មហាសន្និបាតអង្គការសហប្រជាជាតិដែលមានសមាជិកចំនួន ១៩៣ នឹងរៀបចំកិច្ចប្រជុំពិសេសបន្ទាន់មួយ នៅថ្ងៃព្រហស្បតិ៍ស្អែកនេះ ដើម្បីពិនិត្យ និងសម្រេចលើ ការប្រកាសរបស់ប្រធានាធិបតីអាមេរិច ដូណាល់ ត្រាំ ដែលទទួលស្គាល់ទីក្រុងជេរ៉ូសឡឹមជារដ្ឋធានីរបស់អ៊ីស្រាអ៊ែល។
កិច្ចប្រជុំពិសេសបន្ទាន់ដ៏កំរនេះ បានស្នើឡើងដោយប្រទេសអារ៉ាប់ និងប្រទេសកាន់សាសនាអ៊ីស្លាមទាំងអស់។
ឯកអគ្គរដ្ឋទូតប៉ាឡេស្ទីនប្រចាំអង្គការសហប្រជាជាតិ ឈ្មោះ Riyad Mansour បានថ្លែងថា មហាសន្និបាតនឹងធ្វើការបោះឆ្នោតលើសេចក្តីសម្រេចពង្រាង ដើម្បីស្នើឲ្យដកចេញនូវការប្រកាសទទួលស្គាល់របស់លោក ដូណាល់ ត្រាំ។
កាលពីថ្ងៃច័ន្ទកន្លងទៅនេះ អាមេរិចបានវេតូ (បដិសេធ) លើសេចក្តីសម្រេចនោះ ខណៈដែលសមាជិកចំនួន ១៤ផ្សេងទៀតបោះឆ្នោតគាំទ្រលើសេចក្តីសម្រេចនោះ។
Riyad Mansour និយាយថា លោកសង្ឃឹមថា នឹងមានការបោះឆ្នោតគាំទ្រយ៉ាងលើសលុបនៅក្នុងមហាសន្និបាតលើសេចក្តីសម្រេចនោះ។ ការបោះឆ្នោតនោះមិន ការបោះឆ្នោតនោះគឺជាការបោះឆ្នោតមិនចាំបាត់ត្រូវគោរពតាម ប៉ុន្តែវាមានទំងន់នយោបាយ។
ជុំវិញការគ្រោងបោះឆ្នោតលើសេចក្តីសម្រេចនេះដែរ ឯកអគ្គរដ្ឋទូតអាមេរិចប្រចាំអង្គការសហប្រជាជាតិ អ្នកស្រី Nikki Haley បានថ្លែងព្រមានថា អាមេរិចនឹងចងចាំឈ្មោះ អ្នកទាំងឡាយណាដែលបោះឆ្នោតលើសេចក្តីសម្រេចនោះ ដោយរិះគន់លើសហរដ្ឋអាមេរិច។
អ្នកស្រីបង្ហោះនៅក្នុង Twitter ដូច្នេះថា “នៅក្នុងអង្គការសហប្រជាជាតិ ពួកយើងតែងតែត្រូវបានគេស្នើឲ្យធ្វើកិច្ចការច្រើនជាងគេ និងផ្តល់អ្វីៗច្រើនជាងគេ។ ដូច្នេះ នៅពេលពួកយើងធ្វើការសម្រេចចិត្ត តាមឆន្ទៈរបស់ប្រជាជនអាមេរិច ថាកន្លែងណាដែលពួកយើងត្រូវតាំងស្ថានទូត ពួកយើងមិនរំពឹងថាអ្នកទាំងនោះដែលយើងបានជួយ នឹងប្រឆាំងពួកយើងនោះទេ។ នៅថ្ងៃព្រហស្បតិ៍ និងមានការបោះឆ្នោតរិះគន់លើការជ្រើសរើសរបស់ពួកយើង។ អាមេរិចនឹងធ្វើការកាត់ឈ្មោះពួកគេ”។
សូមរំលឹកផងដែរថា កាលពីដើមខែនេះ ប្រធានាធិបតី ដូណាល់ ត្រាំ បានកែប្រែគោលនយោបាយអាមេរិចដែលប្រកាន់អស់ជាច្រើនឆ្នាំមកហើ់យ ដោយគាត់ប្រកាសទទួលស្គាល់ទីក្រុងជេរ៉ូសាឡឹម ជារដ្ឋធានីរបស់ប្រទេសអ៊ីស្រាអ៊ែល។ ការប្រកាសរបស់លោក ធ្វើឲ្យមានការផ្ទុះការតវ៉ាយ៉ាងខ្លាំងពីប្រជាជនប៉ាឡេស្ទីន និងប្រទេសក្នុងពិភពអារ៉ាប់។
លោក ត្រាំ ក៏មានគំរោងផ្លាស់ប្តូរស្ថានទូតអាមេរិច ដែលសព្វថ្ងៃស្ថិតក្នុងទីក្រុង ថេល អាវិ (Tel Aviv) មកកាន់ទីក្រុងជេរ៉ូសាឡឹមវិញ។
ប្រទេសអ៊ីស្រាអ៊ែល បានចាត់ទុកទីក្រុងជេរ៉ូសាឡឹមជារដ្ឋធានីដ៏ពិសិទ្ធរបស់ខ្លួន ហើយចង់ឲ្យស្ថានទូតបរទេសទាំងអស់ផ្លាសប្តូរមកកាន់ទីនោះវិញ។ ចំនែកប៉ាឡេស្ទីនវិញ ចង់បានរដ្ឋធានីនេះជារដ្ឋប៉ាឡេស្ទីនឯករាជ្យនៅភាគខាងកើត ដែលអ៊ីស្រាអ៊ែលបានដណ្តើមយកក្នុងសង្គ្រាមឆ្នាំ ១៩៦៧៕ សុភ័ក្ត្រ