មេដឹកនាំមកពីអង្គការកិច្ចសហប្រតិបត្តិការអ៊ីស្លាម ដែលមានសមាជិក ៥៧ប្រទេស បានទទួលស្គាល់ទីក្រុងជេរ៉ូសាឡឹម (Jerusalem) ជារដ្ឋធានីរបស់ប្រទេសប៉ាឡេស្ទីន និងបានស្នើឲ្យសហគមន៏អន្តរជាតិទទួលស្គាល់ដូចគ្នា។ នេះបើតាមការបញ្ជាក់នៅក្នុងសេចក្តីថ្លែងការណ៏ចុងក្រោយនៃកិច្ចប្រជុំបន្ទាប់របស់មេដឹកនាំនៃក្រុមនេះ។
ក្រុមមេដឹកនាំប្រទេសកាន់សាសនាអ៊ីស្លាម បានស្នើឲ្យមានកិច្ចប្រជុំវិសាមញ្ញាមួយនៅទីក្រុងអ៊ីស្តាប៊ុល ប្រទេសតួកគី ដើម្បីពិភាក្សាពីសេចក្តីសម្រេចរបស់ប្រធានាធិបតីអាមេរិច ដែលបានទទួលស្គាល់ទីក្រុងជេរ៉ូសាឡឹមជារដ្ឋធានីរបស់ប្រទេសអ៊ីស្រាអ៊ែល កាលពីសប្តាហ៍មុន។ លោក ត្រាំ ក៏បានប្រកាសផងដែរថា ស្ថានទូតអាមេរិចដែលសព្វថ្ងៃកំពុងស្ថិតនៅទីក្រុង Tel Aviv និងត្រូវផ្លាស់ប្តូរទៅកាន់ទីក្រុង Jerusalem។
នៅក្នុងកិច្ចប្រជុំថ្ងៃពុធ ម្សិលមិញ មេដឹកនាំនៃអង្គការអ៊ីស្លាម បានច្រាលចោលសេចក្តីសម្រេចរបស់ លោក ត្រាំ និងចាត់ទុកការសម្រេចនោះជាការគ្មានប្រសិទ្ធិភាព។ មេដឹកនាំទាំងនោះបានលើកឡើងថា ការប្រកាសដ៏គ្រោះថ្នាក់របស់ប្រធានាធិបតី ត្រាំបានបញ្ជាក់ពីការដកខ្លួនរបស់អាមេរិច ចេញពីដំណើរការសន្តិភាពអ៊ីស្រាអ៊ែល និងប៉ាឡេស្ទីន។
ប្រធានាធិបតីតួកគី លោក Recep Tayyip Erdogan បានប្រកាសថា សម្ព័ន្ធថ្មីត្រូវបានបង្កើតឡើងក្នុងការប្រឆាំងទៅនឹងសេចក្តីប្រកាសរបស់លោក ត្រាំជុំវិញទីក្រុងជេរ៉ូសាឡឹម។
លោក Recep Tayyip Erdogan និយាយថា សហរដ្ឋអាមេរិចមិនអាចធ្វើសកម្មភាពដោយយុត្តិធ៌មបានទៀតឡើយក្នុងនាមជាអ្នកសម្របសម្រួលរវាងប្រជាជនអ៊ីស្រាអ៊ែល និងប៉ាឡេស្ទីន ហើយប្រទេសដទៃទៀតត្រូវតែដើរតួនាទីជំនួសអាមេរិច។
ចំនែកនាយករដ្ឋមន្ត្រីអ៊ីស្រាអ៊ែលវិញ លោក Benjamin Netanyahu នៅថ្ងៃពុធម្សិលមិញដែរ បានបដិសេធទៅនឹងសេចក្តីថ្លែងការណ៏របស់អង្គការកិច្ចសហប្រតិបត្តិការអ៊ីស្លាម (OIC) និងបានលើកឡើងថា សេចក្តីប្រកាសណ៏ទាំងអស់នោះមិនធ្វើឲ្យពួកយើងខ្វល់ខ្វាយឡើយ។
លោកថ្លែងថា “នៅចុងបញ្ចប់ សេចក្តីពិតនឹងឈ្នះ ហើយប្រទេសផ្សេងៗទៀតនឹងទទួលស្គាល់ ទីក្រុងជេរ៉ូសាឡឹមជារដ្ឋធានីរបស់ប្រទេសអ៊ីស្រាអ៊ែល ហើយពួកគេនឹងផ្លាស់ប្តូរស្ថានទូតទៅកាន់ទីនោះ។”
លោកបន្តទៀតថា “វាជាការល្អសំរាប់ប្រជាជនប៉ាឡេស្ទីនក្នុងការទទួលស្គាល់ការពិត និងធ្វើការឆ្ពោះទៅរកសន្តិភាព ហើយមិនត្រូវទៅរកមូលវិវដ្តនិកម្ម និងត្រូវទទួលស្គាល់ការពិតបន្ថែមទៀតពីជេរ៉ូសាឡឹម។ ជេរ៉ូសាឡឹមមិនត្រឹមតែជារដ្ឋធានីអ៊ីស្រាអ៊ែលទេ ពួកយើងក៏នឹងការពារសេរីភាពនៃការគោរពបូជាសំរាប់សាសនាទាំងអស់នៅក្នុងទីក្រុងផដែរ”៕ សុភ័ក្ត្រ