អ្នកបើកបរតាកស៊ីម្នាក់ ត្រូវបានប៉ូលិសលីបង់ចាប់ខ្លួន ជុំវិញការរឹតកសម្លាប់បុគ្គលិកស្ថាត អង់គ្លេសម្នាក់ នៅរដ្ឋធានី Beirut ប្រទេសលីបង់។ នេះបើតាមប្រភពពីតុលាការបានថ្លែងប្រាប់ ភ្នាក់ងារសារព៌តមាន AFP កាលពីថ្ងៃច័ន្ទម្សិលមិញនេះ។
ប្រភពដដែលបញ្ជាក់ថា ឃាតករបានសារភាពថា ខ្លួនបានរឹតកសម្លាប់បុគ្គលិកស្ថានទូតអង់គ្លេស ឈ្មោះ Rebecca Dykes អាយុ ៣០ឆ្នាំ បន្ទាប់ពីព្យាយាមចាប់រំលោភលើជនរងគ្រោះកាលពីយប់ថ្ងៃ សុក្រកកន្លងទៅនេះ។
ឃាតករបានសារភាពថា គាត់បានឆ្លៀតឱកាសពេលជនរងគ្រោះស្រវឹងស្រា ដោយបានដឹកនាងទៅផ្លូវធំមួយដោយនាងមិនបានដឹងខ្លួន រួចបានឈប់ឡាននៅកន្លែងស្ងាត់។
ប្រភពដដែលបញ្ជាក់ថា នៅពេលជនល្មើសចាប់ផ្តើមរំលោភ ជនរងគ្រោះប្រកែក ហើយនាងក៏បានរត់រួចចេញមកក្រៅឡាន និងបានស្រែកយំ ប៉ុន្តែជនល្មើសបានអូសគាត់ចូលក្នុងឡានវិញ និងបានរឹតកសម្លាប់ជនរងគ្រោះតែម្តង។
ជនរងគ្រោះ Rebecca Dykes ត្រូវបានគេឃើញចុងក្រោយគេនៅក្នុងពិធីជប់លៀងមួយក្នុងតំបន់ Gemmayzeh ក្បែររដ្ឋធានី Beirut។ សាកសពរបស់គាត់ត្រូវបានគេប្រទះឃើញនៅលើផ្លូវធំមួយនៅថ្ងៃល្ងាចបន្ទាប់ពីកើតហេតុណ៏។
គាត់ បានបំរើការងារនៅស្ថានទូតចក្រភពអង់គ្លេសជាអ្នកគ្រប់គ្រងកម្មវិធី និងគោលនយោបាយ ចាប់តាំងពីខែមករា ឆ្នាំ ២០១៧មកម្លេះ។ នាងធ្វើការឲ្យនាយកដ្ឋានសំរាប់ការអភិវឌ្ឍន៏អន្តរជាតិ៕ សុភ័ក្ត្រ
