ភាពតានតឹងរវាងប្រធានាធិបតីអាមេរិក Donald Trump ជាមួយប្រព័ន្ធព័ត៌មានពិសេស CNN បន្តបង្កភាពតានតឹងសម្រាប់សាធារណមតិ ខណៈពេលដែលនៅចុងសប្តាហ៍កន្លងមកនេះ ម្ចាស់សេតវិមានបានបង្ហោះផ្សាយរូបភាព Photoshop មួយបង្ហាញឲ្យឃើញ logo CNN ត្រូវបាន “ឈ្លីកំទេច” ក្រោមបាតស្បែកជើងរបស់លោក។
តាំងពីយូរណាស់មកហើយដែលប្រធានាធិបតី Trump បានចោទប្រកាន់ CNN និងប្រព័ន្ធព័ត៌មានមួយចំនួនផ្សេងទៀតថា ជាប្រព័ន្ធព័ត៌មានក្លែងក្លាយ ព្រោះតែងចុះផ្សាយនូវព័ត៌មានដែលលោកចោទប្រកាន់ថា ខុសពីការពិត។
នៅក្នុងបរិបទតានតឹងបំផុតថ្មីៗនេះ កាលពីថ្ងៃទី ២៤/១២ ប្រធានាធិបតី Trump បានបន្តបង្ហោះរូបភាពរបស់អ្នកប្រើប្រាស់ Twitter ផ្សេង មានឈ្មោះថា @Oregon4Trump នោះគឺជារូបភាព Photoshop បង្ហាញឲ្យឃើញលោក Trump កំពុងអង្គុយនៅខាងក្រោយលើយន្ត limousine ហើយស្តាប់ទូរស័ព្ទ។
ទិដ្ឋភាពបង្កចំណាប់អារម្មណ៍បំផុតគឺឡូហ្គូ ត្រូវឈ្លីខ្ទេចក្រោមបាតស្បែកជើងឆ្វេងរបស់ប្រធានាធិបតី Trump ក្នុងពេលដែលលើរូបនោះក៏ឃើញមានអក្ស “Winning” (ជ័យជំនះ)។
នេះពុំមែនជាលើកដំបូងទេ ដែលលោក Trump បានប្រើប្រាស់រូបភាព Photoshop បំណងវាយប្រហារ CNN ។ កាលពីដើមខែកក្កដា លោកធ្លាប់បង្ហោះផ្សាយខ្សែវីដេអូ “ដើរផ្ទួនៗទៅលើកីឡាប្រដាល់ម្នាក់ដែលមានផ្ទៃមុខ គឺ logo CNN នៅលើវេទិកា។ បណ្តារូបភាពទាំងនេះបង្ហាញឲ្យឃើញនូវទំនាស់តានតឹងរវាងមេដឹកនាំរដ្ឋាភិបាលអាមេរិកជាមួយប្រព័ន្ធព័តមាន ពិសេសជាមួយព័ត៌មាន “ជាប្រព័ន្ធព័ត៌មានក្លែងក្លាយ”។
ទោះយ៉ាងណារឿងនេះ វាធ្វើឲ្យលោកកាន់តែមាន “ចលនា” វាយប្រហារលើរូបលោកខ្លាំងជាងមុនប៉ុណ្ណោះ៕ សូយន
