ខេត្តព្រះសីហនុ ៖ ប្រជាពលរដ្ឋរស់នៅទីប្រជុំជនក្នុងក្រុងព្រះសីហនុ បង្ហាញអារម្មណ៍មិនពេញចិត្ត ចំពោះសកម្មភាពរថយន្តរបស់ក្រុមហ៊ុនក្រឡុកស៊ីម៉ង់ត៍មួយចំនួន ដែលកំពុងបើកបរធ្វើអាជីវកម្មតាមផ្លូវក្នុងក្រុងរាល់ថ្ងៃនេះ បើកបរមានល្បឿនលឿន ហើយតែងបង្កគ្រោះថ្នាក់ចរាចរណ៍កើតមានរាល់ថ្ងៃ។
ឥរិតាបទបើកបរ របស់អ្នកបើករថយន្តក្រុមហ៊ុនក្រឡុកស៊ីម៉ង់ត៍ខាងលើនេះ ត្រូវប្រជាពលរដ្ឋភាគច្រើន រស់នៅក្រុងព្រះសីហនុ ចោទថា បានបង្កគ្រោះថ្នាក់ចរាចរណ៍បុករះ បណ្តាលឲ្យខូចខាតយានយន្តអ្នកដំណើរមួយចំនួន នៅតាមផ្លូវសាធារណៈ។ ជាពិសេស បណ្តាលឲ្យកើតមានគ្រោះថ្នាក់ចរាចរណ៍មនុស្សស្លាប់ -រងរបួសមនុស្សជាច្រើនករណីនាពេលកន្លងមកនេះ។
បញ្ហានេះ ប្រជាពលរដ្ឋភាគច្រើនរស់នៅក្រុងព្រះសីហនុ បានលើកជាសំណួរថា តើអាជ្ញាធរស្ថាប័នពាក់ព័ន្ធ នៃរដ្ឋបាលខេត្តព្រះសីហនុ គួរមានចំណាត់ការបែបណា ចំពោះក្រុមហ៊ុនរថយន្តក្រឡុកស៊ីម៉ងត៍ មួយចំនួន ដែលបើកចូលក្រុងពេលថ្ងៃ ហើយតែងបង្កឲ្យមានចរាចរណ៍កកស្ទះ ជាពិសេសបង្កឲ្យមានគ្រោះថ្នាក់ចរាចរណ៍ស្លាប់ -របួសមនុស្ស ព្រមទាំងបំផ្លាញទ្រព្យសម្បត្តិទាំងឯកជន និងរដ្ឋស្ទើរជារៀងរាល់ថ្ងៃនាពេលកន្លងមកនេះ..?។
ជាក់ស្តែង កាលពីម៉ោងប្រមាណជាង ៨យប់ថ្ងៃទី២ ខែមិថុនា ឆ្នាំ២០១៩ មានរថយន្តក្រឡុកសុីម៉ង់ត៍១គ្រឿង របស់ក្រុមហ៊ុន SCC បានបុកកិនទៅលើម៉ូតូ១គ្រឿង បណ្តាលឲ្យស្លាប់បុរសម្នាក់នៅកន្លែងកើតហេតុ នៅត្រង់ចំណុចតាមផ្លូវបេតុង ចុះពីសង្កាត់លេខ១ ឆ្ពោះទៅកាន់រោងចក្រអូរ២ ស្ថិតក្នុងសង្កាត់លេខ៤ ក្រុងព្រះសីហនុ។
នគរបាលចរាចរណ៍ឲ្យដឹងថា ជនរងគ្រោះស្លាប់ ក្នុងគ្រោះថ្នាក់ចរាចរណ៍នេះ មានតួនាទីជាគ្រូបង្រៀន នៅសាលាបឋមសិក្សាហ៊ុន សែន មិត្តភាពក្រុងព្រះសីហនុ ដោយជនរងគ្រោះ បានស្លាប់ភ្លាមៗ នៅកន្លែងកើតហេតុ។
