនៅក្នុងសាធារណៈកុងហ្គូ។ នេះបើតាមការបញ្ជាក់របស់មន្ត្រីបេសកកម្មថ្លែងនៅក្នុងសេចក្តីប្រកាស។
មន្ត្រីបេសកកម្មរបស់អង្គការសហប្រជាជាតិក្នុងប្រទេសកុងហ្គូជឿជាក់ថា ក្រុមប៉ះបោរ គឺកងកំលាំងប្រជាធិបតេយ្យរួបរួម ជាអ្នកនៅពីក្រោយការវាយប្រហារនោះ។
អគ្គលេខាធិការអង្គការសហប្រជាជាតិ Antonio Guterres បានថ្លែងកាលពីថ្ងៃសុក្រម្សិលមិញថា “ការវាយប្រហារដែលមានគំរោងទុកជាមុនលើកងកំលាំងរក្សាសន្តិភាពរបស់អង្គការសហប្រជាជាតិក្នុងប្រទេសកុងហ្គូជាឧក្រិដ្ឋកម្មសង្គ្រាម និងបានហៅការវាថាជាការវាយប្រហារដ៏អាក្រក់បំផុតលើកងកំលាំងរក្សាសន្តិភាព”។
លោកអគ្គលេខាធិការបញ្ជាក់ថា ក្នុងចំណោមអ្នកស្លាប់ ក៏មានសមាជិកនៃកងកំលាំងប្រទេសកុងហ្គូចំនួន ៥នាក់ផងដែរ។
ចំនែក លោក Maman Sidikou អ្នកតំណាងពិសេសរបស់អគ្គលេខាធិការអង្គការសហប្រជាជាតិ បានថ្លែងថា “ការវាយប្រហារលើអ្នកទាំងឡាយណាដែលកំពុងធ្វើកិច្ចការផ្នែកសន្តិភាព និងស្ថេរភាពក្នុងប្រទេសកុងហ្គូគឺជាសកម្មភាពដ៏កំសាកបំផុត និងជាការបំពានដ៏ធ្ងន់ធ្ងរ”។
លោកថ្លែងបន្តទៀតថា “អង្គការសហប្រជាជាតិនឹងចាត់វិធានការដើម្បីឲ្យធានាថា អ្នកប្រព្រឹត្តនឹងត្រូវចាប់ខ្លួន និងយកមកកាត់ទោស”។
ការវាយប្រហារបានកើតឡើងកាលពីថ្ងៃព្រហស្បតិ៍ព្រលប់ នៅមូលដ្ឋានមួយរបស់ក្រុមហ៊ុន ស្ថិតក្នុងខេត្ត North Kivu។ ការវាយប្រហារបានអូសបន្លាយអស់រយៈពេល ៣ម៉ោង៕ សុភ័ក្ត្រ