ភ្នំពេញ ៖ នៅថ្ងៃពុធ ៤រោច ខែពិសាខ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី២២ ខែឧសភា ឆ្នាំ២០១៩ ក្រុមការងារអធិការកិច្ចរ៉ែ នៃក្រសួងរ៉ែនិងថាមពល បានចុះយុទ្ធនាការឆ្មាំទន្លេនាពេលរាត្រី ។
ក្នុងយុទ្ធនាការឆ្មាំទន្លេនាពេលរាត្រី លោក ឌិត ទីណា រដ្ឋលេខាធិការក្រសួងរ៉ែនិងថាមពល បានដឹកនាំក្រុមការងារអធិការកិច្ចរ៉ែ ចុះត្រួតពិនិត្យសកម្មភាពការធ្វើអាជីវកម្មរ៉ែខ្សាច់តាមដងទន្លេ ពិសេសស្វែងរកនូវការធ្វើអាជីវកម្មរ៉ែអនាធិបតេយ្យ ចាប់ពីទីតាំងទន្លេបួនមុខ រហូតដល់ក្រោមស្ពានអ្នកលឿងនាម៉ោង ២:០០ទាបភ្លឺ ដោយមានការសហការចូលរួមពីកងរាជអាវុធហត្ថលើផ្ទៃប្រទេសផងដែរ។ ជាលទ្ធផលនៃចុះត្រួតពិនិត្យនេះ ឃើញថាពុំមានការធ្វើអាជីវកម្មរ៉ែខ្សាច់អនាធិបតេយ្យណាមួយកើតឡើងឡើយ ហើយចំពោះទីតាំងនៃការធ្វើអាជីវកម្មរ៉ែខ្សាច់ ដែលមានអាជ្ញាបណ្ណពីក្រសួង ក្រុមហ៊ុនបានអនុវត្តតាមច្បាប់នៃដែនអាជ្ញាប័ណ្ណ ក៏ដូចជាធ្វើអាជីវកម្មទៅតាមម៉ោងនិងពេលវេលាដែលបានកំណត់ក្នុងលិខិតបទដ្ឋានគតិយុត្តិ។
សូមបញ្ជាក់ថាយុទ្ធនាការឆ្មាំទន្លេនេះត្រូវបានអនុវត្តជាប្រចាំ ដោយមានក្រុមល្បាត និងក្រុមឃ្លាំមេីល ព្រមទាំងមានយន្តការរាយការណ៍តាមប្រព័ន្ធ Hotline ផងដែរ៕ ដោយ៖កូឡាប