ជនរងគ្រោះខាងលើរូបនេះមានឈ្មោះ ជា សុីវ៉ាន់ ភេទប្រុស មានមុខរបរជាគ្រូបង្រៀន ត្រូវបានរថយន្តក្រឡុកស៊ីម៉ង់ត៍ របស់ក្រុមហ៊ុន SCC បុកសង្កត់ពីលើជនរងគ្រោះ ពេលកំពុងជិះម៉ូតូតាមផ្លូវ បណ្តាលឲ្យជនរងគ្រោះស្លាប់គៀបជាប់នៅពីក្រោមរថយន្តតែម្តង។
តាមសាក្សីនៅកន្លែងកើតហេតុបញ្ជាក់ថា នៅគ្រាជនរងគ្រោះកំពុងជិះម៉ូតូម៉ាក សេ១២៥ សេរីឆ្នាំ២០១៧ ពណ៌ខ្មៅ តាមផ្លូវចំណោតខាងលើនេះ ក៏មានរថយន្តក្រឡុកស៊ីម៉ង់ត៍មួយគ្រឿង បានបើកចុះចំណោតយ៉ាងលឿន រួចក៏បុកម៉ូតូជនរងគ្រោះពេញទំហឹង ហើយបានអូសទាំងជនរងគ្រោះទាំងម៉ូតូ ចូលទៅក្នុងការដ្ឋានសំណង់មួយកន្លែងបណ្តាលឲ្យខូចខាតរថយន្ត និងម៉ូតូទាំងស្រុង។
សមត្ថកិច្ចនគរបាលចរាចរណ៍ផ្លូវគោកខេត្តព្រះសីហនុ ឲ្យដឹងថាបច្ចុប្បន្ន ករណីគ្រោះថ្នាក់ចរាចរណ៍ខាងលើនេះ សមត្ថកិច្ចកំពុងបន្តនីតិវិធីដោះស្រាយទៅតាមផ្លូវច្បាប់ជាបន្តទៀត។
ត្រង់ចំណុចនេះ ប្រជាពលរដ្ឋ ឬអាណាព្យាបាលរស់នៅខេត្តព្រះសីហនុ បានស្នើឲ្យ លោក យន្ត មីន អភិបាលខេត្តព្រះសីហនុ ជួយពិនិត្យ និងមានវិធានការ ទៅលើសកម្មភាពរបស់ក្រុមហ៊ុនក្រឡុកស៊ីម៉ង់ត៍មួយចំនួន ដែលកំពុងបង្កការភ័យខ្លាចដល់ការធ្វើដំណើរ របស់ប្រឋជាពលរដ្ឋ, បង្កឲ្យកើតមានចរាចរណ៍កកស្ទះជាពិសេសបង្កឲ្យមានគ្រោះថ្នាក់ចរាចរណ៍ស្លាប់មនុស្ស, ខូចខាតទ្រព្យសម្បត្តិឯកជន និងទ្រព្យសម្បត្តិរដ្ឋអស់ជាច្រើនសន្ធឹកសន្ធាប់ នាពេលកន្លងមកនេះ ឲ្យបានឆាប់ ដោយអនុគ្រោះផង។
បន្ថែមលើនេះ ក្រុមប្រជាពលរដ្ឋបង្ហាញការហួសចិត្តថា មិនគួរលោក យន្ត មីន អភិបាល នៃគណៈអភិបាលខេត្តព្រះសីហនុ ទុកបណ្តោយឲ្យសកម្មភាព របស់ក្រុមហ៊ុនក្រឡុកស៊ីម៉ង់ត៍មួយចំនួន អាចបន្តធ្វើសកម្មភាពបង្កការភ័យខ្លាច និងបង្កឲ្យកើតមានការកកស្ទះចរាចរណ៍តាមផ្លូវសាធារណៈ មានភាពអនាធិបតេយ្យដូចរាល់ថ្ងៃនេះ អាចបន្តកើតឡើងទៀតទេ៕ ដែន សីមា
