ភេសជ្ជៈ queimada របស់ជនជាតិ Galicia នៅអេស្ប៉ាញ ត្រូវបានមនុស្សច្រើនជំនាន់ចាត់ទុកថា វាមានប្រសិទ្ធភាពបណ្តេញខ្មោចព្រាយបិសាច និងបាបកម្មពីក្នុងខ្លួន។
អ្នកកុំប្រញាប់ខ្លាចស្លន់ស្លោរឲ្យសោះពេលបានមើលទិដ្ឋភាពដែលមនុស្សម្នាក់កំពុងកូរសារធាតុរាវ កំពុងឆាបឆេះបណ្តើរ និងនិយាយពាក្យអាគមន៍អូមអាម ដើម្បីបណ្តេញខ្មោចបិសាច នេះជាវិធីមួយមានតាំងពីយុគសម័យ Celtic ដែលគេហៅថា Queimada ប្រពៃណីនេះជារបស់ពួកមនុស្សតាមសាសនាគ្រិស្ត នាសតវត្សរ៍ទី ១១ ខណៈពេលដែលកុលសម្ព័ន្ធ Celtic ធ្វើដំណើរមករស់នៅខេត្ត Galicia ប្រទេសអេស្បាញ។ វាត្រូវបានរៀបចំឡើងតាមរូបមន្តមួយផ្ទេរបន្តអស់កាលច្រើនសតវត្សរ៍។ ប្រភេទភេសជ្ជៈឆាបឆេះនេះ ត្រូវបានគេរៀបចំនាឱកាសពិធីបុណ្យ នឹងព្រឹត្តិការណ៍ធំៗរបស់សហគមន៍នៅតំបន់ Galicia។
របៀបកែច្នៃប្រភេទភេសជ្ជៈពិសេសនេះ ត្រូវបានរៀបចំដាក់ក្នុងឆ្នាំងដីមួយធំ ដែលជានិមិត្តរូបតំណាងឲ្យផែនដី។ ប្រភេទស្រាខ្លាំង aguardiente តំណាងឲ្យប្រទេសនេះ “ទឹកភ្នែកមាតាធម្មជាតិ” គឺជាគ្រឿងសំខាន់នៃភេសជ្ជៈនេះ ស្រាខ្លាំងនោះត្រូវបានគេយកមកកូលាយឱសថរុក្ខជាតិ កាហ្វេ ស្ករ ស្បូវ ព្រមទាំងគ្រាប់សណ្តែក។
បន្ទាប់មកគេយកភ្លើងមកដុត ហើយសារធាតុអាល់កុលចាប់ផ្តើមឆេះ ដែលជានិមិត្តរូបឲ្យពន្លឺ។ ស្ករ ត្រូវបានគេកូរពីបាតខ្ទះ វាធ្វើឲ្យភ្លើងចាប់ផ្តើមមានពណ៌ខៀវ ហើយបន្តិចម្តង ក្លាយជា caramen។ នៅពេលភ្លើងលែងមានអណ្តាតខ្លាំង គេចាប់ផ្តើមដួសសារធាតុរាវនោះដាក់ក្នុងពែងតូចៗ រួចចែកគ្នាផឹក។
ប្រការគួរឲ្យកត់សម្គាល់នោះ គឺនៅខណៈពេលគេកូរស្ករឲ្យមានអណ្តាតភ្លើងខ្លាំង មនុស្សនៅទីនោះចាប់ផ្តើមទន្ទេញពាក្យអូមអាមជាភាសាអេស្បាញ បំណងដេញព្រលឹងខ្មោចព្រាយ ស្ថិតនៅជុំវិញនោះ។
តាមរឿងហេតុតៗគ្នាឲ្យដឹងថា ការក្រេបភេសជ្ជៈនេះលើកទី១ នឹងជួយឲ្យគេជំរុះចោលព្រលឹងខ្មោចបិសាច ក្រេបលើកទី២ ជួយលុបចោលគំនុំគំកួន ហើយនិងក្រេបលើកទី៣ ធ្វើឲ្យមានភាពភ្លឺស្វាង។
ប្រភេទភេសជ្ជៈនេះដើរតួនាទីសំខាន់នៅតំបន់ Galicia នេះ ព្រោះវាជាខ្សែរយៈមួយតភ្ជាប់ជីវភាព នៃសមាជិករបស់សហគមន៍ជនជាតិមួយនេះ៕ ចន្ទ្រា
