ភ្នំពេញ ៖ លោក ចាន់ អ៊ាន បានថ្លែងថា ក្រសួងសន្តិសុខសាធារណៈចិន នឹងជួយលើកកម្ពស់កសាងសមត្ថភាពកងកម្លាំងនគរបាលជាតិកម្ពុជា តាមរយៈការផ្តល់ការបណ្តុះបណ្តាលលើជំនាញ ប្រឆាំងបទល្មើសបច្ចេកវិទ្យា ប្រឆាំងអំពើភេរវកម្ម អំពើឆបោកតាមប្រព័ន្ធទូរគមនាគម និងល្បែងស៊ីសងតាមប្រព័ន្ធអ៊ីនធឺណិត។
នាព្រឹកថ្ងៃសុក្រ ១៣រោច ខែពិសាខ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី៣១ ខែឧសភា ឆ្នាំ២០១៩នេះ នាទីស្តីការក្រសួងមហាផ្ទៃ លោកចាន់ អ៊ាន រដ្ឋលេខាធិការក្រសួងមហាផ្ទៃ បានអញ្ជើញជាអធិបតីដឹកនាំកិច្ចប្រជុំ ស្តីពី ផែនការតម្រូវការវគ្គបណ្តុះបណ្តាលប្រចាំឆ្នាំ ក្របខ័ណ្ឌកិច្ចសហប្រតិបត្តិការរវាងក្រសួងមហាផ្ទៃកម្ពុជា និងក្រសួងសន្តិសុខសាធារណៈចិន។
លោកនាយឧត្តមសេនីយ៍ ប៉ោ ភក្តិ អគ្គលេខាធិការ នៃអគ្គលេខាធិការដ្ឋាន បានរាយការណ៍សង្ខេបជូនអង្គប្រជុំ ស្តីពីការបណ្តុះបណ្តាលរយៈពេល វែង មធ្យម និងរយៈពេលខ្លីដល់មន្ត្រីនគរបាល និងមន្ត្រីស៊ីវិលកម្ពុជា ក្នុងឆ្នាំកន្លងទៅ។
លោក នាយឧត្តមសេនីយ៍ ប៉ោ ភក្តិ បានមានប្រសាសន៍បន្តថា យោងតាមដំណើរទស្សនកិច្ចរបស់ថ្នាក់ដឹកនាំក្រសួងមហាផ្ទៃ ដែលដឹកនាំដោយសម្តេច ក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ នៅសាធារណរដ្ឋប្រជាមានិតចិន ក្នុងឆ្នាំ២០១៩កន្លងទៅនេះ ហើយជាឆ្នាំអនុវត្តកិច្ចសហប្រតិបត្តិការច្បាប់រវាងក្រសួងមហាផ្ទៃ នៃព្រះរាជាណាចក្រកម្ពុជា និងក្រសួងសន្តិសុខសាធារណៈចិនដែលក្នុងនោះ គឺបាននិយាយអំពីការកសាងសមត្ថភាពមន្ត្រី ដែលក្រសួងសន្តិសុខសាធារណៈចិន នឹងជួយលើកកម្ពស់កសាងសមត្ថភាពកងកម្លាំងនគរបាលជាតិកម្ពុជា តាមរយៈការផ្តល់ការបណ្តុះបណ្តាលលើជំនាញ ប្រឆាំងបទល្មើសបច្ចេកវិទ្យា ប្រឆាំងអំពើភេរវកម្ម អំពើឆបោកតាមប្រព័ន្ធទូរគមនាគម និងល្បែងស៊ីសងតាមប្រព័ន្ធអ៊ីនធឺណិត។
សូមបញ្ជាក់ផងដែរថា ក្នុងក្របខ័ណ្ឌនៃការបណ្តុះបណ្តាលរវាងក្រសួងមហាផ្ទៃ នៃព្រះរាជាណាចក្រកម្ពុជា និងក្រសួងសន្តិសុខសាធារណៈចិន ក្នុងរយៈពេលប្រាំឆ្នាំកន្លងទៅ គឺមានចំនួន ១០៥នាក់ ក្នុងមួយឆ្នាំ៕ ដោយ៖កូឡាប