ខេត្តព្រៃវែង៖ ជនសង្ស័យម្នាក់បានសារភាពថា ខ្លួនពិតជាបានរំលោភ និងសម្លាប់លើក្មេងស្រីរងគ្រោះប្រាកដមែន បន្ទាប់មកយកទៅទម្លាក់ក្នុងស្រះទឹក បន្ទាប់ពីល្បួងកុមារីរងគ្រោះទៅឆ្លុះកង្កែបនៅពេលយប់។ ជនសង្ស័យត្រូវចាប់ខ្លួននៅ ថ្ងៃ ទី២៣ ខែ ឧសភា ឆ្នាំ២០១៩។
សូមបញ្ជាក់ថា នៅថ្ងៃពុធ ទី២២ ខែ ឧសភា ឆ្នាំ២០១៩ វេលាម៉ោង២១និង៣០នាទី ករណី រំលោភសំលាប់ អនីតិជន នៅចំណុចស្រះទឹកវាលចម្ងាយ៦៥០ម៉ែត្រ ខាងកើតភូមិកោងស្រែ ឃុំល្វេ ស្រុកស៊ីធរកណ្តាល ខេត្តព្រៃវែង។
សពកុមារគ្រោះឈ្មោះ ហុង ស្រីដាវ ភេទស្រី អាយុ៩ឆ្នាំ នៅភូមិ.ឃុំកើតហេតុខាងលើបច្ចុប្បន្នរស់នៅជាមួយជីតា ឈ្មោះ ហាក់ គឹមហុង អាយុ៥២ឆ្នាំ និងជីដូន ឈ្មោះជា ស្រី អាយុ៥៤ឆ្នាំ ។ ចំណែក ជនសង្ស័យឈ្មោះ ផ្លុង ហុកលី ហៅហុក ភេទប្រុស អាយុ៣៥ឆ្នាំ នៅភូមិឃុំជាមួយគ្នា ។
ជនសង្ស័យ ផ្លុង ហុកលី បានយកក្បាលពិលដែលបញ្ចូលភ្លើងនៅផ្ទះរបស់ខ្លួន មកឱ្យជីតារបស់ជនរងគ្រោះ ហើយចេញទៅវិញបាននាំក្មេងស្រីរងគ្រោះទៅឆ្លុះកង្កែបជាមួយគ្នា លុះមកដល់ម៉ោង២២ ជនសង្ស័យបានត្រឡប់មកផ្ទះវិញ ក៏ជួបនឹងជីដូនរបស់ជនរងគ្រោះ គាត់បានសួរជនសង្ស័យថា ចៅរបស់គាត់ទៅណា ជនសង្ស័យឆ្លើយថា ចៅរបស់យាយមិនបានទៅជាមួយខ្ញុំទេ បន្ទាប់មកជីដូនជនរងគ្រោះ បានពឹងអ្នកជិតខាងឲ្យជួយដើររកទាំងយប់ប៉ុន្តែរកមិនឃើញ ។ លុះព្រឹកឡើង ថ្ងៃទី២៣ ឧសភា សាច់ញាតិបានរាយការណ៍ជូនសមត្ថកិច្ច ចុះជួយស្រាវជ្រាវរុករកក្មេងស្រីរងគ្រោះ បានប្រទះឃើញសាកសពក្មេងស្រីរងគ្រោះនៅស្រះចំណុចកើតហេតុខាងលើ ។
តាមការស្រាវជ្រាវរបស់សមត្ថកិច្ចសន្និដ្ឋានថា ឈ្មោះ ហុង ស្រីដាវ ពិតជាស្លាប់ដោយសារការរំលោភសម្លាប់ប្រាកដមែន ។
ជនសង្ស័យឈ្មោះ ផ្លុង ហុកលី ត្រូវបានហៅមកសាកសួរ ហើយសមត្ថកិច្ចបានឃាត់ខ្លួនមកអធិការដ្ឋាននគរបាលស្រុក។ បន្ទាប់ពីឃាត់ខ្លួន និងសាកសួរ ជនសង្ស័យក៏បានសារភាពថា ខ្លួនពិតជាបានរំលោភ និងសម្លាប់លើក្មេងស្រីរងគ្រោះប្រាកដមែន បន្ទាប់មកយកទៅទម្លាក់ក្នុងស្រះទឹក រួចយកឈើ២កំណាត់ដោតខ្វែង ខ្ទាស់កជនរងគ្រោះ ដោយខ្លាចសាកសពអណ្តែតឡើង៕ ដោយ៖បញ្ញាស័ក្តិ
