នៅពេលអ្នកលក់សម័យបុរាណនៅក្នុងប្រទេសស្កុតឡែន បានទិញកូនអុកឆ្លាក់ពីភ្លុកមួយគ្រាប់ តម្លៃ ៦ដុល្លារ ក្នុងឆ្នាំ ១៩៦៤ គាត់ប្រហែលជាមិនបានដឹងទេថា កូនអុកមួយគ្រាប់ដែលគាត់ទិញនោះគឺជាកូនអុកដ៏ល្បីឈ្មោះបំផុតក្នុងលោក ។
កូនអុកនោះ ដែលមានមុខងារជាទាហ៊ានយាម (Lewis Warder) ត្រូវបានម្ចាស់វាដាក់ក្នុងថតតុអស់រយៈពេល ៥៥ឆ្នាំមកហើយ។ កូនអុកនេះ ឥឡូវត្រូវបានគេដឹងពីប្រវត្តិរបស់វា ហើយវាអាចមានតម្លៃរហូតដល់ ១,៣ លានដុល្លារ នៅក្នុងការដេញថ្លៃ ក្រោយពេលម្ចាស់របស់វាបានយកទៅកាន់សារមន្ទីរដេញថ្លៃ Sotheby ក្នុងទីក្រុងឡុងដើម្បីធ្វើការវាយតម្លៃ។
កូនអុកមួយគ្រាប់នេះ ត្រូវបានគេរកឃើញនៅលើកោះ Lewis ស្ថិតក្នុងប្រទេសស្កុតឡែន ក្នុងឆ្នាំ ១៨៣១ ប៉ុន្តែដំណើររឿងនៃការរកឃើញគ្រាប់អុកនោះកំពុងស្ថិតក្នុងអាថ៌កំបាំងនៅឡើយ។ គ្រាប់អុកចំនួន ៩៣ គ្រាប់ ត្រូវបានគេប្រទះឃើញ ដែលភាគច្រើនឆ្លាក់ពីភ្លុកផ្សោត។
សូមបញ្ជាក់ថា បើសារៈមន្ទីរ Sotheby បាននិយាយក្នុងសេចក្តីប្រកាសថា បើតាមទ្រឹស្តីនៃដើមកំណើតរបស់អុកនោះគឺថា វាត្រូវបានគេឆ្លាក់នៅឆន្លោះសតវត្សន៍ទី ១២ និងដើមទី ១៣ នៅក្នុងប្រទេសណូវេ៕
អត្ថបទប្រែសម្រួលដោយ៖ សុភ័ក្រ
ប្រភព៖ CNN
